Bambangi ya Yehowa—Lukwikilu ya Kemonana na Bisalu, Kitini 1: Kubasika na Mudidi
Na Biblia, bo kewakanisaka nsemo ti kyeleka, kansi mudidi ti luvunu. (Nk. 43:3; Yez. 5:20) Satana kotisaka mudidi na nsi-ntoto ntangu yandi kusaka Eva, mpi nsuka-nsuka, yandi kotisaka nsi-ntoto ya mvimba na mudidi ya ngolo. (Kus. 12:9) Video Bambangi ya Yehowa—Lukwikilu ya Kemonana na Bisalu, Kitini 1: Kubasika na Mudidi kemonisa mutindu nsemo ya kimpeve yantikaka kubasika na mudidi na nsungi ya bamvula. (Yez. 60:1, 2) Na nima ya kutala video yai, keti nge lenda pesa mvutu na bangyufula yai?
(1) Inki mutindu mudidi ya ngolo kukotaka na nima ya lufwa ya bantumwa? (2) Banda na mvu 1100, nki mambu yantikaka kusalama yina sadisaka bantu na kubakisa nde mabundu vandaka kulonga dyaka ve kyeleka? (3) Henry Grew mpi George Storrs kuvandaka banani? (4) Inki mambu vandaka ti bupusi ya ngolo na luzingu ya Charles Russell? (5) Inki mutindu Mpangi Russell, tata na yandi, mpi mwa banduku na bo, vandaka kutwadisa kimvuka na bo ya kulonguka Biblia, mpi bo bakisaka nki malongi ya Masonuku? (6) Sambu na nki kimvuka yai ya kulonguka Biblia vukanaka ti kimvuka ya Nelson Barbour, kansi nki salaka nde Mpangi Russell kukatuka? (7) Na Yuli 1879, inki salamaka yina vandaka luyantiku ya ntangu mosi ya mpa ya nsemo ya kimpeve? (8) Na nima, Balongoki ya Biblia yina vandaka kukuma kaka mingi salaka nki sambu na kupanza nsangu ya mbote? (9) Bamvula mingi na ntwala, Balongoki ya Biblia vandaka kuvingila nde nki tasalama na 1914? (10) Inki mambu ya mpasi Balongoki ya Biblia kutanaka ti yo na nima ya lufwa ya Mpangi Russell? (11) Balongoki ya Biblia salaka nki ntangu Mpangi Rutherford ti bantu yina vandaka kusala ti yandi basikaka na boloko? (12) Inki mutindu kutala video yai mesadisa nge na kuyedisa nzayilu mpi ntonda na nge sambu na organizasio ya Yehowa? (13) Inki mutindu video yai mekumisa ngolo lukanu na nge ya kulanda kusamuna ti kikesa yonso ata nge kekutana ti bampasi? (14) Inki mutindu beto lenda sadila video yai sambu na kusadisa bampangi na beto ya kinsuni, balongoki ya Biblia, mpi bantu yankaka?
Balongoki ya Biblia yina ya ntete mebikilaka beto dikabu mosi ya kimpeve ya mbalu kibeni! Bo vandaka binati nsemo ya ngolo mpi ya kikesa na nsi-ntoto mosi ya mudidi ya kimpeve. Bika beto landa mbandu na bo mpi beto “landa na kutambula bonso bana ya nsemo.”—Ef. 5:8, NW.