Keti Nge Kele ya Kuyilama Sambu na Nzo-Nkanda?

1. Inki mabaku kevingila nge na ntangu beno keyantika nzo-nkanda?

¹ Yo vanda yo kele mbala na nge ya ntete to yo kele mvula yankaka sambu na kukwenda na nzo-nkanda, beno batoko ya Bakristu takutana ti bampasi mpi bupusi ya mpa. Kansi beno tavanda mpi ti mabaku ya mpa ya kuta kimbangi “na mambu yina kele ya kieleka.” (Yoa. 18:37) Keti nge mekudibongisama mbote mpi nge kele ya kuyilama sambu na kuta kimbangi?

2. Na nki mitindu nge kele ya kuyilama sambu na nzo-nkanda?

² Sambu na kusadisa nge na kununga na mambu yonso ya luzingu, nge mebakaka malongi mingi na Yehowa, na bibuti na nge, mpi na mpika ya kwikama mpi ya mayele. (Bing. 1:8; 6:20; 23:​23-25; Ef. 6:​1-4; 2 Tim. 3:​16, 17) Ntembe kele ve nde ntangu yai nge mezaba bampasi yina nge lenda kutana ti yo na nzo-nkanda. Ti formasio yina Nzambi mepesaka nge mpi nzayilu ya mambu yina nge takutana ti yo, nge kekudibongisa sambu na kuta kimbangi. (Bing. 22:⁠3) Longuka na dikebi yonso malongi mpi bangindu ya mbote ya Masonuku yina kele na bavolime zole ya mukanda Les jeunes s’interrogent mpi masolo ya mutindu mosi ya kebasikaka mbala na mbala na Réveillez-vous !

3. Na nki mitindu nge takuka kuta kimbangi?

³ Teritware na nge ya sipesiali tapesa nge nzila ya kuta kimbangi na mitindu mingi. Ntangu bankaka kemona mutindu nge melwata mpi meyidika nitu mbote, bikalulu mpi kutuba na nge, mutindu nge kezitisa bana yankaka ya nzo-nkanda mpi balongi na nge, ata nkutu bamfumu, mpi bo kebakisa nde nge kele ti fondasio ya ngolo na luzingu, bankaka lenda yula nde, “Sambu na nki nge kele ya kuswasana mpenza?” (Mal. 3:18; Yoa. 15:19) Yo lenda pesa nge dibaku ya kuta kimbangi mpi ya kutendula balukwikilu na nge. (1 Tim. 2:​9, 10) Na mvula ya mvimba, ntembe kele ve nde nge takutana ti bampasi, mu mbandu bafeti ya kukumisa insi na nge mpi bafeti yankaka. Kana bo yula nge sambu na nki nge kevukanaka ve, keti nge tatuba kaka nde, “Dibundu na mono kebuyisaka yo; Mono kele Mbangi ya Yehowa,” to keti nge tasadila dibaku yina sambu na kuta kimbangi na yina metala Tata na nge ya zola, Yehowa? Kana nge kekudibongisa mbote na nsi ya lutwadisu ya Yehowa, yo tasala nde nge vanda ya kuyilama na kuta kimbangi ya mbote na balongi na nge, na bana yankaka ya nzo-nkanda, mpi na bantu yankaka.​—⁠1 Pie. 3:⁠15.

4. Sambu na nki nge ketula kivuvu nde nge lenda nunga mambu ya mpasi ya nge takutana na yo na nzo-nkanda na mvula yai?

⁴ Ata nge lenda vanda na mwa boma na yina metala kukwenda na nzo-nkanda, zaba nde bantu mingi yina kezola nde nge nunga mambu ya mpasi ya nge takutana na yo na nzo-nkanda na mvula yai tapesa nge maboko. Dyaka, beto kesepela kumosi ti nge na mabaku yina nge tavanda na yo ya kuta kimbangi na bantu yankaka na teritware na nge ya sipesiali. Yo yina, vanda kikesa mpi ya kuyilama sambu na nzo-nkanda!