Tanina Mabanza na Nge
1. Inki kele ntu-dyambu ya lukutakanu ya nzyunga sambu na mvula ya kisalu 2013, mpi nki kele lukanu ya manaka yina?
1 Yezu syamisaka balongoki na yandi na kuzola Yehowa na ntima, moyo, mpi mabanza na bo yonso. (Mat. 22:37, 38) Mvula yai, bo mesala manaka ya lukutakanu ya distrike, ya nzyunga, mpi ya sipesiali sambu na kusadisa beto na kukumisa kimuntu na beto ya kati ngolo. Mutindu nge keyibuka, ntu-dyambu ya lukutakanu na beto ya distrike vandaka, “Tanina Ntima na Nge!” Ntu-dyambu ya manaka ya lukutakanu ya sipesiali ya kilumbu mosi sambu na mvula ya kisalu 2013 kele “Tanina Kansansa na Nge.” Mpi balukutakanu ya nzyunga yina tayantika na ngonda yina kekwisa tavanda ti ntu-dyambu, “Tanina Mabanza na Nge;” yo mesimbama na Matayo 22:37. Lukanu ya manaka yai kele ya kusadisa konso muntu na kati na beto na kutadila mabanza na yandi na mpila nde yo sepedisa dyaka Yehowa mingi.
2. Beto fwete sosa bamvutu na nki bangyufula ntangu manaka kesalama?
2 Mambu Yina Bo Tatubila: Ntangu beto kelanda lukutakanu ya nzyunga, beto fwete sosa bamvutu na bangyufula yai, ya kemonisa mambu ya mfunu:
• Inki mutindu beto lenda buya ‘mabanza ya kimuntu’?
• Inki mutindu beto lenda pesa maboko na kisalu ya kukatula lele yina mefikaka mabanza ya mimpani?
• Inki mabanza beto fwete vanda ti yo?
• Inki kele mambote ya kuyindulula mbote?
• Inki mutindu beto lenda pesa Yehowa nzila ya kuyidika mabanza na beto?
• Inki mutindu babakala, bankento, bibuti mpi bana lenda sala nde dibuta kuvanda na kyese?
• Inki mutindu beto lenda vanda ya kuyilama sambu na kilumbu ya Yehowa?
• Kuyidika mabanza na beto sambu na kisalu ketendula inki?
• Inki mambote bantu yina kesadilaka mambu ya bo kelongukaka kebakaka?
3. Sambu na nki yo kele mfunu nde beto vanda bilumbu yonso zole ya lukutakanu ya nzyunga, beto tula mpenza dikebi, mpi beto sadila mambu yina beto kelongukaka?
3 Satana ke na kusala bikesa sambu na kubebisa mabanza na beto. (2 Kor. 11:3) Kansi, beto fwete sala ngolo sambu na kuyala mabanza na beto na mpila nde yo sepedisa Yehowa. Beto fwete landa na kumonisa mabanza ya Kristu mpi kutelamina bupusi ya nsi-ntoto yai ya kezitisaka ve nsiku. (1 Kor. 2:16) Yo yina, beto baka bangidika sambu na kuvanda na bilumbu yonso zole ya lukutakanu ya nzyunga. Beto tula mpenza dikebi. Kusadila mambu ya mfunu yina bo tatubila tasadisa beto na kubongisa mabanza na beto sambu na kusala kisalu ya Kimfumu ti kikesa.—1 Pie. 1:13.