Keti Bana na Beno Kele ya Kuyilama?
1. Sambu na nki yo kele mfunu na kusadisa bana na ntwala nde nzo-nkanda kuyantika?
1 Ntangu ya kuyantika mvula ya mpa ya nzo-nkanda mefinama. Ntembe kele ve nde bana na beno takutana ti mambu ya mpasi ya mutindu yankaka mpi bupusi ya banduku. Bo tavanda dyaka ti mabaku ya mpa ya kuta kimbangi ya “mambu yina kele ya kieleka.” (Yoa. 18:37) Keti bo kele ya kuyilama?
2. Inki mambu bana na beno fwete zaba sambu na kudibongisa?
2 Keti bana na beno kebakisa mbote-mbote kana kuvukana na bankinsi sambu na lukumu ya insi ti na bankinsi ya mimpani ketendula inki? Keti bo kebakisa mpi nde kuvukana na bankinsi yango kele mbi? Keti bo mekudibongisa sambu na bupusi yina bo takutana ti yo ya kusala banzo-nkanda ya nda, ya kuta kinduku ti bana babakala to bana bankento, mpi ya kunwa malafu to bima yankaka yina kelawusaka? Keti bo tasuka kaka na kutuba nde, mambu yai kewakana ve ti malongi ya dibundu na beto, to keti bo kezaba mutindu ya kutendula balukwikilu na bo?—1 Pie. 3:15.
3. Inki mutindu bibuti lenda sadila nkokila ya Lusambu ya Dibuta sambu na kusadisa bana na bo na kudibongisa?
3 Sadila Nkokila ya Lusambu ya Dibuta: Ntembe kele ve nde na nsungi ya nzo-nkanda, beno tasolula ti bana na beno ntangu bo takutana ti makambu yankaka. Kana beno sala mpenza bikesa sambu na kutadila mambu yina bo lenda kutana ti yo na ntwala nde nzo-nkanda kuyantika, yo tasadisa bana na beno na kuditudila ntima. Beno lenda sadila nkokila mosi to bankokila mingi ya Lusambu ya Dibuta sambu na kutadila dyambu yai. Beno lenda yula bana na beno mambu yina bo kemona nde yo tayangisa bo mingi kuluta ntangu bo tavutuka na nzo-nkanda. Beno lenda tadila dyaka ntangu yai mambu yina beno tadilaka na bamvula meluta, sambu bana mekuma bambuta mpi bo mekuma ti nzayilu mingi. (Nk. 119:95) Beno lenda sadisa mpi bansonga yina beno kesala bonso nde beno kele balongi, bantu yina kepesaka bandongisila na mambu ya nzo-nkanda, to banduku na bo ya nzo-nkanda. Beno longa bana na beno mutindu ya kupesa mvutu ya mekatuka na Biblia mpi kusadila bisadilu bonso mukanda Comment raisonner mpi mikanda Les jeunes s’interrogent. Mama mosi vandaka kusadila bansonga sambu na kusadisa bana na yandi na kudibongisa sambu na kusolula ti balongi na bo ya mpa na luyantiku ya konso mvula ya nzo-nkanda, mpi kuzabisa balongi yango nde bo kele Bambangi ya Yehowa.—Tala Nzozulu ya Nkengi ya Desembri 15, 2010, balutiti 3-5.
4. Bibuti ya mayele tasala inki?
4 Mambu ya mpasi yina baleke yina kele Bakristu fwete kutana ti yo na bilumbu yai ya nsuka kelanda na kukuma “mingi.” (2 Tim. 3:1) Bibuti ya mayele tatadila na ntwala mambu yango ti bana na bo mpi tasadisa bo na kununga yo. (Bing. 22:3) Na ntwala nde mvula ya mpa ya nzo-nkanda kuyantika, beno sala yonso yina beno lenda sala sambu na kusadisa bana na beno na kuvanda ya kuyilama.