Lukutakanu ya Nzyunga Yina Tasadisa Beto na Kutanina Kimpeve na Beto
1. Inki kele mutindu mosi yina Yehowa kesadisaka beto na kulungisa kisalu na beto ya kumwanga nsangu ya mbote?
1 Yehowa kepesaka beto na luzolo yonso bansangu, formasio, mpi kikesa yina beto kele na yo mfunu sambu na kulungisa kisalu yina yandi mepesaka beto ya kumwanga nsangu ya mbote. (Mat. 24:14; 2 Tim. 4:17) Lukutakanu na beto ya nzyunga ya kesalamaka konso mvula kele mutindu mosi ya beto lenda baka mambu yina. Manaka ya mpa ya mvula ya kisalu 2010 tatubila ntu-dyambu yai, “Tanina Kimpeve na Nge,” ya mesimbama na Roma 8:5 mpi Yude 17-19. Yo tayantika na mposo ya Augusti 31, 2009.
2. (a) Na nki mitindu lukutakanu ya nzyunga tanatila beto mambote? (b) Inki mutindu balukutakanu ya nzyunga ya melutaka mesadisaka nge na kisalu ya bilanga?
2 Mutindu Yo Tanatila Beto Mambote: Lukutakanu yina takebisa beto na yina metala bigonsa, bonso bansaka ya kulutisila ntangu yina keyibaka ntangu na beto mpi kekatulaka dikebi na beto na mambu yina kele mpenza mfunu. Beto talonguka mutindu ya kununga kikalulu ya kupesa nzila na mambu yonso, mpi beto tatadila mambu yina yo kelomba sambu na kuvanda muntu ya kimpeve. Diskure ya bitini mingi ya Lumingu tamonisa mambu yina bantu bo mosi mpi mabuta lenda sala sambu na kukumisa kimpeve na bo ngolo na ntangu bo kekutana ti bupusi mpi mimekamu ya ngolo ya lukwikilu. Lukutakanu yango tasadisa beto na kutanina ntima na beto ti mavimpi na beto ya kimpeve, mpi na kuvila ve ata fyoti balusakumunu ya nene yina kevingila bantu yina ketaninaka kimpeve na bo.
3. Lukutakanu na beno ya nzyunga ya kekwisa tasalama na nki dati, mpi inki fwete vanda lukanu na nge?
3 Ntangu nge tazaba dati mpi kisika yina lukutakanu na beno ya nzyunga yina kekwisa tasalama, yantika kubaka bangidika sambu nge kwenda na lukutakanu yango mpi nge landa na dikebi yonso bitini yonso na bilumbu yonso zole. Beto kendimisa nge nde Yehowa kesakumunaka bantu yina keyindulaka mbote-mbote.—Bing. 21:5.
4. Beto kele ti kivuvu ya kubaka nki na lukutakanu na beto ya nzyunga yina kekwisa?
4 Ya kyeleka, Yehowa kele Mupesi ya dikabu yai ya mbote. Lukutakanu yai ya kimvuka ya mpika ya kwikama meyidika tavanda mpenza kima yina beto kele na yo mfunu sambu na kulungisa kisalu na beto bonso baministre ya Bakristu. Beto kepesa Yehowa matondo sambu na bangidika na yandi yonso ya zola yina kesadisa beto na ‘kusimba ngolo’ kimbangi ya kivuvu na beto na ntwala ya bantu yonso kukonda kutekita.—Baeb. 10:23-25; Yak. 1:17.