Beno Sadila Mbote Bazulunalu ya Ntama

Bantu ke bakaka ve mambote ya bazulunalu ya ntama kana beto me bumba to me losa yo, yo yina beto fwete kabula yo. Zulunalu mosi lenda benda dikebi ya muntu na kieleka mpi lenda pusa yandi na kukumisa zina ya Yehowa. (Bar. 10:13, 14) Bangindu yai lenda sadisa beto na kusadila mbote bazulunalu na beto ya ntama.

• Ntangu beto ke samuna na bateritware yina bansamuni ke samunaka ve mbala na mbala, ziku beto lenda yambula zulunalu mosi na banzo yina beto me kuta ve bantu.

• Ntangu beto ke ta kimbangi na bisika ya bantu mingi, mu mbandu kisika yina bantu ke vingilaka babisi mpi batre, yula bantu kana bo ta zola kutanga mikanda, songa bo bazulunalu ya ntama, mpi bika bantu yango kupona.

• Ntangu beno ke kwenda kutala bisika yina bantu ke yobisaka bilele na bamasini (laverie), banzo ya minunu, balupitalu, to bisika ya nkaka ya me fwanana ti bisika yai ya kele na teritware na beno, bikila bantu ndambu ya bazulunalu ya ntama na kisika yina bo ke yambaka bantu. Yo ta vanda mbote na kulomba ntete nswa na muntu yina kele na kiyeka kana yandi kele pana. Kana nge me kuta mwa bazulunalu ya nkaka pana, kubika ve bazulunalu mingi.

• Ntangu nge ke yilama sambu na kuvutukila bantu, tadila bampusa ya konso muntu. Keti yandi kele na dibuta? Keti yandi ke zolaka kusala nzietelo? Keti yandi ke zolaka kusala bilanga? Zikisa na bazulunalu ya ntama kana disolo mosi lenda sepedisa yandi, songa yandi yo ntangu nge ke vutukila yandi.

• Kana nge me kutanaka diaka ti muntu yina monisaka mpusa na nima ya kumeka mbala mingi na kukutana ti yandi, songa yandi mwa bazulunalu ya ntama yina yandi me tangaka ntete ve.