Mutindu ya Kuyantika Kulonguka Biblia ti Bantu Yina Beto Kepesaka Baperiodike Mbala na Mbala
1. Inki kevandaka lukanu na beto ntangu beto kekabulaka baperiodike?
1 Mbala mingi, konso kilumbu ya Mposo beto kekabulaka Nzozulu ya Nkengi ti Réveillez-vous ! na kisalu ya kusamuna. Kansi, yai kele kaka kitambi ya ntete sambu na kulungisa lukanu na beto ya kulonga kyeleka na bantu ya ntima ya masonga. Beno takuta na nsi mwa mabanza yina kemonisa mutindu ya kukabula mukanda Biblia Kelongaka ntangu beto kevutukila bantu, mpi kuyantika kulonguka Biblia ti bo. Nge lenda soba yo sambu yo wakana ti bantu ya teritware na beno mpi kutuba yo na bangogo na nge mosi. nge lenda sadila metode yankaka kana yo kele mbote sambu na nge.
2. Inki mutindu beto lenda sadila balutiti ya luyantiku ya mukanda Biblia Kelongaka sambu na kuyantika kulonga Biblia ti muntu?
2 Sadila Balutiti ya Luyantiku: Ntangu nge tavutukila muntu yango, nge lenda tuba nde: “Baperiodike yina mu bikilaka nge kebenda dikebi na beto na Biblia. Tala sambu na nki kutanga Biblia kele mfunu mpenza.” Tanga Yezaya 48:17, 18; Yoane 17:3; to verse yankaka ya mefwana. Ebuna, na nima ya kusonga muwi mukanda Biblia Kelongaka mpi kupesa yandi kopi mosi ya mukanda yango, nge lenda tuba mutindu yai:
◼ “Biblia kepesa beto kivuvu ya kyeleka sambu na bilumbu kekwisa.” Songa muwi balutiti 4-5, mpi yula yandi nde, “Na kati ya balusilu yai, inki lusilu nge tazola nde yo lungana?” Benda dikebi na yandi na kapu yina ketubila lusilu ya Biblia ya yandi mepona, mpi beno tadila na bunkufi paragrafe mosi to zole kana yandi mezola.
◼ To nge lenda tuba nde, “Biblia kepesa mvutu na bangyufula ya kuluta mfunu ya ketala luzingu.” Benda dikebi na yandi na lutiti 6, mpi yula yandi kana yandi mekudiyulaka dezia ngyufula mosi na kati ya bangyufula yina kele na nsi. Kangula kapu yina kepesa mvutu na ngyufula yango, mpi beno tadila na bunkufi paragrafe mosi to zole.
◼ To nge lenda tubila mwa bantu-dyambu yina kele na mambu yina ke na kati mpi kuyula yandi masolo yina mesepedisa yandi. Kangula kapu yango mpi monisa na bunkufi mutindu kulonguka Biblia kesalamaka.
3. Inki mutindu beto lenda yantika kulonguka Biblia ti muntu na nima ya kupesa yandi baperiodike yina ketubila (a) mutindu mambu ya ntoto mebeba ngolo kibeni? (b) dibuta? (c) bikuma ya kutudila Biblia ntima?
3 Bika Ngyufula Mosi na Vizite ya Ntete: Metode yankaka kele kutula fondasio ya vizite yina kekwisa na vizite ya ntete. Kana muwi kundima baperiodike, yula ngyufula, mpi pesa yandi dilaka nde nge tapesa yandi mvutu na ntangu nge tavutukila yandi. Beno wakana mbote kilumbu ti ntangu yina nge tavutukila yandi, mpi sala yonso sambu na kuvutukila yandi na kilumbu mpi ntangu ya beno wakanaka. (Mat. 5:37) Ntangu nge tavutuka, yibusa muwi ngyufula yina nge yulaka na mbala ya ntete, beno tanga mpi beno tadila na bunkufi mvutu na nsadisa ya mukanda Biblia Kelongaka. Pesa muwi kopi mosi ya mukanda sambu yandi landa ntangu nge ketanga. Tala mwa bambandu yai:
◼ Kana periodike ya nge pesaka ketubila mutindu mambu ya ntoto mebeba ngolo kibeni, nge lenda tuba nde, “Na mbala kekwisa beto lenda tadila mvutu ya Biblia kepesa na ngyufula yai, Inki bansoba Nzambi tasala na ntoto?” Ntangu nge tavutuka, sadila balutiti 4-5. To nge lenda yula ngyufula, “Keti mambu ya mpasi ya beto kekutanaka ti yo kele luzolo ya Nzambi?” Ntangu nge tavutukila yandi, songa muwi baparagrafe 7-8 ya kapu 1.
◼ Kana periodike ya nge pesaka ketubila dibuta, na ntwala ya kukwenda nge lenda yula ngyufula yai, “Konso muntu ya dibuta lenda sala nki sambu luzingu ya dibuta kuvanda na kyese mingi?” Ntangu nge tavutuka, beno tadila paragrafe 4 ya kapu 14.
◼ Kana periodike ya nge pesaka ketubila bikuma ya kutudila Biblia ntima, nge lenda yula ngyufula yai sambu na vizite yina kekwisa, “Keti Biblia kele sikisiki na mambu ya siansi?” Ntangu nge tavutukila yandi, beno tadila paragrafe 8 ya kapu 2.
4. Inki beto fwete sala kana muwi mebuya kubaka mukanda Biblia Kelongaka?
4 Na nsuka ya konso disolo, yula ngyufula yankaka yina nge tapesa mvutu na vizite ya kekwisa. Kana beno mekuma kulonguka mbala na mbala, beno yantika kulonguka mukanda yango na ndonga banda na kapu ya ntete tii na kapu ya nsuka. Inki beto fwete sala kana muwi mebuya kubaka mukanda Biblia Kelongaka? Nge lenda landa kaka na kunatila yandi baperiodike, mpi kusolula masolo ya Biblia ti yandi. Ntangu nge tayedisa mpusa na yandi, nsukansuka yandi lenda ndima kulonguka Biblia.
5. Sambu na nki beto fwete suka ve kaka na kupesa bantu baperiodike?
5 Nzozulu ya Nkengi mpi Réveillez-vous ! lenda pesa muntu mpusa ya kulonguka mambu yina Biblia kelongaka mpenza. Yo yina, sala mpenza kikesa sambu na kuyantika kulonguka Biblia ti bantu yina kendimaka kubaka baperiodike. Kana beto kesala mutindu yina, beto talemfuka na bantuma ya Yezu ya ‘kukumisa bantu yonso balonguki, mpi ya kulonga bo.’—Mat. 28:19, 20.