Mutindu ya Kusadila Mesa to Shario Sambu na Kuta Kimbangi

Kuta kimbangi ti shario to ti mesa kele mbote mpenza sambu na kubenda bantu ya ntima ya masonga na kieleka. (Yoa. 6:44) Yo yina, bo ke siamisaka bankuluntu na kubaka bangidika ya kuta kimbangi na bisika yina bantu mingi ke tambulaka na makulu na teritware ya dibundu. Sambu beto ke tulaka ve shario to mesa na kisika mosi kimakulu, mbala mingi yo ke vandaka ve mfunu na kulomba nswa na bamfumu ya leta. Banani me fwana na kuta kimbangi ya mutindu yai? Bansamuni yina ke monisaka luswasukusu, ya ke vandaka luzitu mpi ya ke solulaka mbote ti bantu. Mambu yai ya ke landa ta sadisa bansamuni na kuzaba mambu ya bo fwete sala mpi mambu ya bo fwete sala ve sambu na kusamuna na mutindu mbote.

Mambu yina nsamuni fwete sala:

Vanda mawete. Yamba bantu ya ke kwisa na mesa to na shario mbote mpi sadisa bo. Bansamuni ya nkaka ke mwetaka mpi ke pesaka bantu mbote na mawete yonso. Kana muntu mosi ya ke luta me tala shario to mesa, nge lenda zabisa yandi nde: “Nge lenda baka mukanda ya ke sepedisa nge.”
Telama na kitamina ya mbote ti mesa to shario. Na bisika ya nkaka, bansamuni ke bakaka mbutu ya mbote ntangu bo ke telamaka pene-pene ti mesa to shario. Bansamuni ya nkaka ke monaka nde bantu ke vandaka ti badute na kutelama ntangu bo ke sadilaka metode yai. Yo yina, bo ke telamaka mwa ntama ti mesa to ti shario mpi ke vingilaka tii ntangu muntu ke kwisa na ntwala na yo. Kana muntu me telama pene-pene ya mesa to shario, meka kusolula ti yandi. Ziku nge lenda yula yandi nde: “Keti nge me kudiyulaka dezia ngiufula yai?”
Kana mpila kele, sadila Biblia mbala na mbala.
Kana muntu me baka mukanda ya beto ke longukaka ti bantu, mu mbandu Biblia Kelongaka, tendudila yandi ngidika na beto ya kulonguka Biblia ti bantu. Na nsadisa ya apareyi mosi, lomba yandi na kutala video Sambu na Nki Beto Fwete Longuka Biblia?
Kana muntu me monisa mpusa, baka bansangu yina lenda sadisa nge na kukutana ti yandi. Kana muntu yango ke zingaka ve na teritware na beno, fulusa formilere Veuillez suivre l’intérêt (S-43) mpi pesa yo sekretere ya dibundu na beno kukonda kusukinina.

Mambu yina nsamuni fwete sala Ve:

Kuvanda ve muntu ya makasi, ya ke dindamana to ya ke telama na lweka ya mesa (to ya shario) bonso nkengi (sentinelle).
Kumona ve kitini yai ya kisalu ya kusamuna kaka bonso mwaye ya kukabula mikanda. Ntangu beto ke samunaka, lukanu na beto ke vandaka ya kulonguka Biblia ti bantu. Yo yina, beto fwete sala ngolo sambu na kusolula ti bantu.
Kutelama ve na ntwala ya mesa to shario sambu na kufika yo. Kudipesa ve na masolo ti mpangi ya nge ke sala ti yandi. Kana nge ke zola kusolula ti muntu na telefone na nge, mbala mingi yo ke vandaka mbote na kukwenda mwa ntama ti mesa to shario.
Kulanda ve kusolula ti bantu ya ke tulaka ntembe. Kana muntu yango me kuma kutuba bangogo ya mbi, yo lenda vanda mbote nde beno katuka mpi kukwenda na kisika ya nkaka.