Sadila Site Internet na Beto Sambu na Kulonga Bana na Nge
1. Inki kele lukanu ya kitini ya site Internet na beto ya kele ti ntu-diambu “Enfants”?
1 Bo me salaka site Internet na beto, jw.org, sambu na kubenda dikebi ya bambuta ti baleke. Kitini ya site Internet na beto, na Kifalansa, ya kele ti ntu-diambu “enfants” (bweta na La bible et vous, mpi na “Enfants”) ke sadisaka bana ya fioti na kuvanda ti bangwisana ya ngolo ti bibuti na bo mpi ti Yehowa. (Kul. 6:6, 7) Inki mutindu nge lenda sadila kitini yai sambu na kulonga bana na nge?
2. Inki mutindu nge lenda pona masolo ya nge ta longuka ti bana na nge, yina me fwana ti bamvula na bo?
2 Soba Bametode: Konso mwana ke vandaka ti bampusa na yandi. (1 Bak. 13:11) Kansi, nki mutindu nge lenda pona masolo ya nge ta longuka ti bana na nge yina me fwana ti bamvula na bo? Kudiyula nde: ‘Inki masolo ta benda dikebi ya bana na mono? Inki mutindu bo ta bakisa yo? Bantangu ikwa bo ta tula dikebi na disolo yango?’ Nge lenda sadila masolo yina kele na “Malongi na Mono ya Biblia” sambu na kusolula ti bana yina kele ti bamvula tatu to bayina kele baleke kibeni. Mabuta ya nkaka ke sepelaka na masolo ya Biblia yina kele na kitini “Enseignez vos enfants.” Tadila mpi bangindu yai ya ke landa.
3. Inki mutindu bibuti lenda sadila mbote-mbote masolo mpi bisalu (activités) yina kele na nsi ya kitini “Pour le culte familial”?
3 Bitini “pour le culte familial”: Bitini yai kele bisadilu sambu na kusadisa bantwadisi ya mabuta na kulonguka ti bana na bo. Sambu na kuzaba mutindu ya kusadila bitini ya ke tubila masolo mpi bisalu (activités), bweta kisika ya bo me sonika pour le culte familial, na nima bweta na Télécharger, mpi tanga, “Guide des parents,” ya ke tubila konso kitini. Sadila kitini une image, une activité, mu mbandu yina bo me sonika nde coloriage, sambu na kulonga bana ya fioti. Sadisa bana ya kuyela na kuzwa bamvutu na kitini, Apprends en t’amusant. Bisalu yonso (activités) ya bo ke tubila na konso kitini ke tadila disolo to dilongi mosi ya Biblia; mpidina bana yonso, yo vanda bana ya kuyela to ya fioti, lenda tuba na lusambu ya dibuta.
4. Inki mambu beto lenda kuta na kitini “Deviens l’ami de Jéhovah”?
4 Deviens l’ami de Jéhovah: Ba video, bankunga (chansons), bisalu (activités) yina kele na kitini yai ya site Internet na beto, ke sadisaka bibuti na kukotisa Ndinga ya Nzambi na ntima ya bana na bo ya fioti. (Kul. 31:12) Konso video ya nkufi ke longaka dilongi mosi ya mfunu. Bitini activités, mu mbandu bansaka ya kusosa mpi kuzwa bima, ke monisa mfunu ya malongi yai. Sambu mbala mingi bana ke zolaka kuyimba—mpi bankunga ke sadisaka bo na kuyibuka mambu yina bo me longuka—bo ke tulaka mbala na mbala na Internet, bankunga ya Kimfumu mpi bankunga yina bo me sala mingi-mingi sambu na bana.
5. Sambu na nki bibuti fwete lomba Yehowa lusadisu sambu na kulonga bana na bo kieleka?
5 Bibuti, Yehowa ke zola nde beno lungisa mbote-mbote mukumba na beno. Yo yina, beno lomba Yehowa lusadisu sambu na kulonga bana na beno kieleka. (Baz. 13:8) Ti lusadisu ya Yehowa, beno lenda longa bana na beno na kukuma “mayele sambu na kubaka luguluku na nsadisa ya lukwikilu na Kristu Yezu.”—2 Tim. 3:15; Bing. 4:1-4.