Beno ‘Wila Bantu Yankaka Mawa’
1. Bubu yai bantu kele mpenza ti mfunu ya inki?
1 Bubu yai bantu mingi kele mpenza ti mfunu ya lusadisu, kuluta bantangu yonso na disolo ya luzingu ya bantu. Kubeba ya mambu na nsi-ntoto mesalaka nde na bisika yonso bantu kukonda kyese, kudiyangisa na mabanza, mpi kukonda kivuvu. Mafunda ya bantu kele na mfunu ya lusadisu, mpi beto Bakristu, beto mefwana mpenza na kumonisila bamfinangani na beto dikebi ya masonga. (Mat. 22:39; Gal. 6:10) Inki mutindu beto lenda monisa dikebi ya mutindu yai?
2. Inki kele mutindu ya kuluta mbote yina beto fwete monisa nde beto kewilaka bantu mawa?
2 Kisalu Mosi ya Kumonisila Bantu Mawa: Lusadisu ya kyeleka mpi ya kukonda nsuka kekatukaka kaka na Nzambi. (2 Kor. 1:3, 4) Yehowa kesyamisa beto na kulanda mbandu na yandi na kuwilaka ‘bantu yankaka mawa,’ mpi yandi mepesaka beto kisalu ya kukwenda kuzabisa nsangu ya mbote ya Kimfumu na bamfinangani na beto. (1 Pie. 3:8) Kusala ngolo na kisalu yai kele mutindu ya kuluta mbote ya kupesa kikesa na “bantu yina melwala na ntima,” sambu Kimfumu ya Nzambi kele kivuvu mosi kaka ya kyeleka sambu na bantu yonso ya kemonaka mpasi. (Yez. 61:1, NW) Sambu yandi kewilaka bantu na yandi mawa, ntama mingi ve Yehowa takatula mambi mpi tatula nsi-ntoto ya mpa ya lunungu.—2 Pie. 3:13.
3. Inki mutindu beto lenda tadila bantu mutindu Yezu vandaka kutadilaka bo?
3 Tadila Bantu Mutindu Yezu Vandaka Kutadilaka Bo: Ata ntangu Yezu vandaka kulonga bibuka ya nene ya bantu, yandi vandaka ve kutadila bo kaka na kimvuka. Yandi vandaka kumona nde konso muntu na kati na bo vandaka ti mfunu ya lusadisu ya kimpeve. Bo vandaka bonso mameme ya mekonda ngungudi ya kutwadisa bo. Mambu ya Yezu kumonaka kusimbaka ntima na yandi mpi yo pusaka yandi na kulonga bo ti kukanga-ntima yonso. (Mar. 6:34) Kana beto ketadila bantu mutindu Yezu vandaka kutadila bo, beto tamonisila konso muntu na kati na bo mawa ya masonga. Yo tamonana na mutindu na beto ya kutuba mpi na luse na beto. Kusamuna tavanda dyambu ya ntete na luzingu na beto mpi beto tawakanisa mambu ya beto tatuba ti mambu ya keyangisa konso muntu.—1 Kor. 9:19-23.
4. Sambu na nki beto fwete yedisa kikalulu ya kuwila bantu mawa?
4 Bantu mingi ya makanda yonso kendima nsangu ya mbote ya Kimfumu mpi bo kesepela ti dikebi ya masonga yina beto ketudilaka bo. Kana beto kelanda na kuyedisa kikalulu ya kuwila bantu mawa, beto tapesa kyese mpi lukumu na Yehowa, Nzambi na beto ya kewilaka bantu mawa.—Kol. 3:12.