Sadisa Muwi na Kuyindula
1. Inki metode kele mbote mingi na kisalu ya kusamuna?
1 Inki metode kele mbote mingi na kisalu ya kusamuna—metode ya kundimisa muwi mambu na ngolo to ya kusadisa yandi na kuyindula mpi na kubakisa mambu mbote-mbote? Ntumwa Polo kusadilaka metode yai ya zole ntangu yandi vandaka kusolula ti Bayuda na Tesalonika, mpi nsuka-nsuka “bantu ya nkaka na kati na bo tulaka ntima na mambu yina ya Paulo tubaka.” (Bis. 17:2-4) Kuyindula ti bantu yankaka ketendula inki?
2. Inki mutindu beto lenda landa mbandu ya Polo ntangu beto kesamuna nsangu ya mbote?
2 Tadila Mawi mpi Balukwikilu: Metode ya kuyindula ti muwi kelombaka kutadila mawi ya bantu yina kele na teritware. Ntangu Polo solulaka ti mimpani ya Greki na Areopage, ntembe kele ve nde yandi yantikaka ti mambu yina bo vandaka kuzaba mpi kundima. (Bis. 17:22-31) Yo yina, ntangu nge keyidika bangogo na nge ya kukotila na masolo, tadila balukwikilu mpi bangindu ya mbi yina bantu mingi kevandaka na yo na teritware na beno. (1 Kor. 9:19-22) Kana muwi mebasisa ntembe, meka na kusosa mambu yina lenda sala nde beno wakana mbote, mpi beno tadila mambu yango.
3. Inki mutindu beto lenda sadila bangyufula na mayele yonso sambu na sadisa mbote bantu na kuyindula?
3 Sadila Bangyufula na Mayele Yonso: Sambu na kupesa muntu mosi ya kesala nzyetelo lutwadisu yina tasadisa yandi na kukuma kisika yandi kekwenda, beto fwete zaba ntete kisika yina yandi kele. Mutindu mosi, sambu na kusadisa muwi na kubakisa mambu mbote, beto fwete zaba ntete mabanza na yandi. Na ntwala ya kuyindula ti muntu, mbala mingi Yezu vandaka kuyula bangyufula sambu na kubakisa bangindu na yandi. Mu mbandu, ntangu muntu mosi yulaka Yezu nde, “Nki mono fweti sala sambu na kubaka moyo ya mvula na mvula?,” Yezu sosaka ntete kubakisa mabanza ya muntu yina na ntwala ya kupesa mvutu. (Luka 10:25-28) Na dibaku yankaka, ntangu Piere pesaka mvutu ya mbi, Yezu sadilaka bangyufula na mayele yonso sambu na kusungika mabanza na yandi. (Mat. 17:24-26) Yo yina, kana muwi meyula ngyufula to mebasisa dibanza mosi ya mbi, beto lenda sadila bangyufula sambu na kusadisa yandi na kuyindula.
4. Sambu na nki beto fwete sosa kusadisa muwi na kuyindula?
4 Ntangu beto kesadisaka muwi na kuyindula, beto kelandaka mbandu ya Longi ya Nene, Yezu, mpi ya bansamuni yankaka ya mbote ya mvu-nkama ya ntete. Beto kepesaka muwi lukumu mpi luzitu. (1 Pie. 3:15, 16) Kana beto sala mutindu yai, yandi lenda ndima na luzolo yonso nde beto vutukila yandi dyaka.