Kuyedisa Teritware ya Bantu Yina Ketubaka Ndinga ya Banzenza

1. Inki dibaku beto kekutanaka ti yo na ntangu beto kesalaka kisalu ya kusamuna na teritware yina bo mepesaka beto?

¹ Yezu Kristu kutubaka na ntwala nde beto fwete samuna nsangu ya mbote na ntoto ya mvimba “bonso kimbangi na makanda yonso.” Konso muntu yina kesalaka kisalu ya kulonga mpi ya kusamuna kebakisa mfunu ya bangogo yai. (Mat. 24:​14, NW; 28:​19, 20) Ntangu beto kekwendaka kusamuna mpi kukumisa bantu balongoki, beto lenda kutana ti bantu ya bansi ya kuswaswana yina ketubaka ndinga mosi ve ti beto. Bo mpi kele ti dibaku ya kuwa nsangu ya Kimfumu mpi kubaka lukanu ya ngolo sambu na kyeleka na ntwala nde kilumbu ya nene ti ya boma ya Yehowa kukwisa. (Mal. 3:18) Inki mutindu beto lenda yedisa teritware yina bantu ketubaka ndinga ya banzenza ya kele na kati ya teritware yina bo mepesaka beto?

2. Na inki mutindu beto kelandaka mbandu ya Yehowa na ntangu beto kesolulaka ti bantu yina ketubaka ndinga yankaka?

² Tadila Bantu Yina Ketubaka Ndinga Yankaka Mutindu Yehowa Ketadilaka Bo: Sambu na kumonisila bantu yonso na teritware na beto zola ya Yehowa ya kukonda kupona pona, beto fwete vanda ti mpusa ya ngolo ya kusadisa bantu na kubaka nzayilu ya sikisiki ya Nzambi ya kyeleka, Yehowa, kukonda kutala ndinga yina bo ketubaka. (Nk. 83:18; Bis. 10:​34, 35) Ata beto ketulaka dikebi na beto ntete-ntete na bantu yina ketubaka ndinga ya dibundu na beto, beto fwete tula dikebi na bampusa ya bantu yina ketubaka ndinga yankaka mpi kusosa mitindu ya kuzabisa bo nsangu ya Kimfumu ya Nzambi. Kukonda kutudila bantu yina ketubaka ndinga yankaka dikebi tavanda ve na kuwakana ti lukanu ya Yehowa yina kele ya kuta kimbangi na bantu ya makanda yonso. Ebuna, nki mutindu beto lenda sadisa bantu yina ketubaka ve ndinga na beto?

3. Inki kisadilu ya mfunu bo mepesaka beto, mpi inki mutindu beto lenda yilama sambu na kusadila yo?

³ Sadila Kamukanda Une bonne nouvelle pour des gens de toutes nations: Bo salaka kamukanda yai sambu beto sadila yo na ntangu beto kekutana ti bantu yina ketubaka ndinga mosi ve ti beto. Vanda ti kamukanda yai ntangu yonso, yikana ti mambu na yo ya kuswaswana, mpi vanda ya kuyilama sambu na kusadila yo. Sambu na kuzwa ba referense nswalu, tula bidimbu na bandinga ya ketubamaka na teritware na nge. Kana mikanda na beto kele na bandinga yina, yo lenda vanda mbote na kubaka mwa ndambu ya mikanda yango sambu na kupesa muntu na nima ya kusadila nsangu yina kele na kati ya kamukanda.

4. Inki mutindu beto lenda sadila kamukanda Nations na kisalu na beto ya kusamuna?

⁴ Kana nge kutana ti muntu mosi na ntangu nge kesala kisalu ya kusamuna yina ketuba ndinga yankaka mpi nge kezaba ve nki ndinga yandi ketuba, yantika na kumonisa yandi lutiti ya zulu ya kamukanda. Balula lutiti ya zulu kisika karti ya ntoto ya mvimba kele, kudisonga musapi mpi songa musapi na kisika insi na nge kele, mpi songa yandi nde nge tazola kuzaba inki insi yandi mekatuka mpi inki ndinga yandi ketubaka. Na nima ya kuzaba ndinga yina yandi ketubaka, tala tansi ya malongi, sosa lutiti yina mefwana ya ketubila ndinga yina, twadisa dikebi ya muwi na nsa yina kele na zulu ya lutiti ya kele na bisono ya ndombe mingi, mpi monisa nde nge kezola nde muwi kutanga nsangu. Ntangu yandi memanisa kutanga, pesa yandi trakiti yina kele na ndinga na yandi to songisa yandi nsa yina kele na mukubu ya mwa ndombe yina ketuba nde nge tazola kuvutukila yandi ti mukanda mosi yina kele na ndinga na yandi. Na nima, songa yandi bangogo: “zina na mono” yina kele na bisono ya ndombe mingi, mpi tuba zina na nge pwelele. Songa yandi kisika yina bo mesonika “zina na nge” na bisono ya ndombe mingi, mpi kinga mvutu ya muwi. Baka bangidika sambu na kuvutuka dyaka.

5. Inki beto fwete sala na nima sambu na kusadisa bantu yina ketubaka ndinga yankaka ya kumonisaka dikebi?

⁵ Baka Bangidika Sambu na Kutala Bo: Beto fwete sala bikesa ya ngolo sambu na kutala bantu yina kemonisaka dikebi ya masonga na nsangu ya Kimfumu, kukonda kutadila ndinga na bo. Ntangu beto memona nde bo kesepela na Nzambi mpi na Ndinga na yandi, Biblia, beto fwete fulusa formilere Veuillez suivre l’intérêt (S-43) mpi kupesa yo nswalunswalu na sekretere ya dibundu sambu yandi tinda yo na biro ya filiale na mpila nde biro kutinda muntu mosi ya ketubaka ndinga ya muntu yina kumonisaka mpusa sambu na kutala yandi. Na nima, biro ya filiale tatinda formilere na kibuka yina ketubaka ndinga yina. Ntangu bo tabaka yo, bo takwenda kutala muntu yina kukonda kusukinina. Sekretere lenda pesa kopi ya formilere na nkengi na kisalu na mutindu yina yandi lenda zaba dikebi yina kibuka kemonisa na muntu yina. Beno fwete sadila formilere yai kaka kana muntu kesepela na masonga yonso na kyeleka.

6. Inki mukumba beto kele na yo kana beto kutana ti muntu mosi ya memonisa mpusa ya ketubaka ndinga yankaka?

⁶ Banda na ntangu ya beno mefulusa formilere S-43 tii na ntangu ya nsamuni ya bo mepona ya ketubaka ndinga ya muntu yango takwenda kutala muntu yango, mwa ntangu lenda luta. Yo yina, sambu na kuyedisa mpusa yina muntu kumonisaka, nsamuni yina kufulusaka formilere S-43 lenda landa na kuyedisa mpusa yina muntu kumonisaka tii kuna muntu yina ya bo mepona ya ketubaka ndinga ya muntu yango ta kwenda kutala yandi. Na bantangu yankaka, nsamuni yina lenda longuka Biblia ti muntu yina kumonisaka mpusa. Kansi, na ntangu yina, nki mutindu nsamuni lenda kuzwa mikanda na ndinga ya muntu yina kumonisaka mpusa?

7. Inki ngidika bo mesalaka sambu na kubaka mikanda na bandinga ya bantu yina beto kekutanaka ti bo?

⁷ Mikanda na Bandinga Yankaka: Mabundu fwete bumbaka ve stoki mingi ya mikanda yina kele na bandinga yankaka. Kansi, kana nkengi na kisalu memona nde kele ti mwa kibuka mosi ya ketubaka ndinga mosi buna ya kemonisa mpusa, yandi lenda mona nde yo mefwana na kuvanda ti stoki ya mwa mikanda yina kele na ndinga yina sambu nde bansamuni kusadila yo. Kana mikanda kele ve na dibundu, yo lenda vanda mbote nde bo lomba yo. Yo lenda baka mwa ntangu mingi sambu mikanda ya ndinga mosi buna kukuma na dibundu. Yo yina, mpila kele ya kunyema mikanda yina na nzila ya www.watchtower.org. Yo kele ti mikanda mingi yina kele na bandinga mingi kibeni yina bansamuni to bantu yina kemonisaka mpusa ya masonga lenda baka mbala mosi. Ntembe kele ve nde ngidika yai tasadisa sambu na kuyedisa mpusa yina bantu ya ketubaka ndinga yankaka kemonisaka.

8. Inki kele mukumba ya dibundu na yina metala kuyedisa mpusa yina bantu ya ketubaka ndinga yankaka kumonisaka?

⁸ Mukumba ya Dibundu: Bantangu yankaka, na bisika yina kimvuka ya bantu ya ketubaka ndinga ya nzenza kele mingi, yo lenda vanda ve ti dibundu ya penepene ya ketwadisaka balukutakanu na ndinga yina. Yo yina, beno fwete binga bantu yina ketubaka ndinga yankaka mpi ya kumonisaka mpusa na kukwisa na balukutakanu. Kuyamba bo na kyese mpi kutudila bo dikebi ya masonga lenda pesa bo kikesa ya kuvukana ti beno mbala na mbala. Na luyantiku, ndinga mpi mutindu ya kuzingila lenda kanga nzila: kansi, banzila kekangamaka ve sambu Bakristu ya kyeleka kezolanaka na bampangi ya ntoto ya mvimba ya Bambangi ya Yehowa. (Sof. 3:9; Yoa. 13:35) Keti nge ketubaka ndinga yankaka mbote-mbote? Kana nge ketubaka yo mpi nge kele ti luzolo ya kukwenda kutala bantu ya ketubaka ndinga yango, beto kelomba nge na kuzabisa sekretere ya dibundu na nge mpidina bo lenda zabisa biro ya filiale sambu na dyambu yai. Yo tavanda dyambu mosi ya mbote ntangu biro ya filiale tasosa nsamuni mosi sambu na kuyedisa mpusa yina.

9. Inki ntangu ngidika ya kulonguka ndinga yankaka lenda salama sambu bansamuni kubaka lusadisu, mpi inki mutindu yo fwete salama?

⁹ Kulonguka Ndinga Yankaka: Ntangu nge kesadisa bantu yina ketubaka ndinga yankaka, yo kele mbote na kusyamisa bo na kuyantika kukwenda na dibundu ya ndinga na bo kana mpila kele. Kansi, kana mpila kele ve, mwa bansamuni lenda baka lukanu ya kulonguka ndinga yankaka na mpila nde bo lenda vanda na makuki ya kupesa lusadisu ya mbote na bantu yina kumonisaka mpusa. Kana kele ve ti dibundu mosi na penepene, biro ya filiale lenda mona nde sambu kimvuka ya bantu yina mekatukaka na bansi ya banzenza kele ya nene, yo lenda vanda mfunu nde nzo-nkanda ya kulonguka ndinga yankaka kukanguka. Kana yo kele mutindu yai, biro ya filiale lenda zabisa mabundu yina kele penepene mpi kubongisa luzayisu mosi na yina metala nzo-nkanda mosi ya kulonguka ndinga. Bantu yina tapesa bazina sambu na kukota na nzo-nkanda yango fwete vanda ti lukanu ya kukwenda kuvukana kumosi ti kibuka to dibundu yango sambu na kuyedisa teritware ya bantu yina ketubaka ndinga ya banzenza.

10. Inki ntangu kimvuka mosi ya ketubaka ndinga ya nzenza lenda salama, mpi nki mutindu yo kesalamaka?

¹⁰ Mutindu ya Kusala Kibuka Mosi: Sambu nde kibuka mosi kusalama sambu na ndinga mosi buna, yo kelomba kulungisa mambu iya ya mfunu. (1) Bantu ya ketubaka ndinga yina na teritware fwete monisa mpusa mpi kumonisa nde kuyela lenda salama. (2) Mwa kibuka mosi ya bansamuni fwete zaba ndinga yango to kelonguka ndinga yango. (3) Nkuluntu to nsadi mosi ya kisalu ya mefwana muntu fwete vanda ya kuyilama sambu na kutwadisa lukutakanu na ndinga yina ata mbala mosi na mposo. (4) Kimvuka ya bankuluntu fwete vanda ti luzolo ya kupesa maboko na kimvuka yina. Ntangu mambu yai yonso melungana na kiteso mosi ya mefwana, kimvuka ya bankuluntu ta sonikila biro ya filiale na yina metala mambu ya ketadila kibuka yina mpi bo ta tindila bo mukanda sambu kimvuka yango kuzabana bonso dibundu mosi ya kepesa maboko na kimvuka mosi ya ndinga ya nzenza. (Tala mukanda Beto Mevukana, balut. 106-107.) Nkuluntu to nsadi ya kisalu yina ketwadisa nzo-nkanda lenda vanda bonso “nkengi ya kimvuka” to “nsadi ya kimvuka” yina tavanda na mukumba ya kukeba kimvuka yina.

11. Sambu na inki yo kele dibaku na kuyedisa teritware ya bantu yina ketubaka ndinga ya banzenza ya kele na teritware yina bo mepesaka beto?

¹¹ Kuyedisa teritware ya bantu yina ketubaka ndinga ya banzenza na kati ya teritware yina ya bo mepesaka beto kele kitini mosi ya mfunu ya kampanie ya kisalu ya kusamuna yina kesalama na ntoto ya mvimba yina Yezu Kristu, Mbandu na beto kuyantikisaka. Bika beto sala dikabu na beto na kikesa yonso mpi beto tala mutindu Yehowa kelanda na kunikisa makanda mpi kubenda bima ya mfunu na kukwisa na yandi. (Agai 2:⁠7) Beto kele ti kyese ya kusala kumosi na ntima na beto ya mvimba sambu na kulungisa mukumba yai! Bika Yehowa kusakumuna bikesa na beto ya kimvuka sambu na kuyedisa teritware ya bantu yina ketubaka ndinga ya banzenza na konso teritware na beto, na ntangu beto keyibuka ntangu yonso nde kukonda kutadila mambu yina kekangaka bandinga nzila, Nzambi lenda yedisa yo! ​—⁠1 Kor. 3:​6-9.