Metode ya Mpa mpi ya Mbote Sambu na Kuta Kimbangi na Bisika ya Bantu Mingi
1. Bo ke siamisa mabundu yina kele ti bisika ya bantu ke tambulaka mingi na makulu na kusala nki?
1 Bo ke siamisaka mabundu yina kele ti bisika ya bantu ke tambulaka mingi na makulu na kusadila bamesa to bashario sambu na kuta kimbangi na bisika ya bantu mingi. Kana beno ke sadila shario, nsamuni mosi lenda telama to kuvanda na lweka na yo. Kansi, kana beno ke sadila mesa, bansamuni zole fwete telema na lweka na yo. Bansamuni yina bo me pesa mukumba yai ta sala ngolo na kuvanda kiese-kiese mpi mawete. Kana muntu me kwisa na ntwala ya mesa to ya shario, nsamuni mosi lenda yantika disolo. Ziku, yandi lenda tuba nde: “Keti nge me kudiyulaka dezia mambu yina Biblia ke tubaka sambu na diambu yai?” Nsamuni mosi to bansamuni zole ya nkaka lenda ta kimbangi ya dibaku ya mbote na mwa kitamina ti mesa to shario.
2. Pesa mbandu ya ke monisa mfunu ya kutanda mikanda na mesa to ya kutula mikanda na shario sambu na kuta kimbangi na bisika ya bantu mingi?
2 Metode yai me salaka nde bantu mingi ya mpa kuyantika kulonguka Biblia. Mwana ya iniversite mosi sosaka kusonika mukanda mosi ya ke tubila Bambangi ya Yehowa, kansi yandi monaka ve Nzo ya Kimfumu. Na mposo yina landaka, yandi monaka mesa ya bo me tanda mikanda na iniversite. Yandi yantikaka kulonguka Biblia, mpi bubu yai yandi me bakaka mbotika mpi ke taka kimbangi na bisika ya bantu mingi.
3. Inki mambu bansamuni ya nkaka ke tubaka sambu na metode yai?
3 Mpangi-nkento mosi ya ke taka kimbangi na bisika ya bantu mingi ke tuba nde: “Bantu ya nkaka ke telemaka na ntwala ya mesa to ya shario sambu na kubaka bazulunalu ya mpa. Bantu ya nkaka diaka me kutanaka ntete ve na Bambangi ya Yehowa. Mono ke bakisa nde metode yai ke sadisa beto na kukutana ti bantu mingi.” Mpangi-nkento ya nkaka tubaka nde: “Yai kele metode ya mpa mpi ya mbote ya kuta kimbangi sambu bantu bo mosi ke kwisa na nge. Yo ke bendaka dikebi ya bantu ata bo ke sepela mpenza ve.”
4. Sambu na nki yo ke vandaka mbote na kutula mesa to shario na kisika yina mosi, na kilumbu yina mosi, mpi na ntangu yina mosi?
4 Yo ke vandaka mbote na kutula mesa to shario na kisika yina mosi, na kilumbu yina mosi, mpi na ntangu yina mosi. Kana beto ke sala mutindu yai, bantu ta yikana na kumona mesa to shario mpi nsuka-nsuka bo ta kuma kukwisa na kisika yango kukonda mpasi, kuyula bangiufula to kubaka mikanda. Keti dibundu na beno ke taka kimbangi na bisika ya bantu mingi? Kana mpidina, nge lenda sala kisalu yai ya ‘kusamuna Kimfumu ya Nzambi na bisika yonso.’—Luka 9:60.