Kumisa Yehowa Konso Kilumbu

1. Bo kesyamisa bansadi ya Nzambi na kusala nki, mpi sambu na nki?

¹ Ntotila Davidi kumonisaka lukanu na yandi ya kukumisa Yehowa “konso kilumbu,” ata nkutu kimakulu. (Nk. 145:​2, 7, 21) Beto mpi kele ti bikuma ya mbote ya kukumisa Yehowa konso kilumbu.​—⁠Nk. 37:10; 145:​14, 18; 2 Pie. 3:⁠13.

2. Inki mutindu mabuta mingi kekumisaka Yehowa konso kilumbu?

² Na Nzo na Beto: Beto kele ti mikanda ya ketungaka yina kesadisaka beto na kuvanda ti masolo ya mbote ya kimpeve na ntangu beto ketadilaka mukapu ya lumbu, kesalaka Lusambu ya Dibuta, mpi kebongisaka balukutakanu ya dibundu. Mabuta mingi kevandaka ti kikalulu ya kudya kumosi kiteso ya mbala mosi konso kilumbu. Kusala mpidina kesadisaka bo na kuta malembe-malembe masolo ya mbote mpi yo kepesaka bo mabaku ya kukumisa Yehowa. Masolo ya mutindu yai ya ketubilaka bantu-dyambu yina bibuti kebasisaka lenda sadisa mpenza bibuti na kusansa bana na bo “na malongi mpi balukebisu ya Yehowa.”​—⁠Ef. 6:​4, NW; Kul. 6:​5-7.

3. Inki mabaku beto kevandaka na yo ntangu beto kevandaka ti bampangi na beto?

³ Ti Bampangi na Beto: Ntangu beto kevandaka na kisalu ya bilanga to na balukutakanu ya dibundu, beto kevandaka ti mabaku ya mbote ya kukumisa Yehowa kumosi ti bampangi na beto Bakristu. (Bing. 15:30; Filp. 4:8; Baeb. 13:15) Sambu beto yonso kezolaka Yehowa, yo fwete vanda pete na ntangu beto kesolula ti bo na kukotisa bangogo ya kemonisa ntonda na beto ya masonga sambu na mambote ya Yehowa.​—⁠Nk. 106:⁠1.

4. Na nki mabaku nge lenda kumisa Yehowa?

⁴ Ntangu Beto Kesolula ti Bantu Yina Kele Ve Bakristu: Ata mambu yankaka lenda pesa beto ve nzila ya kusamuna konso kilumbu, kusolula ata masolo ya nkufi ti bantu yina beto kesalaka ti bo, bana ya nzo-nkanda na beto, mpi bantu yankaka ya kezingaka na nzyunga na beto mambu ya metala Yehowa mpi balukanu na yandi, lenda pesa bantu ya ntima-masonga kivuvu. (Nk. 27:14; 1 Pie. 3:15) Ntangu yandi vandaka kusala nzyetelo na avio, mpangi-nkento mosi kutaka kimbangi na muntu mosi. Muntu yango kubakaka kikesa na mambu yina yandi waka, ebuna yandi pesaka mpangi-nkento adresi mpi nimero na yandi ya telefone na mpila nde bo landa na kusolula. Sambu bantu ya nsi-ntoto kenyokwama na bampasi yina kekuma kaka mingi mpi na mutindu mambu kelanda na kubeba, bantu ya Yehowa kelanda na kunata “nsangu” ya mbote ya kima mosi ya kuluta mbote na bantu yina kele na luzolo ya kuwa. Yo kepesaka bantu yankaka kivuvu mpi kepusaka bo na kukumisa Yehowa.​—⁠Yez. 52:7; Roma 15:⁠11.

5. Sambu na nki beto kele na mpusa ya kukumisa Yehowa, mpi yo lenda lungisa inki?

⁵ Yo kepesaka Yehowa kyese mingi ntangu yandi kewaka bansadi na yandi kekumisa yandi konso kilumbu! Bonso lugangu ya Yehowa ya kemonanaka mpi ya mezyunga beto, beto mpi lenda kumisa yandi konso kilumbu na banzo na beto, na dibundu, mpi ntangu beto kesolula na bantu yankaka yina kepesaka ve Yehowa lukumu kumosi ti beto.​—⁠Nk. 19:​2-5.