Ntangu Muwi Ketuba Ndinga Yankaka
1. Sambu na nki mfunu ya kusala na bumosi na teritware kekuma kaka mingi?
1 Bansamuni ya Kimfumu ya nsi-ntoto ya mvimba kekutana mbala mingi ti bantu ya ketula dikebi na nsangu, kansi ya ketuba ndinga ya meswaswana ti yina ya mabundu na bo. Sambu na kusadisa bantu yai na kimpeve, bafiliale mingi kemona mfunu ya kusala bimvuka ti mabundu ya bandinga yankaka. Sambu bantu lenda tuba bandinga mingi na teritware mosi, mabundu mingi ya bandinga ya kuswaswana lenda samuna na teritware mosi. Inki mutindu mabundu lenda sala na bumosi sambu na kuzikisa nde kisalu ya kusamuna kesalama na ndonga?—1 Kor. 14:33.
2. Na ntangu beto kesamuna nzo na nzo, nki mutindu beto lenda sala na bumosi na teritware ti kimvuka to dibundu yina ketubaka ndinga yankaka?
2 Kusala na Bumosi: Na ntangu yandi kesamuna na balabala to keta kimbangi ya dibaku ya mbote, nsamuni fwete solula ti bantu yonso, ti bantu yina ketubaka ndinga yankaka, mpi kukabula mikanda na ndinga yina bantu yango kezola kutanga. Kansi, ntangu yandi kesala kisalu ya kusamuna nzo na nzo na teritware yina bampangi ya dibundu to bimvuka ya ndinga yankaka mpi kesamunaka, yandi fwete tula mingimingi dikebi na banzo ya bantu yina ketuba ndinga ya dibundu na yandi. Ntangu mabundu mingi kesamuna na teritware mosi, yo kele mpenza mfunu na kubaka banoti. Bankengi na kisalu fwete solulaka bo na bo mpi kutwadisa mambu na mutindu mosi ya mbote. (Bing. 11:14) Kansi, kana nsamuni kesala kisalu ya nzo na nzo ebuna yandi mekutana ti muntu mosi ya ketuba ndinga yankaka, kansi ata dibundu mosi ya ketubaka ndinga yina kele ve na nzyunga, nsamuni fwete sala kikesa sambu na kuta kimbangi mpi kulanda kuvutukila muntu yango.
3. Inki beto fwete sala ntangu beto mekutana ti bansamuni ya kimvuka to dibundu ya ndinga yankaka kesamuna na teritware mosi yina beto kele?
3 Kisalu Mosi: Inki beto fwete sala ntangu beto mekutana na kisalu ya kusamuna ti bansamuni ya mabundu ya ndinga yankaka na teritware mosi kilumbu mosi? Ya kyeleka, zola ya Bukristu tavanda mfunu mingi kuluta baluswaswanu ya bandinga, mpi beto yonso takudibanza ntetentete sambu na bampusa ya bantu ya teritware. (Yoa. 13:34, 35) Yo yina, bampangi yina ketwadisa kisalu tamonisa bukatikati mpi zola sambu na kubaka desizio kana bampangi ya dibundu mosi fwete kwenda ntete to ve sambu na mwa ntangu fyoti na teritware yankaka.—Yak. 3:17, 18.
4. Inki mbikudulu ke na kulungana bubu yai?
4 Biblia kutubaka nde bantu ya bandinga ya kuswaswana tawa nsangu ya mbote. (Kus. 14:6, 7) Kana bansamuni ya bimvuka ti mabundu ya ndinga yankaka kesala na bumosi mpenza, bo tabebisa ve bikesa na bo kukonda mfunu, mpi bo tanunga na kuzabisa nsangu ya mbote na bantu mingi ya mpa ti bayina ketubaka ndinga yankaka.—Ef. 4:16.