Kudibongisa Mbote Sambu na Kulonga
1. Sambu na nki beto fwete pusa longoki na kusepela na kyeleka ntangu beto kelonguka Biblia ti yandi?
1 Na ntangu beto kelonguka Biblia ti muntu, beto fwete kudibongisa mbote kana beto kezola kupusa longoki na kusadila Yehowa. Beto fwete sala bikesa ya ngolo sambu na kusadisa longoki na kusepela ti kyeleka ya Biblia. Kusala mutindu yai tapesa longoki kikesa ya kusala yo. (Kul. 6:5; Bing. 4:23; 1 Kor. 9:26) Kansi, inki mutindu beto lenda sala yo?
2. Inki mutindu kisambu lenda sadisa beto na kubongisa kulonguka ya Biblia?
2 Samba Ntangu Nge Kekudibongisa: Sambu Yehowa muntu kesalaka nde nkeni ya kyeleka kuyela na ntima ya longoki, yo mefwana nde, na ntwala ya kuyantika kudibongisa sambu na kulonguka, beto samba mingimingi sambu na longoki mpi bampusa na yandi ya sikisiki. (1 Kor. 3:6; Yak. 1:5) Kisambu ya mutindu yina lenda sadisa beto mpi na kuzaba mutindu beto lenda sadisa yandi dyaka sambu na kufulusa ntima na yandi ti “nzayilu ya kyeleka” ya luzolo ya Yehowa.—Kol. 1:9, 10, NW.
3. Inki mutindu beto lenda kudibongisa na kuyindulaka longoki?
3 Tadila Longoki: Yezu kuzabaka nde sambu kisalu ya kulonga kubuta mbuma yo kelombaka kuyindula bawi. Na baokazio zole, bo yulaka Yezu ngyufula kaka mosi: “Nki mono fweti sala sambu na kubaka moyo ya mvula na mvula?” Na konso ntangu ya yandi pesaka mvutu, yandi sadilaka mambu ya kuswaswana sambu na kupesa mvutu. (Luka 10:25-28; 18:18-20) Beto fwete yindula longoki ntangu beto kekudibongisa. Inki baverse ya bo mevutukila ve bangogo na yo beto tatanga ti yandi? Inki kiteso ya malongi beto lenda longuka ti yandi? Inki bangindu ya kele na disolo longoki lenda mona mpasi na kubakisa to kundima? Kana beto lenda tadila na ntwala bangyufula yina longoki lenda yula, beto takudibongisa mbote sambu na kupesa yandi bamvutu ya mefwana.
4. Kudibongisa mbote kelombaka inki?
4 Vutukila Malongi: Ata beto melongukaka dezia mambu yango mbala mingi, yo tavanda mbala ya ntete ya beto talonguka yo ti longoki yai. Kana beto kezola kusimba ntima na yandi, yo kele mfunu nde beto kudibongisa mbote sambu na konso kulonguka. Yo ketendula kusala mambu yina beto kesyamisa longoki na kusala. Vutukila malongi, tanga mpi baverse yina bo mevutukila ve bangogo na yo, na kuyindulaka longoki, mpi ziku kutenda bangindu ya mfunu.—Roma 2:21, 22.
5. Inki mutindu beto lenda landa mbandu ya Yehowa?
5 Yehowa kekudibanzaka mpenza sambu na kuyela ya konso longoki ya Biblia. (2 Pie. 3:9) Kana beto kebaka ntangu ya kudibongisa sambu na konso kulonguka ya Biblia, beto tamonisa dikebi ya zola ya mutindu mosi.