Mutindu ya Kusadila Nsangu ya Mbote ya Mekatuka na Nzambi!
Kamukanda ya Mpa Sambu na Kusadisa Beto na Kusala Bamvutukila ya Mpa mpi Kuyantika Kulonguka Biblia ti Bantu
1. Inki kamukanda basikaka na Lukutakanu ya Distrike, “Tanina Ntima na Nge,” sambu na kusadisa beto na kusala bamvutukila ya mpa mpi kuyantika kulonguka Biblia ti bantu?
1 Na Lukutakanu ya Distrike, “Tanina Ntima na Nge,” beto vandaka na kiese ya kubaka kamukanda ya mpa sambu na kusadisa beto na kusala bamvutukila ya mpa mpi kuyantika kulonguka Biblia ti bantu. Nsangu ya Mbote ya Mekatuka na Nzambi! me yinga kamukanda Inki Nzambi Kelombaka; kansi yo kele kiteso mosi sambu malongi na yo kele ya nkufi. Malongi na yo ya nkufi ta sadisa beto na kusadila mbote kamukanda yai sambu na kulonguka Biblia ti bantu na ntwala ya kielo. Kamukanda Inki Nzambi Kelombaka vandaka kutubila mambu yina Bakristu fwete sala; balongoki ya mpa lendaka kundima mambu yango na mpasi; Kansi kamukanda yai ya mpa ke benda dikebi na nsangu ya mbote yina kele na Biblia.—Bis. 15:35.
2. Sambu na nki bo basisaka kamukanda Nsangu ya Mbote?
2 Sambu na nki bo basisaka yo? Bampangi ya ntoto ya mvimba vandaka kulomba kamukanda mosi ya pete yina lenda benda bantu na kieleka mpi kulonguka ti bo na mukanda Biblia Kelongaka, kisadilu na beto ya ntete ya kulonguka Biblia ti bantu. Mbala mingi, bantu yina ke waka boma ya kulonguka na mukanda ke ndimaka kulonguka Biblia na kamukanda. Diaka, kamukanda ke vandaka mpasi mingi ve na kubalula na bandinga mingi.
3. Inki mutindu kamukanda yai me swaswana ti mikanda ya nkaka ya kulonguka?
3 Mutindu Bo Me Yidika Mambu na Kati: Bo ke sonikaka mikanda na beto mingi ya kulongukila na mutindu yina muntu lenda tanga yo mpi kubakisa kieleka, ata yandi mosi. Mukanda yai kele ya kuswaswana. Bo me sonika yo sambu na kulonguka Biblia kaka ti longi. Yo yina, ntangu nge ke pesa yo muntu, yo ta vanda mbote na kutadila paragrafe mosi to zole. Sambu baparagrafe kele nkufi, beno lenda tadila yo ti muntu na ntwala ya kielo to na kisika na yandi ya kisalu. Ata yo kele mbote na kuyantika na dilongi 1, beto lenda yantika kulonguka mpi na konso dilongi ya nkaka.
4. Inki mutindu kamukanda yai ke sadisaka beto na kulonga mbala mosi na Biblia?
4 Na mikanda na beto mingi, muntu lenda zwa bamvutu na bangiufula na kati ya baparagrafe. Kansi, na mukanda yai, bamvutu kele ntete-ntete na Biblia. Bantu mingi ke zolaka kulonguka mbala mosi na Biblia kansi na mikanda na beto ve. Yo yina, bo me vutukila ve bangogo ya baverse mingi. Beno fwete tanga yo mbala mosi na Biblia. Yo ta sadisa balongoki na kubakisa nde mambu ya bo ke longuka ke katuka na Nzambi.—Yez 54:13.
5. Sambu na nki yo kele mfunu nde longi kudibongisa mbote konso ntangu na ntwala ya kulonguka?
5 Kamukanda yai ke tendula ve baverse yonso. Sambu na nki? Bo me sala yo sambu na kupusa balongoki na kuyula bangiufula mpi ke sadisa longi na kusadila mayele na yandi ya kulongila. Yo yina, kudibongisa mbote konso ntangu na ntwala ya kulonguka kele mfunu. Mwa lukebisu: Kutuba ve mingi. Beto ke zolaka kutendula Masonuku. Kansi beto ke sadisaka mingi longoki kana beto ke lomba yandi na kutendula masonuku. Kana beto ke sadila bangiufula na mayele yonso, beto lenda sadisa yandi na kusosa kubakisa konso verse.—Bis 17:2.
6. Inki mutindu beto lenda sadila kamukanda yai: (a) na kisika yina bantu ke ndimilaka ve Nzambi mpi Biblia? (b) na kisalu ya nzo na nzo? (c) ntangu beto ke sadila metode ya mbala mosi sambu na kuyantika kulonguka Biblia ti bantu? (d) na ntangu ya kusala bamvutukila?
6 Beto lenda pesa kamukanda yai konso ntangu, yo vanda beto ke kabula mikanda ya nkaka na ngonda yina, kaka bonso beto ke salaka sambu na mikanda ya nkaka ya kulonguka ti bantu. Bantu mingi ta sepela kusadila metode ya mbala mosi ya kuyantika kulonguka yo ti bantu na ntwala ya kielo. Diaka, mutindu bo tubilaka yo na lukutakanu ya distrike, kusadila yo ntangu beto ke vutukila bantu yina monisaka mpusa “lenda sala mpenza nde kisalu ya kuvutukila bantu kuvanda ya kiese!”—Tala balupangu yina kele na balutiti 5-7.
7. Inki mutindu nge lenda longuka Biblia ti muntu na kusadilaka kamukanda yai?
7 Mutindu ya Kulonguka ti Muntu: Beto lenda yantika disolo na kutangaka bangiufula yina kele na bisono ya ndombe mingi. Na nima, tanga paragrafe mpi baverse yina bo me tengimisa bisono. Sadila bangiufula ya mayele sambu na kusadisa muwi na kubakisa masonuku. Na ntwala ya kuluta na kitini ya nkaka, lomba muwi na kupesa mvutu na bangiufula yina kele na bisono ya ndombe mingi, sambu na kuzikisa nde yandi me bakisa. Na baviziti ya ntete, yo lenda vanda mbote na kutadila kaka ngiufula mosi. Na nima ya baviziti mingi, beto lenda banda kubaka ntangu mingi sambu na kutadila dilongi ya mvimba.
8. Inki mutindu beto fwete tuba na ntwala ya kutanga baverse, mpi sambu na nki?
8 Mingi-mingi, baverse yina bo me sonika “tanga,” ke pesaka mbala mosi bamvutu na bangiufula yina bo me sonika na bisono ya ndombe. Beto fwete yantika ve verse mosi na kutubaka nde, “Ntumwa Polo sonikaka nde” to, “Tala mbikudulu yai ya Yeremia.” Muwi lenda yindula nde beto ke tanga kaka bangogo ya bantu. Yo yina yo ta vanda mbote na kutuba nde, “Ndinga ya Nzambi ke tuba nde” to, “Awa mbikudulu ya kupemama ke tuba nde.”
9. Keti beto fwete tanga baverse yonso na ntangu ya kulonguka?
9 Keti beto fwete tanga baverse yonso to kaka yina bo me sonika nde “tanga”? Beto fwete sadila luswasukusu. Baverse yonso ya kele na baparagrafe kele na lukanu na yo. Konso verse kele na bansangu ya mfunu ya kutadila. Kansi, kana longoki kele ve na ntangu, ke tula ve dikebi, to ke tanga mbote ve, beto lenda tanga kaka baverse yina bo me sonika nde “tanga.”
10. Inki ntangu beto lenda soba mpi kukota na mukanda Biblia Kelongaka?
10 Ntangu ya Kusoba mpi Kukota na Mukanda Biblia Kelongaka: Na nima ya kusolula mbala mingi mpi ntangu beto ta banda kulonguka mbala na mbala, beto lenda soba mpi kukota na mukanda Biblia Kelongaka to kufula ti kamukanda Nsangu ya Mbote tii na nsuka. Bansamuni lenda sadila luswasukusu sambu na kupona ntangu ya kusoba mukanda. Kana beto me kota na mukanda Biblia Kelongaka, keti beto fwete banda na luyantiku? Yo ke lomba ve kusala kaka mpidina. Bantu ke vandaka ya kuswaswana. Kansi, balongoki mingi ke bakaka mambote kana bo tadila diaka na mudindu masolo ya mutindu mosi na mukanda Biblia Kelongaka.
11. Sambu na nki beto fwete sadila mbote kamukanda yai ya mpa?
11 Na nsi-ntoto bansangu ya mbote kele mingi ve; kansi, beto kele na dibaku ya nene ya kuzabisa nsangu yai ya kuluta mbote: Kimfumu ya Nzambi ke yala mpi ntama mingi ve yo tatula nsi-ntoto ya mpa, mpi na kati na yo lunungu ta vanda! (Mat. 24:14; 2 Pie. 3:13) Beto ke tula ntima nde bantu mingi yina ta wa nsangu yai ta ndima mpi bangogo yai ya kupemama: “Kiese mingi na kumona muntu kuna na bangumba ke kwisa ti nsangu ya mbote; yandi ke kwisa kunata nsangu ya ngemba, nsangu ya kuguluka ya bantu; yandi ke kwisa kuzabisa bantu ya bwala Sioni nde: ‘Tala, Nzambi na beno kele mfumu! Yandi me yantika kuyala bantu yonso ya nsi-ntoto!’” (Yez. 52:7) Bika beto sadila kamukanda yai ya mpa sambu na kunata nsangu ya mbote ya Nzambi na bantu yina kele na kiwina na teritware na beto!
[Lupangu ya kele na lutiti 5]
Kisika Yina Bantu Ke Ndimilaka Ve Nzambi mpi Biblia:
● Na bisika ya nkaka, bansamuni ke monaka nde bangogo “Nzambi” mpi “Biblia” ke kangaka bantu nzila ya kusolula. Na bisika yai, na viziti ya ntete, yo lenda vanda mbote na kutubila mambu yina ke yangisaka bantu, mu mbandu mfunu ya kuvanda ti guvernema mosi ya mbote, kisika yina mabuta lenda zwa lusadisu ya me fwana, mpi mambu yina ta salama na bilumbu ke kwisa. Ziku, yo lenda lomba kupesa muntu kamukanda Nsangu ya Mbote na nima ya kusolula ti yandi mbala mingi, mpi kutadila mutindu beto ke zabaka nde Nzambi kele mpi sambu na nki Biblia kele mukanda ya kutudila ntima.
[Lupangu ya kele na lutiti 6]
Na Kisalu ya Nzo na Nzo:
● “Me kwisa kutala nge sa na kusonga nge mutindu ya kuzaba kukonda mpasi mambu yina Nzambi ta sala sa na bantu na bilumbu ke kwisa. Keti nge me kudiyulaka dezia kana Nzambi ta katula beto na bampasi? [Bika muntu yango kupesa mvutu.] Kamukanda yai ke songa baverse ya Biblia yina le pesa nge bamvutu na bangiufula yai. [Pesa yandi kamukanda, tanga paragrafe ya ntete na dilongi 1, mpi tanga Yeremia 29:11.] Mutindu beto me tanga awa, keti nge ke yindula nde Nzambi ke zolaka nde beto zinga mbote na bilumbu ya ke kwisa? [Bika muntu yango kupesa mvutu.] Kana nge me zola nge le bikala ti kamukanda yai. Na mbala ya nima, beto ta tadila paragrafe ya zole sa na kubaka mvutu na ngiufula yai: ‘Inki mutindu Nzambi ta katula mambu yina ke vandaka na kisina ya bampasi ya bantu?’” Kana nge mona nde muwi kele ti ntangu mingi na viziti ya ntete, beno lenda tanga mpi kutadila paragrafe ya zole ti baverse na yo tatu. Baka bangidika sambu na kuvutukila yandi mpi kutadila ngiufula ya zole ya dilongi yai.
● “Bantu mingi ke zolaka kusamba, mingi-mingi kana bo me kutana na makambu. Keti nge ke sambaka bantangu ya nkaka? [Bika muntu yango kupesa mvutu.] Keti nge ke yindulaka nde Nzambi ke waka bisambu yonso, to yo le vanda na bisambu ya nkaka ya yandi ke buyaka? [Bika muntu yango kupesa mvutu.] Mu ke na kamukanda mosi ya ke monisa mutindu ya kuzwa mvutu ya Biblia na bangiufula yai. [Pesa yandi kamukanda, mpi beno tadila paragrafe ya ntete ya dilongi 12, mpi baverse yina bo me sonika “tanga.”] Keti yo ke pesa ve kiese na kuzaba nde Nzambi ke zolaka kuwa beto? Kansi sa na kubaka mpenza mambote ya kisambu, beto fwete zaba Nzambi mbote. [Kangula disolo 2 mpi songa yandi tubantu-diambu.] Kana nge me zola, mu le bikila nge kamukanda yai mpi na mbala ya nima beto le tanga mvutu ya Biblia ke pesa na bangiufula yai ya kitoko.”
● “Me kwisa kutala nge bubu sa bantu ke kudiyangisa na yina me tala makwisa ya nsi-ntoto. Keti nge ke yindula nde mambu ta toma kilumbu ya nkaka? [Bika muntu yango kupesa mvutu.] Bantu mingi ke yitukaka na kuzaba nde Biblia ke na bansangu ya mbote yina le pesa beto kivuvu. Tala bangiufula ya nkaka yina Biblia ke pesa bamvutu.” Pesa yandi kamukanda, mpi lomba yandi na kupona ngiufula mosi ya ke sepedisa yandi mingi na lutiti ya nsuka. Na nima, kangula dilongi mpi songa yandi mutindu beto ke longukaka ti bantu. Baka bangidika sa na kuvutukila yandi mpi kutadila ngiufula ya ke landa na dilongi yango.
[Lupangu ya kele na lutiti 7]
Meka Metode ya Mbala Mosi:
● “Mu ke zo songa nge kamukanda mosi ya mpa ya kulongukila Biblia. Kamukanda yai ke na malongi 15 ya ke zabisa kisika ya kuzwa bamvutu na Biblia na nge sa na bangiufula yai ya mfunu. [Songa yandi lutiti ya zulu mpi ya nsuka.] Keti nge me sosaka dezia kubakisa Biblia? [Bika muntu yango kupesa mvutu.] Mu ke zo songa nge malongi na yo ya pete. [Tadila paragrafe ya ntete ya ngiufula 3 na dilongi 3, mpi tanga Kusonga 21:4, 5. Kana mpila kele, beno tadila paragrafe ya ke landa mpi baverse ya bo me sonika “tanga.”] Kana nge me zola, mu le bikila nge yo. Beto ke lomba nge na kumeka kulonguka kamukanda yai ata mbala mosi. Kana yo sepedisa nge, nge le fula. Na mbala ya nima, beto le tadila dilongi ya ntete. Konso dilongi ke kaka na lutiti mosi.”
[Lupangu ya kele na lutiti 7]
Kabula Yo Ntangu Nge Ke Sala Mvutukilu ya Mpa:
● Ntangu beto ke vutukila muntu mosi yina monisaka mpusa, beto le tuba nde: “Mu ke na kiese ya kumona nge diaka. Me natila nge kamukanda yai ya ke pesa mvutu ya Biblia na bangiufula mingi ya mfunu. [Pesa yandi kamukanda, mpi lomba yandi na kutala na lutiti ya nsuka.] Inki dilongi me sepedisa nge mingi awa? [Bika muntu yango kupesa mvutu. Na nima, kangula dilongi ya yandi me pona.] Mu ke zo songa nge mutindu nge le sadila kamukanda yai sambu na kuzwa bamvutu ya Biblia.” Beno tadila paragrafe mosi to zole mpi baverse yina bo me sonika “tanga”, sambu na kusonga yandi mutindu beto ke longukaka ti bantu. Yai mutindu mosi ya pete ya kuyantika kulonguka Biblia ti muntu! Bikila muwi kamukanda yai, mpi baka bangidika sa na kuvutukila yandi. Kana beno manisa kutadila dilongi yango, beno lenda tadila dilongi ya nkaka yina yandi ponaka to kubanda na dilongi ya luyantiku.