Beto Yedisa Mayele na Beto na Kisalu ya Kusamuna—Sadila Kamukanda Nsangu ya Mbote! Sambu na Kulonguka Biblia ti Muntu na Ntwala ya Kielo
Mfunu na Yo: Sambu na kukumisa bantu balongoki, beto fwete vanda balongi ya mbote ya Ndinga ya Nzambi. (Mat. 28:19, 20) Beto yonso lenda longa kieleka mbote-mbote kana beto ke sadila bisadilu yina bo me pesaka beto. Bo basisaka kamukanda Nsangu ya Mbote ya Mekatuka na Nzambi! sambu yo sadisa beto na kulonga bantu kieleka. Yo yina, beto lenda sadila yo sambu na kuyantika kulonguka Biblia ti muwi na mbala ya ntete ya beto me kutana ti yandi na ntwala ya kielo.
Sadila Yo Ngonda ya Mvimba:
Lomba Yehowa na kupesa nge kikesa ya kulonguka ti muntu Biblia. Diaka, samba yandi sambu yandi sadisa nge na kuyantika kulonguka Biblia ti muntu mpi na kukuma longi ya mbote ya kieleka.—Bafil. 2:13.
Ntangu beno ke sala lusambu ya dibuta to ntangu nge ke longuka nge mosi, baka ntangu ya kulonguka bangogo ya kukotila na masolo. Mpidina, nge lenda tuba ti lukwikilu sambu na kuyantika kulonguka ti muntu Biblia na ntwala ya kielo ntangu nge kele na kisalu ya kusamuna.