Kuwa Ve Boma
1. Inki dyambu kelombaka kuvanda kikesa, mpi sambu na inki?
1 Keti nge mewaka dezia boma ya kuta kimbangi na nzo-nkanda sambu nge vandaka kuyindula nde bantu taseka nge? Ntembe kele ve nde yo kelombaka kikesa sambu na kutuba, mingi-mingi kana nge kevandaka nsoni-nsoni. Inki tasadisa nge?
2. Inki mutindu luswasukusu kesadisaka na ntangu ya kuta kimbangi na nzo-nkanda?
2 Sadila Luswasukusu: Ata nzo-nkanda lenda vanda kisika yina nge kele ti dibaku ya mbote ya kusamuna, kuvila ve nde nge takuka ve kusolula mambu ya kimpeve ti bantu yonso mutindu nge lenda sala yo ntangu nge kesamuna nzo na nzo. Sadila luswasukusu sambu na kuzaba ntangu ya kutuba. (Lo. 3:1, 7) Disolo mosi to devware na nzo-nkanda lenda pesa nge dibaku ya kutubila lukwikilu na nge. To nduku mosi ya nzo-nkanda lenda yula nge sambu na nki nge kevukanaka ve ti bo na mambu yankaka. Bakristu yankaka mezabisaka balongi na bo na luyantiku ya mvula nde bo kele Bambangi ya Yehowa mpi mepesaka balongi yango mikanda yina ketendulaka balukwikilu na beto. Bankaka ketululaka mikanda na beto na zulu ya ban na bo na mpila nde banduku na bo ya nzo-nkanda kuyula bangyufula.
3. Inki mutindu nge lenda kudibongisa sambu na kuta kimbangi na nzo-nkanda?
3 Kudibongisa: Kana nge kudibongisa, nge takuma kuditudila ntima mpenza. (1 Pie. 3:15, 16) Yo yina, meka kuyindula na ntwala bangyufula yina bo lenda yula nge, mpi yindula mutindu nge lenda pesa mvutu. (Bing. 15:28) Kana mpila kele, nata Biblia na nge na nzo-nkanda mpi mwa mikanda, bonso Comment raisonner, Les jeunes s’interrogent mpi mikanda ya ketubila lugangu, mpidina nge lenda sadila yo ntangu nge tavanda na mfunu na yo. Lomba bibuti na nge na kusadisa nsonga, na ntangu ya lusambu ya dibuta, ya kemonisa mutindu ya kuta kimbangi na nzo-nkanda.
4. Sambu na nki nge fwete landa na kuta kimbangi na nzo-nkanda?
4 Vanda ti Bangindu ya Mbote: Kuyindula ve nde banduku na nge ya nzo-nkanda tasekaka nge konso ntangu yina nge ketubila kyeleka. Ziku bankaka lenda sepela na nge sambu na kikesa na nge mpi bo lenda widikila nge. Kansi kulemba nitu ve kana ata muntu mosi ve kundima nge. Yehowa tasepela sambu nge mekaka. (Baeb. 13:15) Landa na kulomba yandi na kusadisa nge sambu ‘nge sadila yandi na kikesa yonso.’ (Bis. 4:29; 2 Tim. 1:7, 8) Yindula kyese yina nge tawa ntangu muntu tawidikila nge. Nsuka-nsuka muntu yina lenda kuma mpi nsadi ya Yehowa!