Kubikila Bantu Bazulunalu Mbala na Mbala—Kele Mfunu Sambu na Kuyantika Kulonguka Biblia
1. Sambu na nki organizasio ya Yehowa ke siamisaka bansamuni banda ntama na kubikila bantu bazulunalu mbala na mbala?
1 Bantu ke zolaka ve kulonguka Biblia ti beto, kansi bo ke sepelaka na kutanga bazulunalu na beto. Yo yina, organizasio ya Yehowa ke siamisaka bansamuni banda ntama na kubikila bantu bazulunalu mbala na mbala. Ntangu bantu ke tanga bazulunalu na beto mbala na mbala, mbala mingi yo ke pesaka bo nzala ya ngolo ya Ndinga ya Nzambi. (1 Pie. 2:2) Ntembe kele ve nde mambu ya bo ke tanga lenda sepedisa bo na kundima kulonguka Biblia.
2. Inki mutindu beto lenda yedisa mpusa ya bantu yina beto ke bikilaka bazulunalu mbala na mbala?
2 ‘Losila’ Bankeni ya Kieleka Masa: Na kisika ya kubikila muwi bazulunalu mpamba, yantika disolo mpi sala bangwisana ti yandi. Kusala mutindu yai ta sadisa nge na kuzaba mambu ya ke tadila luzingu na yandi, mambu ya ke sepedisaka yandi mpi balukwikilu na yandi. Kuzaba mambu yai ta pesa nge nzila ya kusolula ti yandi na mayele yonso. (Bing. 16:23, NW) Kudibongisa mbote na ntwala ya konso viziti. Kana mpila kele, tendudila muwi ngindu mosi mpi beno tadila verse ya ke wakana ti ngindu yango yina kele na bazulunalu sambu na kulosila bankeni ya kieleka yina kele na ntima na yandi masa. (1 Bak. 3:6) Sonika dati ya konso viziti, mikanda ya nge bikisaka, disolo ya beno solulaka mpi baverse ya beno tangaka.
3. Mbala nkwa beto fwete vutukila bantu yina beto ke bikilaka bazulunalu mbala na mbala?
3 Mbala Nkwa Nge Fwete Vutukila Bo? Nge fwete vutukila bantu ya mutindu yai mbala mosi na ngonda sambu na kupesa bo bazulunalu ya mpa. Kansi, sambu yo ke tadila mambu na nge mosi mpi dikebi yina bawi ke tula, nge lenda vutukila bo mbala na mbala. Mu mbandu, mposo mosi to bamposo zole na nima ya kubikila muntu bazulunalu, nge lenda vutukila yandi mpi kuzabisa yandi nde: “Mu me kwisa kutala nge sambu na mwa ntangu fioti mpi kubenda dikebi na nge na disolo mosi na bazulunalu yina mono bikilaka nge.” Diambu yai ta pesa muntu nzala ya kutanga disolo yango. Kana yandi me tanga yo dezia, nge lenda yula yandi mambu yina yandi ke yindulaka sambu na disolo yango mpi kutadila yo na bunkufi. To kana muntu yango ke sepelaka na kutanga mikanda na beto, nge lenda vutukila yandi mpi kupesa yandi trakiti, kamukanda to mukanda yina beto ke kabula na ngonda yina.
4. Inki beto lenda sala mbala na mbala sambu na kuzaba kana bantu yina beto ke bikilaka bazulunalu kele ti luzolo ya kulonguka Biblia?
4 Kuvingila ve nde muwi kulomba nge na kulonguka Biblia ti yandi. Sala kitambi ya ntete. Ata yandi buyaka kulonguka Biblia na bilumbu ya me luta, nge lenda sadila mbala na mbala “Bamvutu na Bangiufula ya Biblia” na Nzozulu ya Nkengi sambu na kuzaba kana yandi kele ti luzolo ya kusolula ti nge. Ziku, nge lenda yantika ntete kulonguka ti yandi na ntwala ya kielo na yandi. Kansi, kana nge ke kuka ve kulonguka ti yandi, nge lenda landa na kunatila yandi bazulunalu sambu na kuyedisa mpusa na yandi.