Bantuma Sambu na Bantu Yina Kesalaka Masolo na Lukutakanu ya Kisalu

Yantika na nimero yai ya Kisalu na Beto ya Kimfumu, bo mesoba bangogo ya manaka ya Lukutakanu ya Kisalu. Bantuma mpi bangibusa ya kelanda tasoba mpi tatendula pwelele mambu yina bo tubilaka na disolo “Mutindu ya Kudibongisa Sambu na Lukutakanu ya Kisalu,” yina kubasikaka na Kisalu na Beto ya Kimfumu ya Mayi 2009.

◼ Diskure: Yo kele disolo ya mekatuka na malongi ya bo mepesa yina kelombaka ve nde bawi kupesa bamvutu. Mutubi fwete tula dikebi na mambu yina tavanda mfunu sambu na dibundu.

◼ Disolo na Bamvutu mpi na Bangyufula: Yo kele mpenza bonso disolo ya Kulonguka ya Nzozulu ya Nkengi, kitini yai kele ti bangogo ya nkufi mpenza ya luyantiku mpi ya nsuka, mpi beno fwete yula bangyufula ya baparagrafe yonso. Ntwadisi fwete buya kutuba mingi. Beno lenda tanga baverse ya mfunu kana ntangu kele. Beno tatanga baparagrafe kaka kana bantuma melomba beno na kusala mpidina.

◼ Disolo ti Bawi: Yo kele disolo ya kelombaka nde bawi yankaka kupesa bamvutu. Yo kele diskure kaka ve, mpi yo kele ve disolo ya bamvutu na bangyufula.

◼ Bansonga mpi Bainterview: Bantuma ya kusala nsonga ketendula nde mpangi yina bo mepesa kitini yai kele ti mukumba ya kusadisa nsonga na disolo na yandi; yandi ve muntu tasala nsonga yina. Bantu yina yandi tapona sambu na kusadisa yandi fwete vanda na makuki ya kusala yo mpi kuvanda bantu ya kepesaka mbandu ya mbote, mpi kana mpila kele yandi fwete baka bangidika ya mbote na ntwala ti bo. Yo kele mbote na kusadila ve bansamuni ya mpa mpi bayina kele ti eksperiansi fyoti sambu na kumonisa mutindu kisalu fwete salama kaka sambu na kupesa bo dibaku ya kumata na estrade, ata bo lenda sadila bo bonso bawi. Bansamuni yina kesala bansonga fwete tula dikebi na bo na kutala bawi. Ntangu beno keyula bangyufula na bantu yina tasala interview bo fwete pesa bamvutu na bo na estrade kansi ve na bisika na bo ya kuvanda. Beno fwete bongisa mbote bansonga mpi bainterview. Kana ntangu ya kumanisa lukutakanu mebikala fyoti mpi mpangi mosi fwete fyotuna kitini na yandi, yandi takatula ve nsonga to interview. Na ntwala ya kupona bantu yina tasala bansonga to interview, bansadi ya kisalu fwete pona kumosi ti mutambusi ya kimvuka ya bankuluntu to ti nkuluntu yankaka.

Kana kitini mosi kele ti bantuma ya sipesiali, beno fwete sadila bantuma yina mbote-mbote. Kana beno sala masolo ya Lukutakanu ya Kisalu mutindu pula na yo memonisa yo na zulu, bampangi-babakala tapesa maboko na Lukutakanu ya Kisalu yina tasalama “na nzila ya mbote ti ya luzitu.”—1 Kor. 14:40.