Bamvutu na Bangiufula na Beno

◼ Inki mambu bana fwete longuka sambu bo yela na kimpeve?

Bakristu yina kele bibuti ke salaka bikesa sambu na kusansa bana na bo na “malongi mpi na balukebisu ya Yehowa.” (Baef. 6:4) Mu mbandu, bibuti ke monaka nde kutadila mukapu ya lumbu ti bana na bo konso suka kele mfunu. Na lusambu ya dibuta mpi na mabaku ya nkaka, mabuta lenda tala mpi kutubila video mosi, kutadila bangindu ya siki-siki ya masolo yina kele mukanda Les jeunes s’interrogent, kutubila disolo mosi ya Biblia, to kusala bansonga. Kansi, sambu bana ‘kusala ngolo na kukuma bantu ya kuyela’ bo fwete longa bo bakieleka ya mudindu ya Biblia.​—Baeb. 6:1.

Beto tadila mambu yina beto ke longaka bantu ya teritware na beto. Na mbala ya ntete to na viziti ya nkaka, beto ke salaka ngolo sambu na kuyantika kulonguka Biblia ti muntu na mukanda Inki Biblia Kelongaka Mpenza? Na nima ya kumanisa mukanda yango, beto ke sadilaka mukanda ‘Beno Zinga Kaka Na Zola Ya Nzambi.’ Sambu na inki? Mukanda Biblia Kelongaka ke pesaka balongoki ya Biblia nzayilu ya luyantiku ya Masonuku. Mukanda “Zola ya Nzambi” ke longaka bo mutindu ya kusadila minsiku ya Biblia na luzingu ya konso kilumbu. Kulonguka mikanda yai zole ke sadisaka balongoki ya mpa na kuvanda ti “misisa ya ngolo” na Kristu mpi ‘ngolo na lukwikilu.’ (Bakol. 2:6, 7) Malongi yai kele mfunu mpi sambu na bana na beto. Bana ke zolaka nde bo longa bo mambu ya me tala nkudulu, Kimfumu mpi nkadilu ya bafwa. Bo ke zolaka mpi kuzaba sambu na nki Nzambi ke pesaka nzila na bampasi mpi inki mutindu kuzaba mambu ya me tala bilumbu ya nsuka ya ngidika ya bima yai. Bibuti fwete ndimisa bo nde Bambangi ya Yehowa ke longaka kieleka. Bana ke zolaka mpi kubakisa minsiku ya Biblia mpi mutindu ya kusadila “mayele na bo ya kuswaswanisa mambu.” (Baeb. 5:14) Ya kieleka, bibuti fwete tadila bamvula mpi makuki ya bana na bo ya kubakisa mambu. Bana mingi ke vandaka ti makuki ya kulonguka bakieleka ya mudindu ya Biblia ata ntangu bo kele ntete baleke kibeni.​—Luka 2:42, 46, 47.