Bambangi ya Yehowa—Lukwikilu ya Kemonana na Bisalu, Kitini 2: Bika nde Nsemo Kusema

Ntangu bo basisaka Mpangi Rutherford ti banduku na yandi ya kisalu na boloko na mvu 1919, kisalu mosi ya nene vandaka kuvingila Balongoki ya Biblia. Mutindu bo memonisa yo na video Bambangi ya Yehowa—Lukwikilu ya Kemonana na Bisalu, Kitini 2: Bika nde Nsemo Kusema, Balongoki ya Biblia zolaka kuvanda ti bambeni mingi, nzayilu na bo ya masonuku zolaka kulanda na kuyela, mpi lukwikilu na bo zolaka kukuma ngolo kibeni. (Bing. 4:18; Mal. 3:1-3; Yoa. 15:20) Na nima ya kutala video yai, keti nge lenda pesa mvutu na bangyufula yai?

(1) Balongoki ya Biblia sadilaka nki bametode sambu na kumwanga nsangu ya mbote? (2) Inki luzayisu bo pesaka na balukutakanu ya distrike ya sipesiali na 1931 mpi na 1935? (3) Nzozulu ya Nkengi ya Novembri 1, 1939 vandaka kutubila nki dyambu ya mfunu? (4) Tubila mambu yina salamaka na stade Madison Square Garden, ntangu Mpangi Rutherford vandaka kusala diskure na yandi yina vandaka na ntu-dyambu, “Luyalu mpi Ngemba.” (5) Sambu na nki diskure ya Mpangi Knorr, yina vandaka na ntu-dyambu “Ngemba—Keti yo Tasala Ntangu Mingi?” vandaka mfunu mingi? (6) Na 1942, nki bangidika Bambangi ya Yehowa bakaka sambu na kuyedisa kisalu na bo ya kusamuna? (7) Tendula mutindu Bambangi ya Yehowa vandaka kusamba na batribinale na États-Unis, na Canada, mpi na Grese. (8) Inki bupusi Gileadi vandaka ti yo na kuyela ya kisalu ya kusamuna? (9) Inki kisalu ya mfunu yantikaka na 1946, mpi sambu na nki? (10) Inki bitambi Bambangi ya Yehowa salaka sambu na kuzikisa nde bikalulu na bo vandaka na kuwakana ti minsiku ya Biblia? (11) Tubila bansoba yankaka yina Bambangi kusalaka na 1970 sambu na kuzikisa nde organizasio kelanda mpenza mbandu yina kele na Biblia. (12) Inki mutindu video yai mesadisa nge na kubakisa mbote-mbote nde Yehowa kele na kutwadisa mambu yonso mpi nde yai kele organizasio na yandi? (13) Inki mutindu video yai mekumisa ngolo lukanu na nge ya kulanda kusamuna na kikesa yonso ata nge kekutana ti bampasi? (14) Inki mutindu beto lenda sadila video yai sambu na kusadisa bampangi na beto ya kinsuni, balongoki ya Biblia, mpi bantu yankaka?

Konso kilumbu ya keluta keyika dyambu mosi ya mpa na disolo ya Bambangi ya Yehowa. Barapore tatubila nki na yina metala bikesa na beto na kisalu ya kusamuna? Bonso bampangi na beto ya ntangu ya ntama, na kikesa yonso, bika beto landa na kusala nde “nsemo kusema”!—2 Kor. 4:6, NW.