Sadila Ntangu na Nge Mbote Kibeni na Kisalu ya Kusamuna
Na mvula ya kisalu 2014, Bambangi ya Yehowa salaka bangunga 1 945 487 604 na kisalu ya kusamuna. Yo ke monisa pwelele nde beto me bakaka lukanu ya kusala mingi kisalu ya Yehowa! (Nk. 110:3; 1 Bak. 15:58) Sambu “ntangu ya me bikala kele fioti,” yo me fwana nde beto sadila ntangu na beto mbote na kisalu ya kusamuna sambu na kusolula ti bantu mingi.—1 Bak. 7:29.
Yo ke lombaka kusoba mambu sambu kusadila ntangu na beto mbote na kisalu ya kusamuna. Mu mbandu, kana nge ke salaka mbala na mbala ngunga mosi to bangunga mingi na kitini mosi ya kisalu ya kusamuna kukonda kusolula ti bantu, nge lenda sala bansoba sambu na kukutana ti bantu mingi mpi kusolula ti bo. Konso kisika ke vandaka ti mambu na yo. Yo yina, mambu ya ke landa lenda sadisa nge na kusadila ntangu na nge mbote sambu nde nge ‘bula ve mupepe.’—1 Bak. 9:26.
Kuta Kimbangi Nzo na Nzo: Tuka bamvula mingi, bansamuni me yikamaka na kusala kisalu ya kusamuna nzo na nzo na suka. Kansi, sambu bantu mingi ke kwendaka na kisalu na suka, yo ta vanda mbote na kumeka kusamuna nzo na nzo na ntwala nde nkokila kubwa to na nkokila ntangu bantu mingi ke vandaka na nzo. Kuta kimbangi na bala-bala to na bisika ya mumbongo na ntangu lenda buta mbuma ya mbote.
Kuta Kimbangi na Bisika ya Bantu Mingi: Beto fwete tula mesa to shario na bisika yina bantu mingi ke tambulaka na makulu na teritware ya dibundu na beto. (Tala Kisalu na Beto ya Kimfumu ya Yuli 2013, lut. 5.) Kana bantu ke tambula diaka mingi ve na bisika yina beno ponaka sambu na kuta kimbangi, Komite ya Kisalu ya Dibundu lenda baka lukanu ya kutula mesa to shario na bisika ya nkaka yina bantu mingi ke tambulaka na makulu.
Bamvutukilu ya Mpa mpi Balongoki ya Biblia: Kana bitini ya nkaka ya kisalu ya kusamuna ke buta ve mbuma na ntangu mosi buna, keti nge lenda sala manaka sambu na kuvutukila bantu mpi kutala balongoki ya Biblia? Mu mbandu, kana nge ke mona nde kusamuna nzo na nzo ke salama mbote na Sabala na suka, nge lenda kwenda kutala balongoki ya Biblia na nima ya midi to na nkokila. Ntangu beno ke sala bamvutukilu ya mpa, bansamuni lenda baka bangidika ya kukwenda kutala balongoki ya Biblia na ntangu mosi buna sambu na kusala mingi na kisalu ya kusamuna.
Ya kieleka, beto ke bakaka bangunga ntangu beto ke samunaka, kansi kiese na beto ke kumaka mingi kana kisalu na beto ke buta mbuma. Kana nge me mona nde kitini mosi ya kisalu ya kusamuna ke buta ve mbuma na ntangu mosi buna, nge lenda sadila kitini ya nkaka. Samba Yehowa, “Mfumu ya kisalu ya kukatula bambuma” sambu yandi sadisa nge na kusadila ntangu na nge mbote kibeni na kisalu ya kusamuna!—Mat. 9:38.