Kampanye ya Sipesiali ya Trakiti Yina Tasalama na Oktobri 20–Novembri 16!
1 Banda na Kintete, Oktobri 20, na nsungi ya bamposo iya ya mvimba, beto takabula trakiti ya mpa ya kele na ntu-dyambu Keti Nge Tazola Kuzaba Kyeleka? Beto ketula ntima nde kampanye yai ya sipesiali ya tasalama na ntoto ya mvimba tapusa bantu mingi na kutula dikebi na nto kaka mosi ya kyeleka.—Yoa. 17:17.
2 Trakiti yango kepesa bamvutu ya sikisiki ya Biblia na bangyufula sambanu ya mfunu: “Keti Nzambi kekudibanzaka mpenza sambu na beto?” “Keti kilumbu kele bitumba ti bampasi tasuka?” “Inki kekuminaka beto kana beto mefwa?” “Keti kivuvu kele sambu na bafwa?” “Inki mutindu mu lenda samba Nzambi mpi yandi kuwidikila munu?” mpi “Inki mutindu mu lenda zwa kyese ya kyeleka na luzingu?” Bantwadisi ya mabundu mepesaka ntete ve bamvutu ya mbote na bangyufula yai. Ata bantu mingi yina ketubaka ve nde bo kele Bakristu mekudiyulaka bangyufula yai, kansi mbala yankaka bo kezabaka ve nde bamvutu ya pwelele kele na Biblia. Yo yina, nsangu yai fwete sepedisa bantu mingi.
3 Mutindu ya Kusala Teritware na Nge: Sala kikesa na kusala teritware na nge ya nzo na nzo. Kana nge kele ti teritware ya nene, bankuluntu lenda syamisa nge na kubikila bantu yina kele ve na banzo na bo kopi mosi ya trakiti na mbala ya ntete. Kuvila ve na kupesa trakiti yango na bamfinangani na nge, na bantu ya dibuta na nge, na banduku ya kisalu to ya nzo-nkanda, mpi na bantu yankaka yina nge kesolulaka ti bo mbala na mbala. Ziku nge lenda kudibongisa sambu na kusala bonso mupasudi-nzila nsadisi na Oktobri to na Novembri. Keti nge kele ti mwana to longoki mosi ya Biblia yina keyela mbote na kimpeve mpi yina lenda lungisa mambu ya bo kelombaka sambu na kukuma nsamuni ya mebakaka ntete ve mbotika na kuvukana ti beto na kampanye yai ya sipesiali? Kana yo kele mpidina, zabisa bankuluntu.
4 Inki Nge Lenda Tuba: Sambu na kuzabisa bantu mingi nsangu yina, yo tavanda mbote nde bangogo na nge ya kukotila na masolo kuvanda nkufi. Yula bawi ngyufula mosi na kati ya bangyufula sambanu yina kele na lutiti ya zulu mpi songa bo mvutu yina kele na kati ya trakiti. Yo tasadisa bansamuni yonso na kuwakanisa bangogo na bo ya kukotila na masolo ti bampusa ya teritware na bo. Kana muntu mosi kumonisa mpusa, sonika zina ti adresi na yandi mpi vutukila yandi. Na bawikendi, beto lenda kabula baperiodike ya mpa kumosi ti trakiti. Kampanye tamana na Novembri 16, ebuna beto takabula mukanda Biblia Kelongaka. Beto tasadila batrakiti yina tabikala mutindu beto kesadilaka batrakiti yonso yankaka.
5 Yantika Kulonguka Biblia ti Muntu Mosi: Bo mesala trakiti yai mingimingi sambu yo sadisa beto na kuyantika kulonguka Biblia ti bantu. Ntangu nge kevutukila muntu mosi yina kumonisaka mpusa, nge lenda yula yandi nki kyeleka ya Biblia kepesaka yandi kikesa? Benda dikebi na yandi na lutiti ya nsuka kisika bo ketubila ngidika na beto ya kulonguka Biblia ti bantu, mpi pesa yandi kopi mosi ya mukanda Biblia Kelongaka. Kana mpila kele, beno tadila na bunkufi paragrafe mosi to zole ya kapu yina ketubila mambu mingi ya disolo yina yandi mepona.
6 Yehowa kesosa bantu yina tasambila yandi “na mpeve mpi na kyeleka.” (Yoa. 4:23, NW) Bika nde beto yonso kuvukana na kampanye yai ya sipesiali sambu na kusadisa bankaka na kuzaba kyeleka!