Beto Landa Mbandu ya Baprofete—Sofonia
1. Na nki nsungi Sofonia salaka kisalu ya kiprofete, mpi nki mutindu yandi kele mbandu ya mbote sambu na beto bubu yai?
1 Na kati-kati ya mvu-nkama ya nsambwadi N.T.B., lusambu ya Baale yalumukaka na Yuda. Na nima, bo fwaka Amoni Ntotila ya mbi mpi Yoziasi, mwana na yandi yantikaka kuyala. (2 Bans. 33:21–34:1) Na nsungi yina, Yehowa tindaka Sofonia sambu na kuzabisa nsangu na yandi ya lusambisu. Ata yo lenda vanda nde Sofonia vandaka na dibuta ya bantotila ya Yuda, yandi waka ve boma na kuzabisa nsangu ya lusambisu ya Yehowa na kimfumu ya Yuda. (Sof. 1:1; 3:1-4) Mutindu mosi, beto ke salaka ngolo na kulanda kikesa ya Sofonia mpi ke bikaka ve nde bantu ya dibuta na beto kukanga beto nzila ya kusambila Yehowa. (Mat. 10:34-37) Inki nsangu Sofonia vandaka kulonga mpi nki mbuma yo butaka?
2. Inki mambu beto fwete sala sambu na Yehowa kupesa beto ve ndola na kilumbu ya makasi na yandi?
2 Sosa Yehowa: Yehowa mpamba muntu lenda gulusa bantu na kilumbu ya makasi na yandi. Yo yina, Sofonia siamisaka bantu ya Yuda na kusosa Yehowa, lunungu mpi kudikulumusa na ntangu yina bikalaka. (Sof. 2:2, 3) Yo kele mpi mutindu mosi bubu yai. Bonso Sofonia, beto ke siamisaka bantu na kusosa Yehowa. Kansi beto fwete sala mpi mutindu mosi, kubaka lukanu ya ‘kubuya ve Yehowa.’ (Sof. 1:6) Beto ke sosaka Yehowa ntangu beto ke longukaka Ndinga na yandi na dikebi yonso mpi ntangu beto ke sambaka Yehowa sambu na kulomba lusadisu. Beto ke sosaka lunungu ntangu beto ke zingaka luzingu mosi ya bunkete. Beto ke sosaka kudikulumusa ntangu beto ke yedisaka kikalulu ya bulemfu mpi ntangu beto ke landaka lutwadisu ya organizasio ya Yehowa kukonda kusukinina.
3. Sambu na nki beto fwete tanina mabanza ya mbote na kisalu ya kusamuna?
3 Mbutu ya Mbote: Nsangu ya lusambisu ya Sofonia simbaka ntima ya bantu ya nkaka ya Yuda mpi mingi-mingi Yoziasi, toko yina yantikaka kusosa Yehowa ntangu yandi vandaka leke. Na nima, Yoziasi salaka kampanye mosi ya ngolo sambu na kukatula lusambu ya biteki na Yuda. (2 Bans. 34:2-5) Bubu yai, ata bankeni ya nkaka ya Kimfumu ke bwaka na nzila, na bisika ya matadi, to na bansende, bankeni ya nkaka ke bwaka na ntoto ya mbote mpi ke butaka bambuma. (Mat. 13:18-23) Beto ke tula ntima nde Yehowa ta landa kusakumuna bikesa na beto mutindu beto ke salaka mingi sambu na kumwanga bankeni ya Kimfumu.—Nk. 126:6.
4. Sambu na nki beto fwete ‘vingila Yehowa’?
4 Bantu ya nkaka na Yuda yindulaka nde Yehowa ta pesa bo ve ndola. Kansi Yehowa silaka bo yonso nde kilumbu na yandi ya nene vandaka pene-pene. (Sof. 1:12, 14) Kaka bantu yina tinaka na Yehowa gulukaka. (Sof. 3:12, 17) Sambu beto ‘ke vingila Yehowa,’ bika nde beto vanda na kiese ya kusadila Nzambi ya nene na bumosi ti bampangi na beto Bakristu!—Sof. 3:8, 9.