“Beno Vanda ti Bikalulu ya Mbote na Kati ya Makanda”

1. Sambu na nki yo kele mfunu nde beto vanda ti bikalulu ya mbote na lukutakanu ya distrike yina ke kwisa?

¹ Beto ke bendaka dikebi ya bantu ntangu beto ke kwendaka na balukutakanu ya nene konso mvula. Yo yina, yo kele mfunu nde bikalulu na beto kumonisa mbote-mbote Nzambi yina beto ke sambilaka. (Levi 20:26) Bikalulu na beto ya mbote, mutindu na beto ya kulwata mpi ya kuyidika nitu fwete monisa pwelele nde beto kele balongoki ya kieleka ya Kristu. Ntangu beto ta kwenda na balukutakanu ya distrike to ya bansi mingi yina ke kwisa, nki mutindu beto lenda “vanda ti bikalulu ya mbote na kati ya makanda” mpi diaka kupesa Tata na beto ya zulu lukumu?—1 Pie. 2:12.

2. Inki mabaku beto ta vanda na yo ya kumonisa bikalulu ya Bukristu na nsungi ya lukutakanu ya nene?

² Monisa Bikalulu ya Bukristu: Zola yina beto ke monisilaka bampangi mpi mutindu beto ke sadilaka “bantu ya nganda” mambu me swaswana kibeni ti mpeve yina ke yalaka nsi-ntoto. (Bakol. 3:10; 4:5; 2 Tim. 3:1-5) Ata kukonda kuwakana kubasika, beto fwete vanda mawete mpi ntima-nda ntangu beto ke sadila bantu ya ke salaka na otele ti bantu ya restora mambu. Bikalulu ya mbote ke pusaka beto na kupesa muntu yina me sadisa beto na otele to na restora mwa mbongo.

3. Inki mambu bo ke yibusa bibuti mpi sambu na nki?

³ Bibuti fwete tanina bana na bo mbote-mbote na kisika yina lukutakanu ya distrike ke salama, na barestora, mpi na ba otele. (Bing. 29:15) Mfumu mosi ya otele zabisaka bakala mosi ti nkento na yandi nde: “Beto ke zolaka beno mingi. Mabuta na beno ke vandaka luzitu mpi na bikalulu ya mbote. Beto yonso na kisalu ke tubilaka bikalulu na beno mpi ke zolaka nde beno kwisa awa konso wikendi.”

4. Ntangu beto kele na mbanza yina lukutakanu ya nene ke salama, nki dikebi beto fwete tula na mutindu na beto ya kulwata?

⁴ Kulwata ya Kukonda Mindondo: Beto fwete lwata mbote mpi kukonda mindondo na lukutakanu ya nene. Kulwata na beto fwete monisa ve mutindu ya nsi-ntoto. (1 Tim. 2:9) Beto fwete lwata ve kisaka-saka ntangu beto ke kota na kisika yina bo ke yambaka bantu na otele, ntangu beto ke basika, to ntangu beto ke baka mupepe na ntwala to na nima ya lukutakanu. Diaka, beto ta vanda na kiese ya kulwata makaro na beto ya lukutakanu mpi beto ta wa ve nsoni na kuta kimbangi ntangu dibaku me monana. Ntangu beto ta kwenda na lukutakanu ya distrike ya 2014, mutindu na beto ya kulwata mpi bikalulu na beto ya mbote ta benda dikebi ya bantu ya masonga na nsangu ya Biblia yina ke gulusaka mpi yo ta sepedisa Yehowa.—Sof. 3:17.

Bangibusa ya Lukutakanu ya Distrike 2014

◼ Bangunga: Bilumbu yonso tatu manaka ta yantika na 8:20. Kansi sambu na bambanza yai ya nene: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire mpi Tshikapa, manaka ya balukutakanu ya distrike ta yantikaka konso kilumbu na 9:20. Bo ta kangula bakielo na 7:00 to 8:00, na kutadilaka mutindu mambu ke salamaka na bwala na beno. Ntangu mutubi ta zabisa nde miziki ya luyantiku ke zola kubula, beto yonso fwete kwenda kuvanda na bisika na beto na mpila nde manaka kuyantika na mutindu mosi ya me fwana. Manaka ta suka na 15:55 na Kitanu ti na Mposo, mpi na Lumingu yo ta suka na 14:40. Sambu na bambanza ya beto me tanga na zulu, manaka ta sukaka ngunga mosi na nima.

◼ Kubumba Bisika ya Kuvanda: Beno lenda bumba bisika kaka sambu na bantu yina ke zingaka ti beno nzo mosi, bayina ke sala nzietelo ti beno, to bayina ke longukaka Biblia ti beno.

◼ Madia ya Midi: Beto ke lomba beno na kunata madia ya kukonda kilo kansi ya me fwana, mu mbandu: mampa, bambuma (mankondo), nguba, mikati to bagato. Beno fwete tula masa, kafe to te na kima mosi ya ke pasukaka ve sambu kisumbula kusalama ve. Ata muntu mosi ve kele ti nswa ya kunata malafu ya ke lausaka na lukutakanu ya distrike. Kana beto nata madia na beto ti kima ya kunwa, beto ta vanda ve na mfunu ya kusumba bima ya bantu yina ke teka na nganda. Kana beto sumba ve bima na bo, kisika na beto ya lukutakanu ta vanda bunkete mpi yo ta ta kimbangi ya mbote. (Beno simba nde: Bantu yina ke tekaka fwete kota ve ata fioti na kisika ya lukutakanu.—Yoa. 2:13-17).

◼ Bunkete: Mbala mingi, yo ke monanaka nde bantu yina ke sumbaka madia na bantu yina ke tekaka, ke losaka bapapie to basashe na kibansala. Yo ke salaka nde kibansala ya mvimba kufuluka ti bapapie, basashe, babusho mpi buna na buna. Kana muntu me baka lukanu ya kusumba kima na bantu yina ke tekaka (mu mbandu: bombo, babisikwiti, bagato, mbisi to konso kima ya nkaka), yandi kele ti mukumba ya kulosa papie to sashe yina na kisika ya kulosa bima ya mvindu kansi na ntoto ve. Kana beto mona nde muntu mosi me losa papie to sashe na ntoto, beto fwete lokuta yo mpi kulosa yo na kisika ya kulosa bima ya mvindu. Bampangi, beto ke lomba beno na kusala mpenza kikesa sambu kisika na beto ya lukutakanu mpi nziunga na yo kubikala bunkete. Konso muntu yina kele na lukutakanu fwete bakisa mfunu ya kutula bunkete. Kana konso muntu ke sala mpidina, na nsuka ya kilumbu, kisika ya lukutakanu ta bikala bunkete. Beto fwete monisa bikalulu ya Nzambi ya santu yina beto ke sambilaka.—1 Pie. 1:15, 16; Kub. 19:10; Kul. 23:14.

◼ Makabu: Beto lenda monisa ntonda na beto na bangidika ya lukutakanu ya distrike na kutulaka makabu ya luzolo ya mbote na lukutakanu ya distrike sambu na kisalu yina ke salama na ntoto ya mvimba. Ba chèque yonso yina bantu ke pesa, bo fwete tula yo na zina ya “Association ‘Les Témoins de Jéhovah.’”

◼ Ba-Aksida mpi Maladi ya Kintulumukina: Kana muntu mosi me bela na kintulumukina na kisika ya lukutakanu ya distrike, beto ke lomba beno na kusolula ti mpangi mosi ya kisalu ya kuyamba bantu, ebuna yandi ta zabisa nswalu departema ya Lusadisu ya Ntete na mpila nde bampangi yina kele na lukutakanu mpi ya me zaba kisalu yango mbote kutadila maladi yango mpi kupesa lusadisu na bo.

◼ Bankisi: Kana munganga me lombaka nge na kunwa nkisi mosi buna, kuvila ve na kunata yo, sambu bankisi ya mutindu yina ta vanda ve na lukutakanu. Beno fwete losa bantunga ya bantu ya diabete to bantunga ya nkaka na kisika mosi ya bo me yidika sambu na yo, kansi ve na bisika ya kulosa mvindu ya lukutakanu ya distrike.

◼ Kubaka Bafoto: Kana beno ke baka bafoto ntangu lukutakanu ke salama, beto ke lomba beno na kusadila ve flashe. Beto ke lomba beno na kubingisa ve bantu yina ke kangaka bafoto ya mbongo na kisika ya lukutakanu. Kana beno mona bo na kisika ya lukutakanu, beno ndima ve nde bo kanga beno bafoto.—Yoa. 2:13-17.

◼ Baformilere Veuillez suivre l’intérêt (S-43): Beno ta sadila formilere veuillez suivre l’intérêt sambu na kupesa bansangu ya ke tadila konso muntu yina sepelaka ti nsangu ntangu beno vandaka kuta kimbangi ya dibaku ya mbote na nsungi ya lukutakanu ya distrike. Bansamuni fwete nata formilere mosi to zole na lukutakanu ya distrike. Na nima ya kufulusa yo, beno lenda pesa yo na Departema ya Mikanda to na sekretere ya dibundu na beno ntangu beno ta vutuka.

◼ Barestora: Kumisa zina ya Yehowa na bikalulu na nge ya mbote na barestora. Lwata na mutindu ya me fwana na Bakristu. Kana na bwala yina yo ke lombaka kukabila bansadi ya restora mwa mbongo, pesa bo.

◼ Na Bisika na Beto ya Kulala:

Kana bo me pesa beno kisika ya kulala, beno fwete lutisa ve ntalu ya bantu yina munkwa nzo ndimaka.
Kana nge ta lala ve na nzo yina nge lombaka, tuba yo kukonda kusukinina.
Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka bangidika yina kele mfunu.
Kusadila ve na mutindu ya mbi bangidika yina bo me baka sambu na banzenza. Beto fwete vanda ti bukati-kati.
Beno fwete tulaka bunkete na kisika ya kulala, kuyidika yo mbote mpi kutula bima na ndonga. Yo ke tadila mpi Nzo ya Kimfumu, yina beno lenda sadila bonso kisika ya kulala sambu na bampangi yina ke katuka na mabundu ya ntama.
Monisa mbuma ya mpeve na bangwisana na nge ti ba nkaka, yo vanda munkwa nzo to bampangi ya nkaka yina bo lenda tula beno nzo mosi.—Gal. 5:22, 23.

◼ Kisalu ya Luzolo ya Mbote: Konso muntu yina ke zola kusala bonso volontere na lukutakanu ya distrike fwete kwenda na Departema ya Bavolontere. Bana yina kele ti bamvula na nsi ya 16 lenda sala kumosi ti bibuti na bo to ti mbuta mosi yina bibuti me pesaka nswa.