Beno Longa Bana na Beno na Kukuma Bansamuni
1. Nkunga 148:12, 13 kelomba bibuti yina kele Bakristu na kusala inki?
1 Yehowa kelomba baleke na kukembila yandi. (Nk. 148:12, 13) Yo yina, bibuti yina kele Bakristu kesukaka kaka ve na kulonga bana na bo kyeleka mpi bansiku ya bikalulu ya mbote ya Nzambi. Kansi, bo kelongaka mpi bana na bo na kukuma bansamuni ya nsangu ya mbote. Inki mutindu bo lenda sala yo malembe-malembe?
2. Inki mutindu mbandu ya mbote ya kibuti mosi lenda vanda ti bupusi na bana na yandi?
2 Mbandu ya Mbote: Zuzi Gedeoni kutubilaka bantu na yandi 300 nde: “Beno tala mono, beno fweti sala kaka kiteso mosi ya mono ta sala.” (Baz. 7:17) Bana kevandaka ti kikalulu ya kutala mpi ya kulanda mbandu ya bibuti na bo. Tata mosi kesalaka kisalu na mpimpa, kansi ntangu yandi kevutukaka na nzo na mposo na suka, na kisika ya kukwenda kulala mpongi, yandi kenataka bana na yandi na kisalu ya kusamuna ata yandi kele ya kulemba mingi. Nkatu kutuba ata kima, yandi kelongaka bo nde kisalu ya kusamuna fwete baka kisika ya ntete. (Mat. 6:33) Keti bana na nge kemonaka nde nge kudipesaka na kyese yonso na mitindu ya kuswaswana ya lusambu, mumbandu kusala kisambu, kutanga Biblia, kupesa bakomantere, mpi kusamuna? Ya kyeleka, nge tavanda ve mbandu ya kukuka. Kansi bikesa na nge sambu na kulonga bana na nge lusambu ya Yehowa tabuta mbuma ya mbote kana bo kemona nde nge kesala bikesa ya ngolo sambu na kusadila yandi.—Kul. 6:6, 7; Roma 2:21, 22.
3. Inki balukanu ya kimpeve bibuti fwete syamisa bana na bo na kuditudila mpi na kulungisa malembe-malembe?
3 Balukanu ya Kulungisa Malembe-malembe: Bibuti kelembaka ve na kulonga bana na bo mutindu ya kutambula, ya kutuba, ya kulwata bilele, mpi buna na buna. Ntangu bana keyela mpi kesoba, bo kevandaka na balukanu ya mpa ya kuditudila. Kana bibuti kele Bakristu, bo kesadisaka mpi bana na bo na kubaka mpi na kulungisa balukanu ya kimpeve yina kewakana ti mvula mpi makuki na bo. (1 Kor. 9:26) Keti nge kelongaka bana na nge mutindu ya kupesa bakomantere na bangogo na bo mosi mpi kuyidika badevware yina bo kele na yo na Nzo-Nkanda ya Kisalu ya Teokrasi? (Nk. 35:18) Keti nge kelongaka bo na kudipesa na mitindu ya kuswaswana ya kisalu ya kusamuna? Keti nge kemonisaka bo mfunu ya kuditudila lukanu ya kubaka mbotika mpi ya kusala kisalu ya ntangu yonso? Keti nge kesadisaka bo na kusala bangwisana ti bansamuni ya kikesa mpi ya kyese, bayina tasyamisa bo?—Bing. 13:20.
4. Inki mambote bana tabaka kana bo kele ti bibuti yina keyantika na kulonga bo kisalu ya kusamuna ntangu bo kele ntete baleke?
4 Muyimbi-bankunga kutubaka nde: “Katuka ntangu mono vandaka leki tii bubu yai, nge ke longaka mono; tii bubu mono ke telaka bantu mambu ya kuyituka ya nge ke salaka.” (Nk. 71:17) Banda kulonga bana na nge ntangu bo kele ntete baleke na kukuma bansamuni. Formasio ya kimpeve yina beno kesadisa bo na kubaka tanatila bo mpenza mambote ntangu bo tayela!—Bing. 22:6.