Keti Nge Lenda Yedisa Kisalu na Nge?

1. Inki mpusa ya ngolo beto kele na yo na kisalu ya bilanga, mpi sambu na inki?

¹ Ntangu yandi monaka nde bantu mingi kesepela na nsangu ya mbote ya Kimfumu, Yezu kulongisilaka balongoki na yandi na kubondila “munkwa-bilanga na kutinda bantu ya nkaka ya kisalu sambu na kukatula bambuma na yandi.” (Mat. 9:​37, 38) Sambu beto kele na bangunga ya nsuka ya nsungi ya kukatula bambuma, ntangu yai beto fwete sala kisalu na beto kukonda kusukinina mpenza. Yo ketendula nde beto fwete tadila na kisambu mutindu beto lenda sala mingi mpenza na kisalu ya bilanga.​—⁠Yoa. 14:​13, 14.

2. Inki bantu mingi kusalaka ntangu bo waka nde bo kesosa bansadi mingi na kisalu ya bilanga?

² Kuyedisa Kisalu ya Kusamuna: Ti lutwadisu mpi lusadisu ya Yehowa, bantu mingi mekukaka kuyantika kisalu ya kimupasudi-nzila. (Nk. 26:​2, 3; Filp. 4:⁠6) Bankaka kesalaka kikesa mingi sambu na kusala bonso bapasudi-nzila nsadisi sambu na ngonda mosi to bangonda mingi konso mvula. Dyambu yai kele mutindu mosi ya mbote ya kuyedisa kisalu na bo ya kusamuna. Kyese yina kisalu yai kepesaka bo, kesalaka nde mingi na kati ya bapasudi-nzila nsadisi kukuma bapasudi-nzila ya ntangu yonso.​—⁠Bis. 20:35.

3. Kana nge mesalaka dezia kisalu ya kimupasudi-nzila, inki nge lenda tadila ntangu yai?

³ Keti Nge Lenda Vutukila Kisalu ya Kimupasudi-Nzila?: Kana na nsungi mosi buna nge salaka bonso mupasudi-nzila, ntembe kele ve nde nge keyindulaka mambu ya kitoko ya ntangu yina. Keti nge meyindulaka na kisambu sambu na kutala kana nge lenda kuma dyaka mupasudi-nzila? Mbala yankaka mambu yina kupusaka nge na kuyambula kisalu ya kimupasudi-nzila kekangaka nge dyaka ve nzila na kusala kisalu yai. Ziku ntangu melunga sambu nge vutukila kisalu yai ya sipesiali.​—⁠1 Yoa. 5:​14, 15.

4. Inki dibaku ya meluta mabaku yonso beto kele na yo?

⁴ Kisalu ya kukatula bambuma ke na kusalama mbote mpi ntama mingi ve yo tasuka. (Yoa. 4:​35, 36) Bika nde beto yonso kutadila luzingu na beto ya ntangu yai sambu na kuzaba kana beto lenda soba bisalu na beto ya konso kilumbu sambu beto kuma kusala mingi na kisalu ya bilanga. To kana beto mona na masonga yonso nde beto lenda kuka ve na kuyedisa kisalu na beto, keti beto lenda sosa mitindu ya kusala kisalu yango mbote-mbote? (Mar. 12:​41-44) Bantu yonso yina luzingu na bo kepesa bo nzila sambu Yehowa kusadila bo na kisalu yai ya meluta bisalu yonso kele mpenza ti dibaku ya nene ntangu yai!​—⁠Nk. 110:⁠3.