Keti Meso na Nge Kele Petepete?

1. Kuvanda ti meso ya ‘petepete’ ketendula inki?

¹ Mambu yina meso na beto ketulaka dikebi kevandaka ti bupusi na mambu ya beto kesalaka. Bangogo yai ya Yezu mefwana mpenza: “Kana meso na nge kele [petepete, NW], nitu na nge ya mvimba mpi ta vanda na mwini”! (Mat. 6:22) Kana meso na beto kele “petepete” na kimpeve, yo ketendula nde yo ketulaka dikebi kaka na lukanu mosi—kusala luzolo ya Nzambi. Beto ketulaka Kimfumu na kisika ya ntete na luzingu na beto mpi kebikaka ve nde bima ya kinsuni ya kukonda mfunu to bisalu yina kebakaka kisika ya kisalu ya kusamuna, yo katula dikebi na beto.

2. Inki lenda bebisa mabanza na beto, kansi inki tasadisa beto?

² Mfunu ya Kuditadila: Bima yina bimwangi-nsangu ketelaka beto nde beto kele na mfunu na yo to bima yina bantu yankaka kele na yo, lenda bebisa mutindu na beto ya kutadila mambu. Na ntwala ya kusala to kusumba kima mosi yina talomba kulutisila yo ntangu mingi, kubasisa mbongo mingi, to yina talomba nde beto sala bikesa mingi, yo tavanda mbote na “kuvanda sambu na kuyindula” na kudiyulaka nde, ‘Keti dyambu yai tatomisa kisalu na mono sambu na Yehowa to tasala nde yo kuma mpasi sambu mono sala yo?’ (Luka 14:28; Filp. 1:9-11) Yo kele mpi mayele na kutadila mbala na mbala mutindu beto lenda kumisa dyaka luzingu na beto petepete na mpila nde beto sala mingi kisalu ya kusamuna.—2 Kor. 13:5; Ef. 5:10.

3. Inki beto kelonguka na mpangi-nkento mosi yina kusalaka bansoba sambu na kukumisa luzingu na yandi petepete?

³ Ntangu mpangi-nkento mosi kuyantikaka kisalu ya kimupasudi-nzila ya ntangu yonso, yandi ponaka na kulanda kusala kaka kisalu na yandi ya kinsuni ya ntangu yonso, ata kusala kisalu ya ntangu fyoti zolaka kusadisa yandi na kuzwa mbongo ya kufwana sambu na kulungisa bampusa na yandi. Nsukansuka yandi tubaka nde: “Ata muntu mosi ve lenda sadila bamfumu zole. Yo lombaka nde mu tambika bima ya mono kezolaka sambu na kulungisa bampusa na mono. Mono monaka nde bima ya kinsuni kemanaka ngala, mpi kana mu landaka na kusosa bima yina ya mono kezolaka, yo zolaka kulembisa mono ngolo kibeni.” Luzingu na yandi kupesaka yandi nzila ya kusala bansoba sambu na kukumisa luzingu na yandi petepete, mpi kusoba kisalu, ebuna yo sadisaka yandi na kulanda kusala kisalu na yandi ya kimupasudi-nzila.

4. Sambu na nki yo kele mfunu nde beto landa na kuvanda na disu ya petepete ntangu yai?

⁴ Mutindu ntangu mebikala fyoti, yo kele mfunu mingi kuluta na kulanda kuvanda ti disu ya petepete. Konso kilumbu ya keluta kenataka beto kilumbu mosi penepene ya nsuka ya ngidika yai ya bima mpi luyantiku ya nsi-ntoto ya mpa ya Nzambi. (1 Kor. 7:29, 31) Kana beto ketula dikebi na kisalu ya kusamuna, beto lenda kudigulusa mpi kugulusa bantu yina kewidikila beto.—1 Tim. 4:16.