Beno Vanda Mayele Ntangu Beno Kesamuna
1. Sambu na nki beto fwete vanda mayele ntangu beto kesamuna?
1 “Bonso mameme na kati ya bankoi,” bansadi ya Nzambi kesamunaka “na kati ya bantu ya luvunu ti ya mbi ya ntangu yai.” (Mat. 10:16; Filp. 2:15) Na bisika mingi beto kewa bansangu ya mpasi ya ketubila bitumba, mubulu, mpi kukanga bantu na nku sambu na kubaka mbongo, mpi yo kemonisa nde “mbi” yina bantu kesala kelanda kaka ‘kukuma mingi.’ (2 Tim. 3:13) Kusadila nki minsiku ya Masonuku tasadisa beto na ‘kuvanda mayele’ ntangu beto kesamuna?—Mat. 10:16.
2. Inki mambu lenda sala nde beto katuka na teritware mpi kukwenda kusamuna kisika yankaka?
2 Sala Mambu na Mayele Yonso: Bingana 22:3 kemonisa nde kana muntu ya mayele memona mpasi ke kwisa ‘yandi ketinaka.’ Sala keba! Mambu ya kele na kisika mosi ya mbote lenda soba na kintulumukina. Nge lenda mona nde bapolisi mingi ke na kusala kisalu to bantu mingi mevukana na balabala. Bantangu yankaka muwi mosi ya ntima-mbote lenda kebisa nge. Na kisika ya kubikala pana sambu na kutala, yo kele mayele na kukatuka mbala mosi mpi kukwenda kisika yankaka.—Bing. 17:14; Yoa. 8:59; 1 Tes. 4:11.
3. Inki mutindu beto lenda sadila munsiku yina kele na Longi 4:9 na kisalu ya kusamuna?
3 Kusala na Kimvuka: Longi 4:9 ketuba nde: ‘Kuvanda bantu zole meluta mbote.’ Ata nge meyikanaka kusamuna nge mosi na teritware kukonda kigonsa, keti kikalulu yina kele mbote bubu yai? Na bisika yankaka, yo kele mbote. Kansi na bisika mingi, yo kele kigonsa kana mpangi-nkento to mpangi-bakala kesamuna nzo na nzo yandi mosi, mingi-mingi na nkokila. Mambu yina kesalamaka memonisaka nde kusamuna ti nsamuni yankaka ya ketula dikebi kele mfunu mingi. (Lo. 4:10, 12) Tula dikebi na bampangi yankaka yina beno kesamuna ti bo kumosi. Kana nge kezola kukatuka na teritware, vanda ti kikalulu ya kuzabisa bankaka nde nge mekwenda.
4. Inki mutindu beto lenda sala mambu sambu na lutaninu ya dibundu ya mvimba?
4 Bankuluntu kele ti mukumba ya kupesa lutwadisu ya mefwana na kutadilaka mambu ya kesalamaka na teritware na beno, sambu bo kele ti mukumba ya ‘kulangidila moyo na beto.’ (Baeb. 13:17) Yehowa tasakumuna beto kana beto kemonisa kikalulu ya Bukristu ya kudikulumusa mpi kesala mpenza kumosi ti bo. (Mis. 6:8; 1 Kor. 10:12) Bika nde bansadi yonso ya Nzambi kupesa maboko na kuta mbote-mbote kimbangi na teritware na beto, kansi na mayele yonso.