Kamukanda ya Mpa Yina Beto Takabula!
1. Inki mukanda beto takabula na Novembri, mpi nki kele lukanu na yo?
1 Na Lukutakanu na beto ya Distrike ya mvu 2009 “Beno Kangula Meso!” kamukanda mosi ya mpa kubasikaka ya kuvandaka ti ntu-dyambu La Bible — Quel est son message ? Na ngonda ya Novembri, mabundu yonso na ntoto ya mvimba takabula yo sambu na mbala ya ntete. Inki mutindu mukanda yai tanatila bantu ya teritware na beto mambote? Bantu mingi, mingi-mingi bayina kele na mabundu yina kele ve ya Bukristu, kezabaka mambu fyoti na yina metala Biblia. Yo yina kamukanda yai ketendula na lutiti 3 nde, lukanu na yo kele ya “kupesa ngindu ya kimvuka ya Biblia.”
2. Inki mutindu beto lenda kabula kamukanda yai?
2 Mutindu ya Kukabula Yo: Beto lenda tuba nde: “Beto tazola kuzaba dibanza na nge na mambu yai. [Tanga 2 Timoteo 3:16.] Bantu mingi yina beto kesolulaka ti bo kendimaka bangogo yai; bankaka kemonaka nde Biblia kele kaka mukanda mosi ya kitoko. Inki nge keyindula na yina metala Biblia? [Bika muntu yango kupesa mvutu.] Ata dibundu na beto kele ti inki balukwikilu yina, yo kele ti bikuma ya mbote ya kutadila Biblia beto mosi. [Tanga paragrafe ya luyantiku ya kele na zulu ya lutiti 3.] Ntangu nge ketanga na bunkufi mambu ya Biblia ya kele na kamukanda yai, nge tamona dyambu mosi ya kebenda dikebi: Biblia kele kaka ti ntu-dyambu mosi mpi nsangu mosi.”
3. Inki kele bangogo yankaka ya kukotila na masolo ya beto lenda sadila, mingi-mingi na teritware yina bantu mingi ke na mabundu yina kele ve ya Bukristu?
3 Tala mutindu yankaka ya kutuba, mingi-mingi ntangu beto kesamuna kisika yina bantu mingi kele bantu ya mabundu yina kele ve ya Bukristu: “Beto tazola kuzaba dibanza na nge na mambu yina masonuku ketuba awa (to na mukanda yai ya santu). [Tanga Nkunga 37:11.] Nge keyindula nde ntoto tavanda inki mutindu ntangu mbikudulu yai talungana? [Bika muntu yango kupesa mvutu.] Yai kele kaka mbandu ya kivuvu mpi ya kikesa yina bantu ya binkulu mpi ya balukwikilu yonso lenda baka na nsadisa ya Biblia.” Tanga paragrafe yina kele na zulu ya lutiti 3, mpi pesa muwi kamukanda.
4. Inki mutindu beto lenda sadila kamukanda yai sambu na kuyantika kulonguka Biblia ti muntu?
4 Yantika Kulonguka Biblia ti Muntu: Ntangu beto mevutukila muwi, beto lenda yibusa yandi masolo yina beto solulaka na mbala meluta mpi kutadila paragrafe mosi to baparagrafe zole ya disolo yina beto solulaka, na kusadilaka bangyufula yina kele na nsuka ya kitini yina mefwana. To kana beto kezola kulonguka mbala mosi mukanda Biblia kelongaka, beto lenda tanga ti yandi mambu yina kele na lutiti ya nsuka ya kamukanda, kupesa yandi kamukanda, kuyula yandi bantu-dyambu ya inki bakapu mesepedisa yandi, mpi kutadila kumosi ti yandi paragrafe mosi to baparagrafe zole ya kapu yina. Bika nde beto yonso kusala mingi sambu na kukabula kamukanda yai na Novembri!