Beto Yedisa Mayele na Beto na Kisalu ya Kusamuna—Mutindu ya Kununga Bantembe

Mfunu na Yo: Yindula fioti, nge me zaba nde kisumbula mosi ya lugangu fwete salama. Mpi kana bantu kutina ve bo ta fwa. Nge me kwenda na nzo ya mfinangani na nge sambu na kuzabisa yandi kigonsa yango, kansi yandi me zenga nge ndinga mpi me tuba nde yandi ke na bisalu mingi. Ntembe kele ve nde, nge ta yambula ve mbala mosi bikesa na nge sambu na kusadisa yandi! Bantu mingi ke buyaka kusolula ti beto na teritware. Bo ke bakisaka ve valere ya nsangu yai ya ke gulusaka bantu. Ziku, beto ke kwendaka kutala bo ntangu bo ke salaka bisalu. (Mat. 24:37-39) To bo me zabisaka bo mambu ya luvunu sambu na beto. (Mat. 11:18, 19) Bo lendaka kuyindula nde, beto me swaswana ve ti mabundu ya nkaka ya ke salaka mambu ya mbi. (2 Pie. 2:1, 2) Kana muwi me tudila beto ve dikebi na mbala ya ntete, beto fwete yambula ve mbala mosi.

Mutindu ya Kusala Yo:

Na ntwala ya kusamuna nzo na nzo, baka mwa ntangu ya kuyindula bantembe yina nge lenda kutana ti yo, mpi tadila mutindu nge lenda pesa mvutu.
Kana muwi me tula ntembe, meka kusolula ti yandi na mawete yonso. Ziku nge lenda sala yo na kusikisa yandi. Mu mbandu, kana muwi me tuba nde mu ke dezia na dibundu na mono, nge lenda tuba nde: “Mono vandaka ti mpusa ya kukutana ti muntu yina ke sepelaka na mambu ya kimpeve bonso nge.” Bantangu ya nkaka, kuzitisa mawi ya muwi to kutadila mambu ya nkaka, lenda pesa nge nzila ya kulanda kuta kimbangi. Mu mbandu, kana yandi me tuba nde, yandi kele na mambu mingi ya kusala, nge lenda tuba nde: “Mu me bakisa. Kansi na ntwala nde mono kwenda, mono ke zola kupesa nge mukanda yai.” Dibanza ya nkaka kele ya kuyula muwi ngiufula kana yandi me tuba nde yo ke sepedisaka yandi ve. Nge lenda yula yandi nde: “Keti nge ke sosa kutuba nde nge ke sepelaka ve na Biblia to na mabundu?”
Sadila luswasukusu. Yibuka nde Yehowa ke pusaka ve bantu na ngolo na kuwa yandi. (Kul. 30:19) Konso muntu ta nata kilo na yandi mosi na ntwala ya Yehowa. (Bag. 6:5) Kana muwi ke buya mpenza na kuwa beto, yo ta vanda mbote beto kwenda. Kana beto ke zitisa mawi ya muwi, yo lenda sadisa nsamuni ya nkaka na kuta kimbangi na bilumbu ke kwisa.—1 Pie. 3:15.

Sadila Yo Ngonda ya Mvimba:

Ntangu nge me kutana ti ntembe, mpi beno me kabwana ti muwi, solula ti mpangi ya nge ke samuna ti yandi mutindu ya kuluta mbote yina nge lenda pesa mvutu.