Nunga Mpasi ya Kuta Kimbangi na Babakala
1. Beto kele ti nki mpusa ya ngolo na yina metala kukeba mambote ya Kimfumu?
1 Mutindu kisalu ya Kimfumu ke na kuyela na bilumbu yai ya nsuka, beto kele mpenza ti mpusa ya ngolo ya babakala ya kufwana na kimpeve sambu na kutwadisa. (Mar. 4:30-32; Bis. 20:28; 1 Tim. 3:1-13) Kansi, na bisika yankaka babakala fyoti kuluta bankento kendima nsangu ya Kimfumu. Na binkulu yankaka, babakala keyindulaka nde kupesa bana malongi ya kimpeve kele mukumba ya bankento. Inki mutindu beto lenda syamisa babakala mingi na kuzaba kinsukami na bo ya kimpeve mpi na kuvukana na beto na lusambu ya kyeleka?
2. Inki mutindu bikesa ya Polo mpi Piere ya kuta kimbangi na babakala kubutaka bambuma ya mbote?
2 Kusosa Babakala: Ntangu mfumu mosi ya dibuta kendimaka kyeleka, mbala mingi yandi kepusaka bantu yankaka ya dibuta na kuvukana ti yandi na lusambu ya bunkete. Mu mbandu, ntangu bo kotisaka bo na boloko sambu na kisalu na bo ya kusamuna, Polo mpi Silasi kulongaka polisi mosi. Bakala yango mpi bantu yonso ya nzo na yandi kubakaka mbotika. (Bis. 16:25-34) Kisalu ya kulonga ya Polo na Korinto kusalaka nde, “Prezida ya nzo ya bisambu, Krispusi, ti bantu yonso ya nzo na yandi, bo tulaka ntima na Mfumu Yesu.” (Bis. 18:8) Yehowa kusadilaka Piere sambu na kuta kimbangi na Korneye, mfumu mosi ya basoda yina Biblia ketuba nde yandi “vandaka na ntima ya Kinzambi” mpi kutina Nzambi boma. Korneye, kumosi ti bantu ya dibuta na yandi mpi banduku na yandi ya ngolo, kubakaka mbotika.—Bis. 10:1-48.
3. Na kulanda mbandu ya Filipo, na inki bantu “yina ke yalaka bantu” nge lenda ta kimbangi?
3 Kuta kimbangi na babakala “yina ke yalaka bantu” lenda vanda ti bupusi ya nene mpenza. (1 Tim. 2:1, 2) Mu mbandu, wanzio ya Yehowa kulongisilaka Filipo na kusolula na “muntu yina vandaka na kiyeka” mpi yina vandaka kukeba bima yonso ya ntalu mingi ya ntotila-nkento ya Etiopia. Filipo kuwaka bakala yango “ke tanga mukanda ya profete Yezaya” mpi kutendudilaka yandi nsangu ya mbote ya metala Yezu. Muntu ya Etiopia yai kukumaka longoki mpi ntembe kele ve nde yandi mwangaka nsangu ya mbote na nzila ntangu yandi vandaka kuvutuka na bwala na yandi. Ziku yandi taka mpi kimbangi na ntotila-nkento mpi bantu yina kuvandaka na nzo ya ntotila-nkento yina, bantu yina zolaka kuvanda ti mabaku mingi ve ya kuwa nsangu ya mbote.—Bis. 8:26-39.
4. Inki mutindu beto lenda pesa babakala mabaku mingi ya kuwa nsangu ya mbote?
4 Mutindu ya Kukutana ti Babakala Mingi: Sambu babakala kevandaka mbala mingi na bisalu na mwini, keti nge lenda yidika manaka na nge sambu nge kuma kusamuna mingi na bankokila, na bawikendi, to na bakonzye? Kusala mbala na mbala na teritware ya mumbongo tapesa nge mabaku ya ngika ya kuta kimbangi na babakala yina kevandaka ve mbala mingi na banzo na bo. Bampangi-babakala lenda sala kikesa ya ngolo sambu na kuta kimbangi ya dibaku ya mbote na banduku na bo ya kisalu yina kele babakala. Na kisalu ya nzo na nzo, mingi-mingi na teritware yina ya bo kesalaka mbala na mbala, bantangu yankaka bampangi-babakala lenda lomba na kusolula ti bakala yina kele munkwa-nzo.
5. Inki mpangi-nkento fwete sala kana bakala mosi mendima nsangu ya Kimfumu ntangu yandi kesamuna?
5 Kana mpangi-nkento kezola kuvutukila bakala mosi yina kundimaka kyeleka, yandi fwete kwenda ve yandi mosi. Yandi lenda kwenda ti bakala na yandi to ti nsamuni yankaka. Ntangu bakala yango keyela na kimpeve, mbala mingi yo kevandaka mbote na kupesa yandi na mpangi-bakala mosi ya mefwana.
6. Inki mutindu beto lenda landa mbandu ya ntumwa Polo sambu na kuzwa “bantu mingi-mingi”?
6 Sosa Bantu-Dyambu Yina Kebenda Dikebi ya Babakala: Ntumwa Polo vandaka kutadila mpusa ya bawi na yandi mpi kuwakanisa mutindu na yandi ya kuzabisa nsangu na mpila nde yandi kuzwa “bantu mingi-mingi.” (1 Kor. 9:19-23) Mutindu mosi, beto fwete tadila bantu-dyambu yina lenda sepedisa babakala yina beto lenda kutana ti bo mpi kudibongisa mbote-mbote. Mu mbandu, mbala mingi babakala kekudiyangisaka na mambu ya metala mpasi ya mbongo, guvernema ya mbote, mpi lutaninu ya mabuta na bo. Bo lenda sepela mpi na kuzaba lukanu ya luzingu, makwisa ya ntoto, mpi sambu na nki Nzambi kepesaka nzila na bampasi. Bantu tayamba mbote nsangu na beto ya Kimfumu kana beto kemonisa mayele ya mutindu yai na mutindu na beto ya kuzabisa yo.—Bing. 16:23.
7. Inki mutindu bantu yonso ya dibundu lenda vanda na bupusi ya mbote na babakala yina kele ve Bakristu mpi yina kekwisaka na balukutakanu?
7 Sadisa Babakala Yina Kele Ve Bakristu: Ata bikalulu ya mbote ya bampangi na beto ya Bakristu ya bankento kevandaka mbala mingi na bupusi mingi na babakala na bo yina kele ve Bakristu, bantu ya dibundu lenda vanda mpi ti bupusi ya mbote. (1 Pie. 3:1-4) Kana bakala mosi ya kele ve Mukristu kekwisa na balukutakanu ti nkento na yandi, mutindu ya mbote yina bantu ya dibundu keyamba yandi tavanda kimbangi mosi ya ngolo. Mutindu yandi kekwisa na balukutakanu kemonisa nde yandi kesepela na kyeleka na kiteso mosi buna, mpi yandi lenda vanda na luzolo ya kundima kulonguka ya Biblia.
8. Inki mutindu bampangi-babakala lenda sosa kusolula ti babakala ya kele ve Bakristu yina kesepelaka mwa fyoti na kyeleka?
8 Na ndambu yankaka, na luyantiku babakala yankaka kemonisaka dikebi ya fyoti na mambu ya kimpeve kansi nsukansuka bo lenda monisa luzolo ya kusolula masolo ya Biblia ti mpangi bakala mosi yina bo kesepela ti yandi. Na dibundu mosi, bantangu yankaka bampangi vandaka kutala dibuta mosi ya kele ya kukabwana na mambu ya lusambu, bo vandaka kusala ngolo na kusolula ti bakala yina kele ve Mukristu mambu yina bo zabaka nde yandi kesepelaka na yo. Nsukansuka dyambu yai kusalaka nde bo yantika kusolula masolo ya Biblia, mpi ntangu yai yandi mebakaka mbotika. Na mbandu yankaka, mpangi-bakala mosi kusadisaka bakala ya mpangi-nkento mosi yina kele ve Mukristu na kutunga kibaka ya lupangu ya nzo na yandi. Sambu mpangi-bakala kumonisaka dikebi ya masonga na mutindu yai, bo yantikaka kulonguka Biblia ti bakala yina. (Gal. 6:10; Filp. 2:4) Kana nge kele mpangi-bakala ya Mukristu, sambu na nki ve kusosa kusolula ti bakala mosi to babakala mingi ya mutindu yai ya kele ve Bakristu?
9. Kupesa babakala-Bakristu formasio lenda buta inki mbuma?
9 Formasio Sambu na Makwisa: Babakala yina kendimaka nsangu ya Kimfumu mpi ya kezolaka kuvanda ti mikumba na kisalu ya Yehowa lenda kuma na kati ya “makabu [ya] bantu,” disongidila bankuluntu yina kesadilaka mayele mpi ngolo na bo sambu na mambote ya mabundu ya bansadi ya Yehowa. (Ef. 4:8; Nk. 68:19) Babakala ya mutindu yai kegungulaka dibundu na luzolo na bo mosi mpi na kyese yonso. (1 Pie. 5:2, 3) Bo kevandaka mpenza lusakumunu sambu na kimvuka na beto ya mvimba ya bampangi!
10. Inki mutindu bikesa ya Ananiasi sambu na kusadisa Polo kunatilaka bantu mingi mambote?
10 Mu mbandu, Saule kukumaka “ntumwa sambu na . . . bantu yina kele Bayuda ve,” ata yandi vandaka ntete kunyokula Bakristu. (Roma 11:13) Sambu na kikuma yai, longoki Ananiasi kuvandaka na ketiketi na luyantiku sambu na kulonga Saule. Ata mpidina, Ananiasi kulandaka lutwadisu ya Mfumu mpi yandi solulaka ti bakala yina kukumaka ntumwa Polo. Na nsungi ya bamvula mingi, kisalu ya kusamuna ya Polo kunataka mambote na bantu mingi yina kuwaka yandi ntangu yandi vandaka kusamuna mpi na bamilio ya bantu yina kelanda kubaka mambote na mikanda na yandi ya kupemama yina kele na Ndinga ya Nzambi.—Bis. 9:3-19; 2 Tim. 3:16, 17.
11. Sambu na nki beto fwete sala bansoba yonso yina kele mfunu sambu na kuta kimbangi na babakala?
11 Yo yina, bika beto sala bansoba yonso yina kele mfunu sambu na kununga mpasi ya kuta kimbangi na babakala. Ntangu beto kelanda lukanu yai, beto ketula ntima nde Yehowa tasakumuna bikesa na beto ya kusala luzolo na yandi mpi ya kukeba mbote mambote ya Kimfumu.