Keti Nge Kelonguka Mambu Yonso Yina Kekatukaka na Yehowa?

1. Inki mutindu Yehowa kekudiwaka na yina metala kulonga?

¹ Yehowa, longi na beto ya nene, kezolaka nde beto vanda bantu yina melongukaka. (Yez. 30:20) Yandi yantikaka kulonga na nima ya kuganga Mwana na yandi ya ntete. (Yoa. 8:28) Na nima ya kukolama ya Adami, Yehowa yambulaka ve kulonga, kansi yandi longaka bantu ya kukonda kukuka na zola yonso.—Yez. 48:17, 18; 2 Tim. 3:14, 15.

2. Inki manaka ya malongi Yehowa kele na kutwadisa bubu yai?

² Bubu yai Yehowa ketwadisa manaka mosi ya kuluta nene ya malongi na disolo ya luzingu ya bantu. Mutindu Yezaya kubikulaka, bamilio ya bantu na nsi-ntoto ya mvimba kemata na “ngumba” ya kifwani ya nzo ya Yehowa. (Yez. 2:2) Sambu na nki beto fwete mata na ngumba yina? Sambu Nzambi kulonga beto na banzila na yandi, ee sambu Yehowa kulonga beto mpenza! (Yez. 2:3) Na mvula ya kisalu 2010, Bambangi ya Yehowa kulutisaka bangunga kuluta bamiliare 1,6 sambu na kuta kimbangi mpi kulonga bantu kyeleka ya Biblia. Dyaka, konso mposo bo kepesaka malongi ya kimpeve na mabundu kuluta 105 000 na nsi-ntoto ya mvimba, mpi mpika ya kwikama mpi ya mayele kebasisaka mikanda ya Bukristu ya kepesaka malongi, na bandinga kuluta 500.

3. Inki mutindu nge mebakaka mambote na malongi yina Yehowa kepesaka?

³ Bakila yo Mambote Mpenza: Beto kebakaka mambote mingi na malongi yina kekatukaka na Nzambi! Beto melongukaka nde Nzambi kele ti zina mpi yandi kekudibanzaka sambu na beto. (Nk. 83:19; 1 Pie. 5:6, 7) Beto mebakaka bamvutu na bangyufula yankaka ya kuluta mfunu bonso yai: Sambu na nki bantu kemonaka mpasi mpi kefwaka? Inki mutindu mono lenda zwa kyese ya kyeleka? Lukanu ya luzingu kele inki? Yehowa mepesaka beto mpi minsiku ya bikalulu ya mbote yina kesadisaka beto na kununga na “mambu yonso.”—Yoz. 1:8.

4. Inki kele mwa mabaku ya malongi yina bansadi ya Nzambi kele na yo, mpi sambu na nki beto fwete longuka mambu yonso yina kekatukaka na Yehowa?

⁴ Dyaka, Yehowa kepesaka malongi ya sipesiali sambu na kusadisa bansadi na yandi mingi na kuyalumuna kisalu ya bo kesadilaka yandi. Na balutiti 4-6, bo metubila mabaku yina bampangi yankaka kele na yo. Ata kana luzingu na beto kepesa beto ve nzila ya kubaka malongi ya bo metubila na balutiti yai, keti beto kebaka mpenza mambote ya malongi ya Nzambi yina luzingu na beto kepesa beto nzila na kubaka? Keti beto kesyamisaka baleke, bayina balongi na bo to bantu yankaka kepusaka bo na kusala banzo-nkanda ya nda ya nsi-ntoto yai, na kuditudila balukanu ya kimpeve mpi kulanda malongi yina Yehowa kepesaka, yina meluta ntama mpenza malongi ya nsi-ntoto? Kulonguka mambu yonso yina kekatukaka na Yehowa tasadisa beto na kuvanda na luzingu mosi ya kyese bubu yai mpi makwisa ya mvula na mvula.—Nk. 119:105; Yoa. 17:3.

Mabaku Yankaka ya Kubaka Malongi Yina Muntu Lenda Vanda na Yo na Organizasio ya Yehowa

Banzo-Nkanda ya Kulonguka Kutanga mpi Kusonika

• Lukanu: Kulonga bantu mutindu ya kutanga mpi ya kusonika sambu bo kuka kulonguka Biblia bo mosi mpi kulonga bantu yankaka kyeleka.

• Ntangu: Na kuwakana ti bampusa ya bantu.

• Kisika: Na Nzo ya Kimfumu.

• Bantu Yina Lenda Kota: Bansamuni yonso mpi bantu yina kesepelaka na kyeleka.

• Mutindu ya Kusadila Yo: Bankuluntu ya dibundu keyidikaka banzo-nkanda ya kulonguka kutanga mpi kusonika na kuwakana ti bampusa ya dibundu mpi bo kesyamisaka bantu yonso yina lenda baka mambote na yo na kukota.

Nzo-Nkanda ya Kisalu ya Teokrasi

• Lukanu: Kulonga bansamuni sambu bo kuma bansamuni ya mbote mpi balongi ya mefwana ya nsangu ya mbote.

• Ntangu: Konso mposo.

• Kisika: Na Nzo ya Kimfumu.

• Bantu Yina Lenda Kota: Bansamuni yonso. Dyaka, bantu yonso yina kevukanaka mpenza ti dibundu, bayina kendimaka malongi ya Biblia, mpi bayina kezingaka na kuwakana ti minsiku ya Bukristu.

• Mutindu ya Kusadila Yo: Solula ti nkengi na Nzo-Nkanda ya Kisalu ya Teokrasi.

Banzo-Nkanda ya Kulonguka Ndinga ya Nzenza

• Lukanu: Kulonga bansamuni mutindu ya kusamuna nsangu ya mbote na ndinga yankaka.

• Ntangu: Bangonda iya to tanu. Mbala mingi bo kesalaka banzo-nkanda yai na Mposo na ntwala ya midi mpi yo kebakaka ngunga mosi to bangunga zole.

• Kisika: Mbala mingi, na Nzo ya Kimfumu yina kele penepene ti kisika bansamuni kevandaka.

• Bantu Yina Lenda Kota: Bansamuni yina kele ti bikalulu ya mbote, bayina kezola kusamuna na ndinga ya nzenza.

• Mutindu ya Kusadila Yo: Biro ya filiale keyidikaka banzo-nkanda yai na kuwakana ti bampusa ya bansamuni.

Kisalu ya Kutunga Banzo ya Kimfumu

• Lukanu: Kutunga mpi kuyidika banzo ya Kimfumu. Yo kele ve nzo-nkanda, kansi na ngidika yai, bo kelongaka bavolontere bisalu ya mutindu na mutindu yina tasadisa bo na kupesa maboko na bisalu ya kutunga.

• Ntangu: Na kuwakana ti luzingu ya bavolontere.

• Kisika: Konso kisika yina kele ti Komite ya Kutunga Banzo na Kitini Mosi ya Insi to Biro ya Kutunga Banzo ya Kimfumu. Bo lenda lomba bavolontere yankaka na kupesa maboko na kisalu ya kusadisa bampangi na bisika ya ntama yina bisumbula mesalama.

• Mambu Yina Bo Kelombaka: Bampangi ya babakala ti ya bankento fwete vanda bayina mebakaka mbotika mpi bayina kimvuka ya bankuluntu mendima. Bo lenda zaba kisalu mosi buna to ve.

• Mutindu ya Kusadila Yo: Fulusa formilere Construction des Salles du Royaume — Questionnaire pour les volontaires (S-82) yina bankuluntu ya dibundu kepesaka to, sambu na Congo, formilere Demande d’admission dans L’ordre international des Serviteurs spéciaux à plein temps Témoins de Jéhovah en tant que Serviteur à la construction de Salles du Royaume (A-12) yina biro ya filiale kepesaka.

Nzo-Nkanda ya Kisalu ya Kimupasudi-Nzila

• Lukanu: Kusadisa bapasudi-nzila na kusala mbote-mbote ‘kisalu na bo’ ya kusamuna.—2 Tim. 4:5.

• Ntangu: Bamposo zole.

• Kisika: Biro ya filiale kesolaka kisika; mingimingi na Nzo ya Kimfumu mosi yina kele penepene.

• Mambu Yina Bo Kelombaka: Bansamuni yina fwete vanda bapasudi-nzila ya ntangu yonso mpi ya mesalaka mvula mosi to bamvula mingi.

• Mutindu ya Kukota: Bo kebingaka mbala mosi bapasudi-nzila yina kelungisaka mambu ya bo kelombaka mpi nkengi ya nzyunga na bo muntu kezabisaka bo.

Nzo-Nkanda Sambu na Bantu ya Mpa na Betele

• Lukanu: Lukanu ya nzo-nkanda yai kele ya kusadisa bantu ya mpa na Betele na kusala kisalu na bo mbote.

• Ntangu: Ngunga mosi konso mposo na nsungi ya bamposo kumi na sambanu.

• Kisika: Betele.

• Mambu Yina Bo Kelombaka: Bo fwete vanda bayina bo mendimaka bonso bantu ya dibuta ya Betele to bavolontere yina fwete sala bantangu mingi (mvula mosi to bamvula mingi).

• Mutindu ya Kukota: Bo kebingaka mbala mosi bantu ya dibuta ya Betele, bayina kelungisaka mambu ya bo kelombaka.

Nzo-nkanda ya Kisalu ya Kimfumu

• Lukanu: Kulonga bankuluntu mpi bansadi ya kisalu na kulungisa mikumba na bo ya kukengila mpi ya kuyidika mambu. (Bis. 20:28) Nto-Kimvuka kebakaka lukanu ya kusadisa nzo-nkanda yai na nima ya mwa bamvula.

• Ntangu: Na bamvula ya mekatuka kuluta, yo salaka kilumbu mosi ti ndambu sambu na bankuluntu mpi kilumbu mosi sambu na bansadi ya kisalu.

• Kisika: Mbala mingi, na Nzo ya Kimfumu yina kele penepene to na Nzo ya Balukutakanu ya Nene.

• Mambu Yina Bo Kelombaka: Bo fwete vanda bankuluntu to bansadi ya kisalu.

• Mutindu ya Kukota: Nkengi ya nzyunga muntu kebingaka bankuluntu mpi bansadi ya kisalu yina kelungisaka mambu ya bo kelombaka.

Nzo-Nkanda Sambu na Bankuluntu ya Dibundua

• Lukanu: Kusadisa bankuluntu na kulungisa mikumba na bo na dibundu.

• Ntangu: Bilumbu tanu.

• Kisika: Biro ya filiale kesolaka kisika; mbala mingi, na Nzo ya Kimfumu to na Nzo ya Balukutakanu ya Nene yina kele penepene.

• Mambu Yina Bo Kelombaka: Bo fwete vanda bankuluntu.

• Mutindu ya Kukota: Biro ya filiale kebingaka bankuluntu yina kelungisaka mambu ya bo kelombaka.

Nzo-Nkanda Sambu na Bankengi-Ntambudi Mpi Bankento na Bob

• Lukanu: Kusadisa bankengi ya nzyunga mpi ya distrike na kutwadisa mabundu mbote mpenza, na ‘kusala ngolo na kupesa malongi ti na kulonga bantu,’ mpi na kugungula bantu yina kele na nsi ya kiyeka na bo.—1 Tim. 5:17; 1 Pie. 5:2, 3.

• Ntangu: Bangonda zole.

• Kisika: Biro ya filiale kesolaka kisika.

• Mambu Yina Bo Kelombaka: Bo fwete vanda bankengi ya nzyunga to ya distrike.

• Mutindu ya Kukota: Biro ya filiale kebingaka bankengi-ntambudi mpi bankento na bo, bayina kelungisaka mambu ya bo kelombaka.

Nzo-Nkanda ya Biblia Sambu na Bampangi-Bakala Yina Mekwelaka Vec

• Lukanu: Kusadisa bankuluntu ti bansadi ya kisalu yina mekwelaka ve na kubaka mikumba ya ngika. Kana nzo-nkanda kumana, bo ketindaka bampangi mingi na kati na bo na kukwenda kusala na bisika yina kele ti mfunu ya bansamuni na insi na bo. Bo lenda tinda bampangi fyoti mpamba na insi yankaka kana bo zabisa biro ya filiale nde bo kele ya kuyilama sambu na kusala na insi yankaka.

• Ntangu: Bangonda zole.

• Kisika: Biro ya filiale kesolaka kisika; mbala mingi, na Nzo ya Kimfumu to na Nzo ya Balukutakanu ya Nene.

• Mambu Yina Bo Kelombaka: Bampangi babakala ya mekwelaka ve, bayina kele ti bamvula na kati ya 23 mpi 62 mpi bayina kele na mavimpi ya mbote; bayina kezola kusadila bampangi mpi kupesa maboko na kisalu ya kusamuna na konso kisika yina kele na mfunu ya bansamuni. (Mar. 10:29, 30) Bo fwete sala bonso bansadi ya kisalu to bankuluntu bamvula zole to mingi kukonda kuyambula.

• Mutindu ya Kukota: Kana nzo-nkanda yai kesalamaka na teritware ya filiale na beno, bo kesalaka lukutakanu mosi na lukutakanu ya nzyunga sambu na bantu yina kezola kukota. Bo kepesaka bansangu yankaka na lukutakanu yina.

Nzo-Nkanda ya Biblia Sambu na BaKristu Ya Mekwelakad

• Lukanu: Kupesa bankwelani formasio mosi ya sipesiali sambu Yehowa mpi organizasio na yandi kusadila bo na mutindu ya mefwana. Kana nzo-nkanda kumana, bo ketindaka bampangi mingi na kati na bo na kwenda kusala na bisika yina kele ti mfunu ya bansamuni na insi na bo. Bo lenda tinda bampangi fyoti mpamba na insi yankaka kana bo zabisa biro ya filiale nde bo kele ya kuyilama sambu na kusala na insi yankaka.

• Ntangu: Bangonda zole.

• Kisika: Banzo-nkanda ya ntete kesalamaka na Centre d’enseignement des Témoins de Jéhovah na Patterson, na New York na États-Unis. Biro ya filiale kesolaka kisika; mbala mingi, na Nzo ya Balukutakanu ya Nene to na Nzo ya Kimfumu.

• Mambu Yina Bo Kelombaka: Bo fwete vanda bankwelani yina kele na bamvula na kati ya 25 mpi 50, bayina kele na mavimpi ya mbote mpi luzingu na bo kepesa bo nzila ya kusala konso kisika yina kele na mfunu ya bansamuni; bayina kele na kikalulu ya kutuba nde, “Mono yandi yai, tinda mono.” (Yez. 6:8) Dyaka, bo fwete vanda bankwelani yina mesala dezia bamvula zole to mingi na makwela mpi bo fwete vanda na kisalu ya ntangu yonso banda bamvula zole to mingi kukonda kuyambula.

• Mutindu ya Kukota: Kana nzo-nkanda yai kesalamaka na teritware ya filiale na beno, bo kesalaka lukutakanu mosi na lukutakanu ya sipesiali ya kilumbu mosi sambu na bantu yina kezola kukota. Bo kepesaka bansangu yankaka na lukutakanu yina.

Gileade, Nzo-Nkanda ya Biblia ya La Société Watch Tower

• Lukanu: Kupesa formasio na bapasudi-nzila mpi bansadi ya ntangu yonso yankaka sambu na kisalu ya kimisionere.

• Ntangu: Bangonda tanu.

• Kisika: Na Centre d’enseignement des Témoins de Jéhovah na Patterson, na New York na États-Unis.

• Mambu Yina Bo Kelombaka: Bo fwete vanda bankwelani yina mebakaka mbotika banda bamvula tatu mpi bo kele na bamvula na kati ya 21 mpi 38 ntangu bo kefulusa formilere na bo ya ntete. Bo fwete zaba kutuba Kingelesi, mpi kuvanda bankwelani yina mesala dezia bamvula zole to mingi na makwela, mpi bo fwete vanda na kisalu ya ntangu yonso banda bamvula zole to mingi kukonda kuyambula. Bo fwete vanda na mavimpi ya mbote. Bapasudi-nzila yina kesalaka na insi ya nzenza (ti bayina kele bamisionere), bankengi-ntambudi, bantu ya dibuta ya Betele, mpi bampangi yina mekotaka Nzo-Nkanda Yina Kelongaka Mutindu ya Kusala Kisalu, Nzo-Nkanda ya Biblia Sambu na Bampangi-Bakala Yina Mekwelaka Ve, mpi Nzo-Nkanda ya Biblia Sambu na Bakristu ya Mekwelaka, lenda kota mpi nzo-nkanda yai kana bo kelungisa mambu yina bo kelombaka.

• Mutindu ya Kukota: Na bafiliale yina Nto-Kimvuka meponaka, bo kesalaka lukutakanu mosi na lukutakanu ya distrike sambu na bantu yina kezola kukota nzo-nkanda yai. Bo kepesaka bansangu yankaka na lukutakanu yina. Kana bo mesala ve lukutakanu yai na lukutakanu ya distrike ya insi na beno kansi nge kezola kukota nzo-nkanda yai, nge lenda sonikila biro ya filiale ya insi na beno sambu na kubaka bansangu yina tasadisa nge.

Nzo-Nkanda Sambu na Bampangi ya Bakomite ya Filiale mpi Bankento na Bo

• Lukanu: Kusadisa bampangi yina kesalaka na Bakomite ya Filiale na kusala mbote kisalu na bo ya kutwadisa ba-Betele, kutula dikebi na mambu ya kisalu yina kepesa mabundu mpasi, mpi kutwadisa bankengi ya nzyunga mpi ya distrike na bateritware na bo, kutwadisa mpi kisalu ya kubalula mikanda, ya kunyema yo, mpi ya kutinda yo na mabundu, mpi kutwadisa babiro ya mutindu na mutindu.—Luka 12:48b.

• Ntangu: Bangonda zole.

• Kisika: Na Centre d’enseignement des Témoins de Jéhovah na Patterson, na New York na États-Unis.

• Mambu Yina Bo Kelombaka: Bo fwete vanda bampangi ya kesalaka na Komite ya Filiale to na Komite ya Insi, to bampangi yina bo mepesaka mukumba ya mutindu yai.

• Mutindu ya Kukota: Nto-Kimvuka kebingisaka bampangi ya babakala ti bankento na bo, bayina kelungisaka mambu ya bo kelombaka.

[Banoti na Nsi ya Lutiti]