Longuka ti Bantu na Kamukanda Nsangu ya Mbote
1. Inki mutindu bo me yidikaka kamukanda Nsangu ya Mbote?
1 Mutindu beto monaka yo na Kisalu na Beto ya Kimfumu ya Yuli, kamukanda Nsangu ya Mbote ya Mekatuka na Nzambi! kele kisadilu mosi ya mfunu sambu na kulonguka ti bantu. Na kamukanda yai, bo me vutukila ve bangogo ya baverse sambu bawi kutanga yo mbala mosi na Biblia. Mbala mingi, bo ke sonikaka mikanda na beto ya kulongukila na mpila nde muntu lenda longuka yandi mosi. Kansi, bo me basisaka kamukanda yai sambu nde muntu mosi kulonguka ti muntu ya nkaka. Yo yina, kana beto me pesa muntu kamukanda yai, beto fwete songa yandi mutindu beto ke longukaka ti bantu sambu yandi longuka nsangu ya mbote ya kele na Biblia.—Mat. 13:44.
2. Inki mutindu beto lenda sadila kamukanda Nsangu ya Mbote na mbala ya ntete ya beto me kutana ti muntu?
2 Na Mbala ya Ntete ya Nge Me Kutana ti Muntu: Nge lenda tuba nde: “Mono me kwisa kutala nge sambu bantu mingi ke kudiyangisa sambu na bilumbu ya ke kwisa. Keti nge ke yindula nde mambu ya luzingu ta bonga? [Bika muntu yango kupesa mvutu.] Biblia kele ti nsangu ya mbote ya ke pesa kivuvu. Yo ke pesa mvutu na bangiufula yai.” Pesa muwi kamukanda mpi lomba yandi na kupona ngiufula mosi ya kele na lutiti ya nsuka. Na nima, sadila paragrafe ya ntete ya dilongi yango sambu na kulonguka ti yandi. Nge lenda sadila metode ya nkaka: Yula muwi ngiufula ya nge me pona na dilongi mosi mpi monisa yandi mutindu kamukanda yai lenda sadisa yandi na kubaka mvutu ya Biblia. Kana dilongi yango ke wakana ti mambu ya kele na video mosi na jw.org, bansamuni ya nkaka ke songaka muwi video ntangu bo ke sadila bangogo na bo ya kukotila na masolo.
3. Tendula mutindu ya kulonguka ti muntu na kamukanda Nsangu ya Mbote.
3 Mutindu ya Kulonguka ti Muntu: (1) Tanga ngiufula yina kele na bisono ya ndombe mingi sambu na kusadisa muwi na kutula dikebi na ngindu ya mfunu. (2) Tanga paragrafe ya ngiufula yango. (3) Tanga baverse ya bo me tengimisa bisono mpi sadila bangiufula ya mayele sambu na kusadisa muwi na kumona mutindu baverse yango ke pesa mvutu na ngiufula ya nge yulaka. (4) Kana paragrafe ya nkaka me landa yina nge me tanga, vutukila ditonsi ya 2 mpi ya 3. Kana video mosi ke wakana ti ngiufula yina mpi nge me songaka yo ntete ve muwi, nge lenda songa yandi yo na ntangu beno ke solula. (5) Na nsuka, lomba muwi na kupesa mvutu ya ngiufula yina beno me tadila sambu na kuzikisa kana yandi me bakisa.
4. Inki ta sadisa beto na kusadila kamukanda yai na mayele yonso?
4 Yikama ti kamukanda yai mpi sadila yo na mabaku yonso. Na ntwala ya kuvutukila longoki na nge, zaba mambu na yandi mpi tadila mutindu ya mbote ya kuyindula ti yandi na nsadisa ya baverse ya kele na dilongi yango. (Bing. 15:28; Bis. 17:2, 3) Kana nge me zaba kusadila kamukanda yai mbote-mbote, nge ta kuma kuzola yo mingi sambu na kulongila bantu kieleka!