Kisadilu ya mpa Sambu na Kusadisa Bantu na Kulonguka Malombu ya Nzambi

“NSONIKILU na yau ya mpasi ve, ya pwelele, mpi ya kitoko tabuta mbutu ya kuluta yina beto keyindula. Bantu-dyambu metendulama na mutindu mosi ya kukonda mpasi mpi ya kyese na mpila nde, konso muntu ya kesosaka kuzaba tapusama na kutuba nde, ‘ya kieleka, Nzambi kele awa ti beno.’ ” (1 Korinto 14:25) Mbangi ya Yehowa mosi ya Thaïlande tubaka mambu yai ntangu yandi vandaka kutendula kamukanda ya mpa, Inki Nzambi Kelombaka na Beto? La Société Watch Tower kubasisaka yau na Lukutakanu ya Distrike ya mvu 1996/97, “Binati-Nsangu ya Ngemba ya Nzambi.”

Kamukanda yai ya balutiti 32 ti bifwanisu ya kitoko kusalamaka bonso dilongi ya Biblia. Yau ketendula malongi ya lufulu ya Biblia. Bangogo kele ya mpasi ve mpi ya melombama, yau ketendula pwelele yina ya Nzambi kelombaka na beto. Batangi fwete vanda ve ti mpasi na kubakisa yau. Inki mutindu nge lenda twadisa kulonguka ya Biblia na kamukanda yai ya mpa?

Sadila bangyufula. Kele ti bangyufula na luyantiku ya konso dilongi. Na kati ya baparantezi na nima ya konso ngyufula, nge tamona ntalu ya baparagrafe kisika bamvutu kele. Bangyufula yai lenda sadilama na ntwala mpi na nsuka ya dilongi. Mu mbandu, na kuyantikaka kulonguka ya Biblia ti muntu na nzo, nge lenda kuyufula longoki bangyufula yango sambu na kuzaba bamvutu na yandi. Na kisika ya kusongisa bamvutu na yandi ya mbi na ntangu yina, beno lenda landa kulonguka. Na nsuka ya dilongi, nge lenda vutukila bangyufula na kumona kana ntangu yai longoki lenda pesa mvutu na yau na kuwakana ti Biblia.

Tanga mikapu. Na konso dilongi, bansa ya nkufi ya bakyeleka ya Biblia kemonisa mikapu na yau na lweka. Sambu mikapu mingi memonisama kaka kansi yau mesonama ve, yau kele mfunu na kusyamisa longoki na kutanga yau na Biblia na yandi mosi. Yandi kele na mfunu ya kutanga mpi kuyindulula Ndinga ya Nzambi na ntwala yandi kusadila yau na luzingu.​—⁠Yozue 1:8.

Tendula bafoto. Malongi ya kamukanda kele ya kutendulama na bafoto ti bifwanisa ya kitoko​—⁠kiteso ya bafoto ti bifwanisu 50 na kimvuka. Yau tulamaka ve kaka sambu na kitoko ya meso kansi mpi bonso lusadisu ya ngika ya kulongila. Mu mbandu, malongi zole ya nsuka (malongi ya lutiti mosi mosi, na balutiti ya ketalana) kele na bantu-dyambu “Sadisa Bankaka na Kusala Luzolo ya Nzambi” ye “Nzengolo na Nge ya Kusadila Nzambi.” Bafoto ya melandana na balutiti yai zole kemonisa nzila ya kuyela ya kimpeve ya muntu kaka yina mosi, na kumonisaka yandi keta kimbangi ya dibaku ya mbote, mevukana na kisalu ya kusamuna nzo na nzo, kekudipesa na Nzambi, ye na nsuka, yandi kebotama. Na kubendaka dikebi ya longoki na bafoto yai, nge kesadisa yandi na kubakisa bitambi yina melombama sambu na kusadila Nzambi.

Ebuna kana muntu ya kesepela ketangaka mbote ve to kekukaka kutanga ve kibeni? La Société kele na kukotisa lutangu ya kamukanda ya mpa na bakaseti na bandinga yankaka. Kaseti yango kele ti lutangu ya kamukanda kumosi ti lutangu ya mikapu mingi ya memonisama. Ndinga metulama mutindu yai: Lutangu ya ngyufula ya ntete, na nima kelanda lutangu ya paragrafe (to baparagrafe) yina kepesa mvutu na yau, kumosi ti lutangu ya mikapu ya memonisama. Na nima lutangu ya ngyufula ya melanda, ya kulandana ti lutangu ya (ba)paragrafe ti lutangu ya mikapu yina kepesa mvutu na yau, yau kelandana kaka mutindu yina. Longoki lenda widikila kaseti ntangu yandi kebongisa kulonguka. Nge lenda sadila mpi kaseti na ntangu ya kutwadisa kulonguka.

Bantu yina vandaka na lukutakanu vandaka na mpusa mingi ya kusadila kamukanda yai ya mpa na kisalu na bau ya bilanga. Mu mbandu, mwa bilumbu na nima ya kuzwa kamukanda yongo, bapasudi-nzila zole (baevanzelizatere ya ntangu yonso) na États-Unis kupesaka yau na bankwelani zole ya mpa yina bau vandaka kutala. Ntangu bankwelani talaka tansi ya malongi, dilongi “Bisalu Yina Nzambi Keyinaka” bendaka dikebi na bau. Mwana nkento tubaka nde: “Bau vandaka kulonga mono ntangu yonso nde Nzambi keyinaka ve​—⁠yandi kele kaka zola. Yai kele dilongi ya ntete ya mono tatanga.” Ntangu bapasudi-nzila yina zole vutukaka na mposo yina landaka, mwana nkento yango tubaka nde: “Mono vandaka tanga kamukanda ya mpa. Yau kele mpasi mingi na kusala mambu yonso ya beto fwete sala. Yehowa kesepelaka na beto ve​—⁠beto mekwelaka ve. Kansi beto mebaka nzengolo. Beto meyilama sambu na kukwela na Kitanu ya kekwisa.” Na kuyambaka bankwelani ya bapasudi-nzila, bau yikaka nde: “Beto kelomba ndolula sambu beto vandaka kulonguka ve ntangu yonso, kansi dyambu yai mekatula beto kilo ya nene.”

Na konso mutindu yina, sadila kamukanda Inki Nzambi Kelombaka. Yau kele kisadilu ya mbote ya kusadisila bankaka na kulonguka malombu ya Nzambi.

[Bifwanisu ya kele na lutiti 10]

Inki mutindu nge tasadila kamukanda ya mpa?