Keti Nge Memonisaka Dezia na Viziti ya Ntete Mutindu Beto Kelongukaka Biblia ti Bantu?

Ntangu beto kelombaka bantu na kulonguka Biblia ti bo, bankaka ketubaka nde bo kesepelaka na yo ve to nde bo kelongukaka dezia Biblia na dibundu na bo. Sambu bo lenda zaba ve nde beto kelongukaka Biblia na mutindu ya meswaswana ti mabundu yankaka, bo mezaba ve nde yo lenda vanda eksperiansi mosi ya kyese mpi yina tasadisa bo na kulonguka mambu mingi. Yo yina, na kisika kaka ya kulomba bo na kulonguka, sambu na nki ve kubaka mwa minuta sambu na kumonisa na viziti ya ntete mutindu beto kelongukaka Biblia ti bantu? Beto lenda sala yo mutindu yai: Kusuka ve kaka na kuzabisa bo nde nge kelambaka mbote mpi kuzabisa bo nde nge tanatila bo madya na nima; kaka na ntangu yina pesa bo mwa ndambu ya madya sambu bo meka! Yai kele mutindu nge lenda sala yo kaka na mwa minuta fyoti, na kutadila ngindu ya kele na lutiti 6 ya Kisalu na Beto ya Kimfumu ya Yanuari 2006:

“Keti nge keyindula nde kele ti kilumbu bangogo yai talungana? [Tanga Yezaya 33:24, mpi bika muntu yango kupesa mvutu.] Bika mu songa nge kima mosi ya mfunu na disolo yai.” Pesa muwi kopi mosi ya mukanda Biblia Kelongaka, mpi songa yandi paragrafe 22 na lutiti 36. Tanga ngyufula yina kele na nsi ya lutiti, mpi lomba yandi na kusosa mvutu na ntangu nge ketanga paragrafe. Na nima yula dyaka ngyufula, mpi widikila mvutu ya muwi. Beno tanga kumosi verse yankaka na kati ya baverse ya kele na paragrafe yina. Yula ngyufula yina nge tapesa mvutu na viziti ya kekwisa, mpi beno baka bangidika sambu nge vutukila yandi. Nge mekatuka kuyantika kulonguka ya Biblia!