Les Témoins de Jéhovah : organisés pour proclamer la bonne nouvelle
Banda bamvula kuluta 100, Bambangi ya Yehowa meyilamaka sambu na kusala kisalu ya kusamuna nsangu ya mbote. Na kampanye yai ya kuluta nene ya kisalu ya kusamuna ya mesalamaka ntete ve, beto kezabisaka nsangu yai na bandinga mingi kibeni, mpi na bansi kuluta 230. (Mat. 24:14) Sambu na nki kisalu yai kele mfunu? Mpi nki mutindu yo kesalamaka na ntoto ya mvimba? Video Les Témoins de Jéhovah : organisés pour proclamer la bonne nouvelle kepesa bamvutu na bangyufula yina mpi kesonga mambu mingi ya metala kisalu na beto ya kesalama na ntoto ya mvimba. Na nima ya kutala video yai, beno pesa bamvutu na bangyufula yai ya kelanda:
Inki mutindu video yai meyedisa ntonda na nge sambu na (1) bikesa yina organizasio ya Yehowa ke na kusala sambu na kusamuna nsangu ya mbote? (2 Tim. 4:2) (2) mabuta ya Betele yina kele na ntoto ya mvimba? (3) formasio yina bankengi mpi bamisionere kebakaka? (2 Tim. 2:2) (4) mfunu ya kutadila verse mosi ya Biblia konso kilumbu mpi ya kudibongisa konso mposo sambu na balukutakanu ya dibundu? (Bis. 17:11) (5) mambote ya beto kebakaka na kukwenda na balukutakanu? (Baeb. 10:24, 25) (6) mambote yina nge tabaka ntangu ntoto takuma dyaka Paladisu? (Yez. 11:9) (7) dibaku ya mbote ya nge kele na yo ya kusala kisalu ya kukatula bambuma yina kelanda na kusalama?—Yoa. 4:35.
Video yai kevandaka kisadilu mosi ya mbote sambu na kusadisa bantu ya kesepelaka na kyeleka na kuzaba kisalu yina Bambangi ya Yehowa kesalaka na nsi-ntoto ya mvimba. (8) Inki ntangu yo tavanda mbote na kusonga video yango na Balongoki ya Biblia, na bampangi na beto ya kinsuni, mpi na bantu yankaka? (9) Inki mambu ya mbote nge monaka ntangu nge songaka bantu video yai?
Ntangu beto keyindulula mambu yina Yehowa kesadila beto, beto kendima mambu yai ya muyimbi bankunga kutubaka: “Mfumu Nzambi, Nzambi na mono, nge me sadila beto mambu mingi ya mbote; nzambi ya nkaka kele ve bonso nge.” (Nk. 40:6) Bika beto sadila video yai na mutindu mosi ya mbote sambu na kusadisa bantu yankaka na kuyedisa ntonda na bo sambu na Yehowa mpi organizasio na yandi!