Beto Yedisa Mayele na Beto na Kisalu ya Kusamuna—Beto Yidika Bangogo na Beto ya Luyantiku

Mfunu na Yo: Kana bangogo na beto ya luyantiku ke benda ve dikebi ya muwi, yandi lenda zenga disolo na ntwala nde beto ta kimbangi. Yo yina, bansamuni mingi ke monaka nde bangogo na bo ya luyantiku kele kitini ya mfunu sambu na kukotila na masolo. Ata Kisalu na Beto ya Kimfumu mpi mukanda Comment raisonner ke vandaka ti mbandu ya bangogo ya kukotila na masolo, bangogo yina ke vandaka ve ntangu yonso ti mambu yonso yina beto ke tubaka na luyantiku ya masolo, na mpila nde beto sadila yo na mambu yonso. Ata kana mbandu ya bangogo ya kukotila na masolo kele ti mambu yonso, bansamuni lenda soba yo to kuyidika bangogo na bo mosi ya kukotila na masolo. Kana beto ke yidika mbote-mbote bangogo na beto ya luyantiku na kisika ya kutuba mambu yina ke kwisila beto na mabanza ntangu muwi ke kangula kielo, beto ta vanda bansamuni ya mbote.—Bing. 15:28.

Mutindu ya Kusala Yo:

Pona disolo mosi. Disolo yango fwete vanda na kati ya mukanda yina ya nge ke kabula mpi yo fwete benda dikebi ya bantu ya teritware na beno.
Yidika mbote-mbote nsa mosi to bansa zole yina nge ta tuba na nima ya kupesa muwi mbote. Nge lenda tuba nde: “Mu me kwisa kutala nge sambu na . . . ,” “Bantu mingi ke kudiyangisa sambu na . . . ,” “Mu ta zola kuzaba dibanza na nge na . . . ,” to nge lenda tuba kima ya nkaka. Mbala mingi, bansa ya nkufi mpi ya pete ke vandaka mbote mingi kibeni. Bansamuni ya nkaka ke kangaka bangogo ya luyantiku na ntu.
Yula muwi ngiufula yina ta pusa yandi na kupesa dibanza sambu beno solula. (Mat. 17:25) Kuvila ve nde mbala ya nkaka, yandi vandaka kuyindula mambu ya nkaka na ntwala nde nge kwisa. Yo yina, ngiufula na nge fwete vanda ve ya mpasi to yina ke pesa yandi boma.

Sadila Yo Ngonda ya Mvimba:

Ntangu beno ke sala lusambu ya dibuta, beno bumba ntangu sambu na kuyidika mpi kusala nsonga ya bangogo na beno ya luyantiku.
Ntangu nge kele na kisalu ya kusamuna, zabisa bansamuni ya nkaka mambu yina nge yidikaka. (Bing. 27:17) Soba bangogo na nge ya luyantiku kana yo kele simba ve.