“Beno Baka Kilo na Mono, Beno Nata Yo”

¹ Na nsi-ntoto yai ya kufuluka na bampasi ti basusi, beto mebakaka lusadisu ya kyeleka na kundimaka emvitasio ya zola yina Yezu kepesa ya kuzwa kupema yina kekatukaka na kubaka mpi kunata kilo na yandi. (Mat. 11:​29, 30) Kundima kilo ya kuvanda longoki kelombaka kusala kisalu yina kele mpasi kaka ve, kansi mpi ya kepesaka kupema. Yo kelombaka kusamuna nsangu ya mbote ya Kimfumu mpi kusadisa bankaka na kuzwa kupema kumosi ti beto na nsi ya kilo ya Yezu yina kele ve mpasi na kunata.​—⁠Mat. 24:14; 28:​19, 20.

² Kisalu ya Kusamuna Kepesaka Kupema: Yezu kulombaka ve balongoki na yandi na kuyika kilo na yandi na zulu ya kilo yina bo vandaka na yo dezia. Yandi lombaka bo na kushanze kilo na bo ya kuluta kizitu ti yina ya yandi ya kukonda kizitu. Beto kenyokwamaka dyaka ve ti basusi mpi kukonda kivuvu ya ngidika yai ya bima; beto kekudipesaka mpi ve kuluta ndilu sambu na bimvwama yina kezingaka ve mingi. (Luka 21:34; 1 Tim. 6:17) Ata beto ke na mambu mingi ya kusala mpi beto fwete sala ngolo sambu na kuzwa bima ya mfunu ya luzingu ya konso kilumbu, beto ketulaka lusambu ya Nzambi na kisika ya ntete na luzingu na beto. (Mat. 6:33) Kana beto kelanda kutula mabanza na beto na mambu ya kuluta mfunu, beto tamonaka ntangu yonso nde kisalu ya kusamuna kepesaka kupema, kansi yo kele ve kizitu.​—⁠Filp. 1:⁠10.

³ Mbala mingi, beto kewaka kyese ya kutuba mambu yina ntima na beto kezolaka mingi. (Luka 6:45) Bakristu yonso kebakaka Yehowa mpi balusakumunu ya Kimfumu yina yandi mesilaka na valere mingi mpenza. Yo yina, yo kepesaka kupema mpenza na kuzabisa “nsangu ya mbote” ya mambu ya mbote mpi kuvila basusi ya luzingu na beto ya konso kilumbu na ntangu beto kevukana na kisalu ya kusamuna! (Roma 10:15) Ya kyeleka, kana beto kesala kima mosi mbala mingi, beto tazaba yo mbote mpi tabaka kyese mingi mpenza. Yo yina, kulutisa ntangu mingi na kisalu ya kusamuna, kana beto ke na ngolo ya kusala yo, tanatila beto kupema ya mingi. Mpi beto kebakaka kikesa mingi mpenza ntangu bantu kendimaka nsangu na beto! (Bis. 15:⁠3) Ata ntangu beto kekutana ti bantu yina kebuyaka kuwa nsangu na beto to luteleminu, kisalu ya kusamuna tanatila beto kupema na kimpeve kana beto keyibuka nde bikesa na beto kesepedisaka Yehowa mpi nde balusakumunu na yandi tabuta mbutu ya kitoko mpenza.​—⁠Bis. 5:41; 1 Kor. 3:⁠9.

⁴ Ntangu beto kendimaka emvitasio ya Yezu, beto kevandaka ti dibaku ya kusala kumosi ti yandi bonso Bambangi ya Yehowa. (Yez. 43:10; Kus. 1:⁠5) Ata kima mosi ve lenda nata kupema kuluta yai!