Kampanye ya Kubingisa Bantu na Lusungiminu Tayantika na Marsi 17
1. Inki kampanye tayantika na Marsi 17?
1 Lusungiminu ya beto kesalaka konso mvula kesadisaka beto na kusamuna lufwa ya Yezu. (1 Kor. 11:26) Yo yina, beto kezolaka nde bantu yankaka kuvukana ti beto mpi kuwa mambu ya ketadila nkudulu, dikabu ya zola yina Yehowa mepesaka. (Yoa. 3:16) Na mvula yai, kampanye na beto ya kubingisa bantu na Lusungiminu tayantika na kilumbu ya Mposo, Marsi 17. Keti nge kekudibongisa sambu na kusala mingi mpenza na nsungi yina?
2. Inki beto lenda tuba sambu na kukabula baemvitasio?
2 Mambu Yina Beto Lenda Tuba: Yo kele mbote na kusadila bangogo ya nkufi ya kukotila na masolo. Beto lenda tuba nde: “Mbote na nge. Beto mekwisa kupesa dibuta na nge emvitasio yai sambu na nkinsi mosi ya mfunu ya kesalamaka konso mvula yina tasalama na ntoto ya mvimba na Aprili 5. Bo tasala diskure mosi ya ofele ya mesimbama na Biblia, yina tatendula mambu yina lufwa ya Yezu lungisaka mpi mambu yina yandi ke na kusala ntangu yai. Emvitasio yai kemonisa kisika mpi ntangu yina lukutakanu yango tasalama na teritware na beto.” Ntangu beto kekabula baemvitasio na bawikendi, beto fwete kabula mpi bazulunalu, kana mpila kele.
3. Inki mutindu beto lenda bingisa bantu mingi kibeni, kana mpila kele?
3 Bingisa Bantu Mingi Kibeni: Lukanu na beto kele ya kubingisa bantu mingi kibeni, kana mpila kele. Sala ngolo na kubingisa balongoki na nge ya Biblia, bantu yina nge kevutukilaka na kisalu ya kusamuna, bantu ya dibuta, bamfinangani, banduku ya kisalu, banduku ya nzo-nkanda, mpi bantu yankaka yina nge mezaba. Bankuluntu ya dibundu tazabisa beno mutindu ya kusala teritware na beno. Kampanye yina beto kesalaka konso mvula sambu na kubingisa bantu na Lusungiminu kebutaka mbuma ya mbote. Na mvula ya meluta, ntangu nkento mosi vandaka kutambula-tambula na kisika ya lukutakanu, mpangi mosi yina vandaka kusala kisalu ya kuyamba bantu sosaka kusadisa yandi na kumona nsamuni yina bingisaka yandi. Kansi, nkento yina tubaka nde yandi zaba ve ata muntu mosi pana, mpi nde nsamuni mosi yina vandaka kusamuna nzo na nzo muntu pesaka yandi emvitasio kaka kilumbu yina na suka.
4. Sambu na nki beto fwete sala bikesa na kisalu ya kusamuna na kampanye?
4 Ziku muntu mosi takwisa kuvukana ti beno na Lusungiminu kaka sambu nge bikilaka yandi emvitasio. Ata muntu kukwisa to ve, bikesa na nge ya ngolo tapesa bantu kimbangi. Baemvitasio yina nge kekabula tazabisa bantu nde Yezu kele Ntotila mosi ya ngolo ntangu yai. Kikesa na nge sambu na kukabula baemvitasio tamonisa na bantu yonso—na teritware, bampangi yankaka, mpi kuluta mfunu dyaka, Yehowa—nde nge kele na ntonda ya mudindu sambu na dikabu ya nkudulu.—Kol. 3:15.