Mutindu ya Kudibongisa Sambu na Lukutakanu ya Kisalu

1. Inki kele lukanu ya Lukutakanu ya Kisalu, mpi nki mutindu beto lenda bakila yo mambote mingi?

¹ Lukanu ya Lukutakanu ya Kisalu kele ya kusadisa beto na kusala kisalu ya kusamuna ya kebuta mbuma. Lukutakanu yai ketubilaka mingi kisalu ya kusamuna nsangu ya mbote ya Kimfumu, ya kukumisa bantu balongoki, mpi ya kuzabisa ndola ya Nzambi yina mefinama. (Mat. 28:20; Mar. 13:10; 2 Pie. 3:⁠7) Beto kebakaka mambote mingi na lukutakanu yai ya mfunu kana beto mekudibongisa mbote mpi kele ya kuyilama sambu na kupesa bakomantere.

2. Inki mutindu beto lenda kudibongisa sambu na kuwidikila diskure?

² Diskure: Kisina ya malongi na yo kevandaka mingimingi na bantuma yina bo kepesaka mutubi. Beno lenda vutukila malongi ya bo mepesa, yika mpi baverse yina bo mevutukila ve bangogo na yo, mpi kuyindula mutindu beno lenda sadila malongi yango na kisalu ya kusamuna.

3. Inki beto lenda sala sambu na kubongisa disolo na bangyufula mpi bamvutu?

³ Disolo na Bangyufula mpi Bamvutu: Kitini yai fwete twadisamaka bonso kulonguka ya Nzozulu ya Nkengi, ti bangogo ya nkufi ya luyantiku mpi ya nsuka. Tenda bangindu ya mfunu ya konso paragrafe, mpi kudibongisa sambu na kupesa bakomantere ya nkufi ya kemonisa mfunu ya mambu yina beno ketadila.

4. Inki mutindu beto lenda kudibongisa sambu na disolo ti bawi?

⁴ Disolo ti Bawi: Mutubi fwete sala kitini yai bonso diskure, kansi yandi talomba bawi na kupesa bamvutu. Kana nge tenda bangindu ya mfunu mpi kutala baverse yina bo mevutukila ve bangogo na yo, nge lenda pesa bakomantere ntangu mutubi keyula bangyufula. Mpangi yina tasala kitini yai fwete sala kikesa sambu na kupesa bawi nzila ya kutubila bangindu ya mfunu.

5. Inki lenda sadisa beto na kubaka mambote mingi na bansonga?

⁵ Bansonga: Masolo yankaka tavanda ti bansonga ya mbote ya kemonisa mutindu beno lenda sadila na teritware na beno malongi ya beno metadila. Bo lenda lomba bankuluntu to bansamuni ya kele ti eksperiansi to bapasudi-nzila na kusala bansonga. Ntangu nge kebongisa disolo yai nge lenda yindula mpi mutindu yina bansonga tasalama. Ntangu bo kesala nsonga na kulanda mbandu ya bangogo ya kukotila na masolo ya bo kepesaka beto, yindula mutindu nge lenda tuba yo na bangogo na nge mosi mpi kuwakanisa yo ti bawi ya kuswaswana. Zikisa nde nge menata mukanda to periodike yina bo tasadila na nsonga. Na nkokila ya Lusambu ya Dibuta, yo lenda vanda mbote nde beno sadisa bansonga yankaka na kati ya bansonga yai.

6. Sambu na nki beto fwete kudibongisa sambu na Lukutakanu ya Kisalu?

⁶ Lukutakanu ya Kisalu kepesaka kyese mpenza ntangu beto kekudibongisaka mpi keyindulaka na ntwala malongi ya mbote yina tapesama. Kana beto sala mutindu yina, beto tapesana mpenza kikesa. (Roma 1:​11, 12) Kana beto baka ntangu ya kudibongisa sambu na Lukutakanu ya Kisalu, beto tavanda ya kukuka mpenza sambu na kulungisa mukumba na beto.​—⁠2 Tim. 3:⁠17.