Bikalulu Yina Ke Pesaka Nzambi Nkembo
1. Sambu na nki bantu ke zabaka beto kukonda mpasi ntangu beto ke kwendaka na balukutakanu ya distrike?
1 Ntangu beto ke kwenda na lukutakanu ya distrike, bantu ke zabaka beto kukonda mpasi. Na bambanza mingi yina lukutakanu ya distrike ke salamaka, bantu ke zabaka yo na nzila ya baradio ti batelevizio mpi bantu ya ke zingaka na kisika yina ke monaka banzenza mingi me lwata bamakaro ya lukutakanu. Bangibusa yai ya ke landa ta sadisa beto na kupesa Nzambi nkembo na nsadisa ya bikalulu ya mbote yina beto ta vanda na yo na bwala yina lukutakanu ya distrike ta salama.—1 Pie. 2:12.
2. Inki mutindu kulwata na beto ya mbote na kisika yina lukutakanu ke salama lenda pesa Nzambi nkembo?
2 Kulwata ya Kukonda Mindondo: Mbala mingi, kulwata na beto ya kukonda mindondo ntangu beto ke kwenda na lukutakanu ke yitukisaka bantu yina ke tala beto. Kansi, mutindu na beto ya kulwata na bantangu ya nkaka, ntangu beto ke dia na barestora, ntangu beto ke sumba bima, mpi buna na buna—lenda vanda na bupusi ya ngolo na bantu ya ke mona beto. Ata na bantangu yai, beto fwete lwata ve bilele ya mindondo to ya kisaka-saka, kansi ya luzitu. Bantu ya ke tala beto fwete bakisa nde beto kele ya kuswaswana ti bantu yina ke kwikilaka ve. (Bar. 12:2) Diaka, beto fwete lwata makaro ya lukutakanu, sambu yo ke sadisaka na kupanza sangu ya lukutakanu, ke pesaka mabaku ya kuta kimbangi mpi yo ke sadisaka bawi ya nkaka yina me kwisa na lukutakanu na kuzaba beto.
3. Inki mutindu beto lenda monisa ntima-nda mpi luzitu?
3 Ntima-Nda mpi Luzitu: Na ntangu yai ya bantu mingi na nsi-ntoto kele na bwimi mpi ke pesaka ve matondo, kikalulu na beto ya kuvanda ntima-nda mpi luzitu ta sepedisa bantu yina ke tala beto, mu mbandu bantu ya barestora! (2 Tim. 3:1-5) Ntangu beto ke bumba bisika ya kuvanda to ke kota na ndonga sambu na kubaka mikanda ya mpa, beto fwete sosa ve mambote na beto mosi kansi ya bantu ya nkaka. (1 Bak. 10:23, 24) Na nima ya kuvukana na mbala ya ntete na lukutakanu ya distrike, bakala mosi yina monisaka mpusa tubaka nde: “Mu ke yibuka ve ata diskure mosi yina salamaka kilumbu yina, kansi bikalulu ya bambangi ya Yehowa simbaka ngolo ntima na munu.”
4. Sambu na nki beto fwete tadila dibaku ya kuvanda bavolontere na lukutakanu ya distrike kana mpila kele?
4 Bansadi ya Luzolo ya Mbote: Kikalulu ya kudipesa na luzolo yonso kele kidimbu ya bakristu ya kieleka. (Nk. 110:3) Keti nge lenda ndima na luzolo yonso kupesa maboko na bisalu ya lukutakanu? Na lukutakanu ya distrike mosi, kiteso ya bampangi 600 ya babakala mpi ya bankento ndimaka kutula bunkete na ntwala nde lukutakanu kuyantika. Bantwadisi ya kisika yina tubaka nde: “Yai kele kima ya kuyituka mingi ya beto me monaka ntete ve! Nge le ndima ve nde bantu yai yonso ke bavolontere.” Beto ke kinga na kiese yonso lukutakanu ya distrike 2013 mpi dibaku yina beto ta vanda na yo ya kuwidikila mpi kulonguka mambu ya Nzambi, mpi diaka dibaku ya kupesa yandi nkembo.
[Lupangu ya kele na lutiti 3-6]
Bangibusa ya Lukutakanu ya Distrike 2013
◼ Bangunga: Bilumbu yonso tatu manaka ta yantika na 8:20. Kansi sambu na bambanza yai ya nene: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire mpi Tshikapa, manaka ya balukutakanu ya distrike ta yantikaka konso kilumbu na 9:20. Bo ta kangula bakielo na 7:00 to na 8:00, na kutadilaka mutindu mambu ke salamaka na bwala na beno. Ntangu mutubi ta zabisa nde miziki ya luyantiku ke zola kubula, beto yonso fwete kwenda kuvanda na bisika na beto na mpila nde manaka kuyantika na mutindu mosi ya me fwana. Manaka ta suka na 15:55 na Kitanu ti na Mposo, mpi na Lumingu yo ta suka na 14:40. Sambu na bambanza ya beto me tanga na zulu, manaka ta sukaka ngunga mosi na nima.
◼ Kubumba Bisika ya Kuvanda: Beno lenda bumba bisika kaka sambu na bantu yina ke zingaka ti beno nzo mosi, bayina ke sala nzietelo ti beno, to bayina ke longukaka Biblia ti beno.—1 Kor. 13:5.
◼ Madia ya Midi: Beto ke lomba beno na kunata madia ya kukonda kilo kansi ya me fwana, mu mbandu: mampa, bambuma (mankondo), nguba, mikati to bagato. Beno fwete tula masa, kafe to te na kima mosi ya ke pasukaka ve sambu kisumbula kusalama ve. Ata muntu mosi ve kele ti nswa ya kunata malafu ya ke lausaka na lukutakanu ya distrike. Kana beto nata madia na beto ti kima ya kunwa, beto ta vanda ve na mfunu ya kusumba bima ya bantu yina ke teka na nganda. Kana beto sumba ve bima na bo, kisika na beto ya lukutakanu ta vanda bunkete mpi yo ta ta kimbangi ya mbote. (Beno simba nde: Bantu yina ke tekaka fwete kota ve ata fioti na kisika ya lukutakanu.—Yoa. 2:13-17.)
◼ Bunkete: Mbala mingi, yo ke monanaka nde bantu yina ke sumbaka madia na bantu yina ke tekaka, ke losaka bapapie to basashe na kibansala. Yo ke salaka nde kibansala ya mvimba kufuluka ti bapapie, basashe, babusho mpi buna na buna. Kana muntu me baka lukanu ya kusumba kima na bantu yina ke tekaka (mu mbandu: bombo, babisikwiti, bagato, mbisi to konso kima ya nkaka), yandi kele ti mukumba ya kulosa papie to sashe yina na kisika ya kulosa bima ya mvindu kansi na ntoto ve. Kana beto mona nde muntu mosi me losa papie to sashe na ntoto, beto fwete lokuta yo mpi kulosa yo na kisika ya kulosa bima ya mvindu. Bampangi, beto ke lomba beno na kusala mpenza kikesa sambu kisika na beto ya lukutakanu mpi nziunga na yo kubikala bunkete. Konso muntu yina kele na lukutakanu fwete bakisa mfunu ya kutula bunkete. Kana konso muntu ke sala mpidina, na nsuka ya kilumbu, kisika ya lukutakanu ta bikala bunkete. Beto fwete monisa bikalulu ya Nzambi ya santu yina beto ke sambilaka.—1 Pie. 1:15, 16; Kub. 19:10; Kul. 23:14.
◼ Makabu: Beto lenda monisa ntonda na beto na bangidika ya lukutakanu ya distrike na kutulaka makabu ya luzolo ya mbote na lukutakanu ya distrike sambu na kisalu yina ke salama na ntoto ya mvimba. Ba chèque yonso yina bantu ke pesa, bo fwete tula yo na zina ya “Association ‘Les Témoins de Jéhovah.’”
◼ Ba-Aksida mpi Maladi ya Kintulumukina: Kana muntu mosi me bela na kintulumukina na kisika ya lukutakanu ya distrike, beto ke lomba beno na kusolula ti mpangi mosi ya kisalu ya kuyamba bantu, ebuna yandi ta zabisa nswalu departema ya Lusadisu ya Ntete na mpila nde bampangi yina kele na lukutakanu mpi ya me zaba kisalu yango mbote kutadila maladi yango mpi kupesa lusadisu na bo.
◼ Bankisi: Kana munganga me lombaka nge na kunwa nkisi mosi buna, kuvila ve na kunata yo, sambu bankisi ya mutindu yina ta vanda ve na lukutakanu. Beno fwete losa bantunga ya bantu ya diabete to bantunga ya nkaka na kisika mosi ya bo me yidika sambu na yo, kansi ve na bisika ya kulosa mvindu ya lukutakanu ya distrike.
◼ Kubaka Bafoto: Kana beno ke baka bafoto ntangu lukutakanu ke salama, beto ke lomba beno na kusadila ve flashe. Beto ke lomba beno na kubingisa ve bantu yina ke kangaka bafoto ya mbongo na kisika ya lukutakanu. Kana beno mona bo na kisika ya lukutakanu, beno ndima ve nde bo kanga beno bafoto.—Yoa. 2:13-17.
◼ Baformilere Veuillez suivre l’intérêt (S-43): Beno ta sadila formilere veuillez suivre l’intérêt sambu na kupesa bansangu ya ke tadila konso muntu yina sepelaka ti nsangu ntangu beno vandaka kuta kimbangi ya dibaku ya mbote na nsungi ya lukutakanu ya distrike. Bansamuni fwete nata formilere mosi to zole na lukutakanu ya distrike. Na nima ya kufulusa yo, beno lenda pesa yo na Departema ya Mikanda to na sekretere ya dibundu na beno ntangu beno ta vutuka.—Tala Kisalu na Beto ya Kimfumu ya Novembri 2009, lutiti 4.
◼ Barestora: Kumisa zina ya Yehowa na bikalulu na nge ya mbote na barestora. Kana na bwala yina yo ke lombaka kukabila bansadi ya restora mwa mbongo, pesa bo.
◼ Na Bisika na Beto ya Kulala: (1) Kana bo me pesa beno kisika ya kulala, beno fwete lutisa ve ntalu ya bantu yina munkwa nzo ndimaka. (2) Kana nge ta lala ve na nzo yina nge lombaka, tuba yo kukonda kusukinina. (3) Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka bangidika yina kele mfunu. (4) Kusadila ve na mutindu ya mbi bangidika yina bo me baka sambu na banzenza. Beto fwete vanda ti bukatikati. (5) Beno fwete tulaka bunkete na kisika ya kulala, kuyidika yo mbote mpi kutula bima na ndonga. Yo ke tadila mpi Nzo ya Kimfumu, yina beno lenda sadila bonso kisika ya kulala sambu na bampangi yina ke katuka na mabundu ya ntama. (6) Monisa mbuma ya mpeve na bangwisana na nge ti bankaka, yo vanda munkwa nzo to bampangi ya nkaka yina bo lenda tula beno nzo mosi.—Gal. 5:22, 23.
◼ Kisalu ya Luzolo ya Mbote: Konso muntu yina ke zola kusala bonso volontere na lukutakanu ya distrike fwete kwenda na Departema ya Bavolontere. Bana yina kele ti bamvula na nsi ya 16 lenda sala kumosi ti bibuti na bo to ti mbuta mosi yina bibuti me pesaka nswa.