Beto Yedisa Mayele na Beto na Kisalu ya Kusamuna—Beto Kabula Mukanda Biblia Kelongaka

Mfunu na Yo: Mukanda Biblia Kelongaka kele kisadilu ya ntete ya beto ke sadilaka sambu na kulonguka ti bantu. Kansi, na ntwala ya kusadila yo sambu na kulonguka ti muntu, beto fwete pesa yandi yo ntete. Yo yina, beto fwete sala kikesa sambu na kuzaba mbote mutindu ya kukabula mukanda Biblia Kelongaka na kisalu ya kusamuna. (Bing. 22:29) Bametode ya kusadila kele mingi mpi bansamuni fwete pona metode ya bo ke mona nde yo kele mbote sambu na bo.

Mutindu ya Kusala Yo:

Yula muwi ngiufula mosi ya ke benda dikebi sambu na kunata yandi mbala mosi na kapu ya mukanda yina ke pesa mvutu na ngiufula yango. Nkutu, nge lenda pona ngiufula mosi ya kele na luyantiku ya konso kapu. Na nima ya kuwa mvutu ya muwi, tangila yandi verse mosi ya me fwana. Songa yandi paragrafe yina ke tubila disolo yango mpi beno lenda tadila yo mwa fioti.
Metode ya nkaka kele ya kusadila balutiti ya luyantiku sambu na kutedimisa mpusa ya muwi. Na nima, songa yandi kisika yina mukanda yango ke pesa mvutu ya Biblia. Mu mbandu, nge lenda tubila diambu mosi ya mpasi ya nge me wa to ya nge me mona na bansangu mpi kumonisa yandi nde bantu mingi ke sosaka kubaka bamvutu na bangiufula ya kele na lutiti 3. To nge lenda tuba nde nge ke tala bantu sambu na kuzabisa bo mambu ya mbote yina ta salama na bilumbu ke kwisa. Na nima, songa yandi bifwanisu ya kele na balutiti 4-5 mpi yula yandi nde: “Na kati ya balusilu yai, nki lusilu nge ke zola nde yo lungana?” Diaka, nge lenda tuba nde nge ke tala bantu ntangu fioti sambu na kusadisa bo na kubaka bamvutu na bangiufula ya mfunu ya luzingu. Na nima, songa muwi bangiufula yina kele na nsuka ya lutiti 6 mpi yula yandi nde: Inki ngiufula ke benda dikebi na nge mingi?
Sadila metode yai sambu na kuyantika kulonguka Biblia ti muntu mbala mosi. Nge lenda tuba nde: “Beto ke songa bantu mukanda mosi ya beto ke sadilaka sambu na kulonguka Biblia ti bantu. Keti nge me monaka yo dezia? [Bika muntu yango kupesa mvutu.] Kana nge kele ti mwa ntangu, mono lenda songa nge mutindu nge lenda sadila yo ti Biblia na nge mosi.”

Sadila Yo Ngonda ya Mvimba:

Beno sala bansonga ntangu beno ke sala lusambu ya dibuta.
Ntangu nge kele na kisalu ya kusamuna, songa bansamuni ya nkaka mambu ya nge ke kana kutuba. (Bing. 27:17) Soba bangogo na nge ya kukotila na masolo kana yo kele ve mbote.