Na nsi ya luyalu ya Nzambi, bima yonso yina yandi salaka vandaka na bumosi mpi na ngemba

Sambu na Nki Beto Kele ti Mfunu ya Kimfumu ya Nzambi?

Banda na luyantiku ya disolo ya luzingu ya bantu, Ngangi na beto, yina zina na yandi kele Yehowa vandaka kuyala kaka yandi mosi. Yandi vandaka kuyala bantu na zola yonso. Yandi salaka kisika mosi ya kitoko, disongidila kilanga ya Edeni, sambu bantu kuzinga na kati. Yandi pesaka bo mpi madia mingi. Diaka, yandi pesaka bantu kisalu mosi ya kitoko. (Kuyantika 1:28, 29; 2:8, 15) Bantu zolaka kuvanda na ngemba kana bo landaka kubikala na nsi ya luyalu ya zola ya Nzambi.

Adami me simba dimbuma yina Nzambi buyisaka bo na kudia ya Eva me pesa yandi. — Bantu ya ntete buyaka nde Nzambi kuvanda Mfumu na bo

Biblia ke monisa nde Satana Diabulu, wanzio yina lemfukilaka ve Nzambi tubaka nde Nzambi kele ve ti nswa ya kuyala bantu. Yandi tubaka diaka nde bantu ta vanda na kiese kukonda lutwadisu mpi luyalu ya Nzambi. Diambu ya mawa kele nde bibuti na beto ya ntete, Adami ti Eva landaka luvunu ya Satana mpi bo lemfukilaka ve Nzambi.—Kuyantika 3:1-6; Kusonga 12:9.

Mutindu Adami ti Eva buyaka nde Nzambi kuvanda Mfumu na bo, bo vidisaka Paladisu kisika yina bo vandaka mpi kivuvu ya kuzinga mvula na mvula na sante ya kukuka. (Kuyantika 3:17-19) Lukanu yina bo bakaka nataka mpi bampasi na bana yina bo butaka. Biblia ke tuba nde sambu Adami salaka disumu, “disumu kotaka na nsi-ntoto. mpi lufwa na nzila ya disumu.” (Baroma 5:12) Disumu me nataka mpasi yai ya nkaka: “Muntu me yalaka muntu sambu na kupesa yandi mpasi.” (Longi 8:9) Na kutuba ya nkaka, ntangu bantu ke yalaka, bampasi ke kumaka kaka mingi.

BANTU ME YANTIKA KUYALA

Nimrodi me telama na lulendo yonso. Na nima na yandi, bantu ke tunga nzo ya nene. — Nimrodi teleminaka Yehowa

Muntu ya ntete yina yantikaka kuyala bantu mpi yina Biblia ke tubilaka vandaka Nimrodi. Yandi teleminaka luyalu ya Yehowa. Banda na bilumbu ya Nimrodi, bantu yina ke vandaka ti kiyeka ke sadilaka yo sambu na kuniokula bantu ya nkaka. Kiteso ya bamvula 3 000 me luta, ntotila Salomo sonikaka nde: “Mono monaka mansanga ya bantu yina bo ke monisa mpasi, kansi muntu ya kulembika bo vandaka ve. Bantu yina ke monisa bo mpasi kele ti kiyeka.”—Longi 4:1.

Bubu yai mpi, mambu yango ke landa kusalama. Na 2009, mukanda mosi ya Nations Unies tubaka nde kuyala bantu na mutindu ya mbi kele “na kati ya bikuma ya nene yina ke salaka nde mambu ya mbi kusalama na ntoto bubu yai.”

NTANGU ME LUNGA SAMBU KIMFUMU YA NZAMBI KUYALA

Na ntoto ya mvimba, bantu kele ti mfunu ya bamfumu ya mbote mpi ya luyalu ya mbote. Mpi yo kele diambu yina Ngangi na beto me silaka.

Bifwanisu ya ke monisa bampasi yina luyalu ya bantu me nataka. 1. Nkento mosi ya Azia me vanda na ntoto na nzila mpi yandi me baka mwana na yandi ya ke dila na maboko. 2. Bakala mosi ke bela mpi me lala na mbeto ya opitale. 3. Basoda ke bula minduki ntangu bo ke nwana bitumba. 4. Kimvuka mosi ya bantu yina kele na makasi ke tula makelele mpi ke tambula ti bapankarte. 5. Nkento mosi ti mwana na yandi ya nkento me telema na nganda mpi ke tala mutindu vitre ya porte na bo me pasuka. 6. Mbanza mosi ya kufuluka ti midinga; yo kele ti batiyo yina ke basisa midinga mpi bansinga ya kura ya ngolo. — Ata baluyalu ya mbote ya bantu me kukaka ve kumanisa bampasi ya ngolo yina bantu ke kutanaka ti yo

Nzambi me tulaka Kimfumu, to luyalu mosi yina ta baka kisika ya bimfumu yonso ya bantu mpi “yo mpamba ta bikala kimakulu.” (Daniele 2:44) Yo kele Kimfumu yina bantu mingi ke sambaka sambu na yo. (Matayo 6:9, 10) Kansi Nzambi ta yala ve yandi mosi. Yandi me ponaka muntu mosi yina zingaka na ntoto sambu na kuvanda Mfumu. Nani kele muntu yango?