Kuta Kimbangi na Babalabala na Mutindu ya Mefwana

1. Inki kele mutindu mosi yina beto lenda landa mbandu ya Yezu?

¹ Na nsungi ya kisalu na yandi na ntoto, Yezu kuvandaka ve ti ketiketi na kusolula ti bantu yina yandi kutanaka ti bo na nzila mpi na bisika yankaka ya bantu mingi. (Luka 9:57-61; Yoa. 4:7) Yandi zolaka kuzabisa nsangu na yandi ya mfunu na bantu mingi kibeni. Bubu yai, kuta kimbangi na babalabala kele mutindu mosi ya kuluta mbote ya kusadisa bantu na kubaka mayele ya Nzambi. (Bing. 1:20) Beto tanunga mpenza na kisalu yai kana beto baka lukanu ya kukutana ti bantu mpi ya kusadila luswasukusu.

2. Inki lukanu nge lenda baka ntangu nge kesamuna na babalabala?

² Baka Lukanu: Mbala mingi, yo kevandaka mbote na kukwenda kukutana ti bantu, na kisika ya kutelema to kuvanda kisika mosi mpi kukinga nde bantu ya keluta kukwisa na nge. Mweta, tala muntu na meso, mpi sala mambu na mawete yonso mpi bonso nduku. Kana beno kesala na kimvuka ti bansamuni yankaka, mbala mingi yo kevandaka mbote nde konso nsamuni kusolula ti muntu yandi mosi. Kubaka lukanu kele mpi mfunu sambu na kulanda kuyedisa mpusa yina muntu kumonisaka. Kana mpila kele, na nsuka ya disolo, nge lenda yula muntu yango na mawete yonso mutindu beno lenda kutana dyaka. Bansamuni yankaka kesamunaka na babalabala mbala na mbala na kisika mosi; metode yai kesadisaka bo na kusolula ti bantu ya mutindu mosi mbala na mbala mpi kulanda mpusa yina bo kemonisa.

3. Inki mutindu beto lenda sadila luswasukusu ntangu beto keta kimbangi na babalabala?

³ Sadila Luswasukusu: Sadila luswasukusu sambu na kuzaba kisika ya kutelema na balabala mpi banani nge lenda solula ti bo. Yo kele mfunu ve na kusolula ti bantu yonso ya keluta. Zaba kutala. Mumbandu, kana muntu kekwenda nswalu-nswalu, yo lenda vanda mbote mingi na kuyambula yandi. Ntangu nge keta kimbangi na ntwala ya kisika mosi ya mumbongo, vanda mayele sambu na kuyangisa ve munkwa ya kisika yina. Mbala mingi, yo kevandaka mbote na kuta kimbangi na bantu ntangu bo kebasika na magazini na kisika ya kusolula ti bo ntangu bo kekota. Solula ti bantu na mutindu mosi ya tapesa bo ve boma to kuyitukisa bo. Mpi vanda ti luswasukusu ntangu nge kekabula mikanda. Kana muntu kemonisa ve dikebi ya mingi, pesa yandi trakiti na kisika ya kupesa yandi baperiodiki.

4. Sambu na nki kusamuna na babalabala kele mutindu mosi ya kuta kimbangi ya mbote mpi ya kepesaka kyese?

⁴ Kimbangi na babalabala kesadisaka beto na kumwanga bankeni mingi ya kyeleka na mwa ntangu fyoti. (Lo. 11:6) Bantu yankaka ya beto kekutanaka ti bo lenda vanda nkutu bayina beto lendaka ve kukuta na banzo ntangu beto kesamuna nzo na nzo. Kusamuna na babalabala kele metode mosi ya kisalu ya bilanga, yina kepesaka kyese mpi kebutaka mbuma. Sambu na nki ve kubaka lukanu ya kusala yo?