Keti Nge Lenda Sadisa Nkwelani Mosi ya Kele ve Mukristu?
1 Keti dibundu na beno kele ti bansamuni yina kele ti bankwelani yina kele ve Bakristu? Kana yo kele mpidina, ntembe kele ve nde bansamuni yai kele na mpusa nde bankwelani na bo kukwisa na lusambu ya kyeleka. Kansi bo mpamba ve kele na mpusa nde bankwelani na bo kundima kyeleka. Bonso Nzambi, dibundu ya mvimba kele na mpusa nde “bantu yonso kuguluka, [mpi kukuma ti nzayilu ya sikisiki ya kyeleka, NW].” (1 Tim. 2:4) Inki mutindu beto lenda sadisa bankwelani yina kele ve Bakristu kansi ya kele bankwelani ya bansamuni ya dibundu na beto?
2 Ntete, beto fwete meka na kutadila mambu na kutadilaka mabanza ya bankwelani yina kele ve Bakristu. Bankwelani mingi yina kele ve Bakristu kezolaka mabuta na bo mpi kemekaka kuvanda bankwelani mpi bibuti mosi ya mbote. Ziku, bo kevandaka ti balukwikilu yina meswaswana ti ya beto. Bo lenda zaba mwa mambu ya metala Bambangi ya Yehowa katula kaka mambu yina bantu ya mezaba beto ve to ya kebakilaka beto bangindu ya mbi mezabisaka bo. Bankaka keyibukaka bantangu yina bankwelani na bo vandaka kusadila lusambu ya mutindu mosi na dibuta. Mayele tasadisa beto na kusadila nkwelani yina kele ve Mukristu mambu na mawete ti na luzitu yonso mpi kubuya kuwa boma ngolo ntangu yandi kele na lweka na beto.—Bing. 16:20-23.
3 Monisa Dikebi: Mutindu ya mbote ya kusadisa nkwelani yina kele ve Mukristu na kundima kyeleka, ata na luyantiku mpamba, lenda vanda na nzila ya bisalu na beto, kansi ve na nzila ya masolo ya Biblia. (1 Pie. 3:1, 2) Na kutadila dyambu yai, yo kele mfunu nde beto monisa dikebi. Bampangi-bankento na dibundu lenda monisa dikebi na nkento yina kele ve Mukristu, mpi bampangi-babakala lenda sala mutindu mosi sambu na bakala yina kele ve Mukristu. Inki mutindu?
4 Kana beno mekutanaka ntete ve ti nkwelani yina kele ve Mukristu, ziku beno lenda sala yo na nima ya kusolula ti nkwelani yina kele Mukristu. Kulemba nitu ve kana nkwelani yina kele ve Mukristu kemonisa sambu na mbala ya ntete bonso nde yandi kele tiya ve to madidi mpi ve ntangu beno kesolula ti yandi. Zola mpi dikebi yina beto kemonisila yandi lenda pusa yandi na kutadila Bambangi ya Yehowa mbote kuluta. (Roma 12:20) Bakristu yankaka ya kuyela kubingisaka nkwelani yina kele ve Mukristu mpi dibuta na yandi na kudya kumosi ti bo, ti lukanu ya kuzabana mbote ti yandi mpi kukatula konso bangindu ya mbi ya yandi vandaka ti yo na ntama. Bo solulaka ti yandi na mambu yina kesepedisa yandi, na kisika ya kutubilaka kaka mambu ya kimpeve. Na nima, ntangu nkwelani yango kudiwaka mbote, bo lendaka kutubila mambu ya mesimbama na Masonuku. To yandi lendaka kundima kukwisa na lukutakanu mosi sambu na kumona mambu yina nkento na yandi kelongukaka, mingimingi sambu yandi mezabaka dezia bampangi yankaka na dibundu. Ata yandi meyambaka ntete ve kyeleka, ntembe kele ve nde beto lenda sikisa yandi sambu na lusadisu yina yandi kepesaka na nkwelani na yandi yina kele Mukristu.
5 Mingi-mingi bankuluntu fwete sadisa bankwelani yina kele ve Bakristu mpi kutula dikebi sambu na kusosa mabaku ya kuta kimbangi. Nkwelani yina kele ve Mukristu yina mendimaka ntete ve masolo ya Biblia lenda widikila dyambu mosi ya mesimbama na Masonuku ntangu yandi kele na lupitalu to kebela maladi mosi ya ngolo. Kana mpasi mebwa na dibuta ya nkwelani yina kele ve Mukristu, mumbandu lufwa ya muntu mosi ya dibuta, bankuluntu lenda lomba nkwelani yina kele ve Mukristu na kuvanda pana ntangu bo kepesa kikesa na dibuta na yandi.
6 Yindula kyese yina Mukristu ya dibundu na beto tawa kana nkwelani na yandi mendima kyeleka mpi mekuma Mukristu! Nkutu kyese ya mutindu yina tasepedisa mingi mpi Yehowa, bawanzyo, mpi bampangi yankaka na dibundu. (Luka 15:7, 10) Kansi, ata nkwelani yina kele ve Mukristu kendima ve na luyantiku nsangu na beto, beto lenda vanda kaka na kyese sambu bikesa ya beto kelanda kusala kesepedisa Yehowa, yina “ke zolaka ve nde ata muntu mosi kuvila; kansi . . . ke zolaka nde bantu yonso kubalula ntima.”—2 Pie. 3:9.
[Bangyufula ya Kulonguka]
1. Sambu na nki Bakristu yina kezingaka na mabuta yina nkwelani yankaka kele ve Mukristu bo mpamba ve kele na mfunu ya kusadisa bankwelani na bo na kundima kyeleka?
2. Inki mutindu kuvanda ti mayele tasadisa beto na kusadisa nkwelani yina kele ve Mukristu?
3. Inki lenda vanda mutindu ya mbote ya kusadisa nkwelani yina kele ve Mukristu?
4. Inki mutindu beto lenda monisa dikebi?
5. Inki mutindu bankuluntu lenda sadisa nkwelani yina kele ve Mukristu?
6. Inki bikuma kepusa beto na kusadisa nkwelani yina kele ve Mukristu?
[Bangogo sambu na kubenda dikebi ya kele na lutiti 6]
Mutindu ya mbote ya kusadisa nkwelani yina kele ve Mukristu na kundima kyeleka, ata na luyantiku mpamba, lenda vanda na nzila ya bisalu na beto, kansi ve na nzila ya masolo ya Biblia