Bankunga ya Mpa Sambu na Lusambu!
1 Na lukutakanu ya nsuka ya mvula ya Watch Tower Bible and Tract Society of Pennsylvania yina me katuka kusalama na Oktobri 4, 2014, bo bakaka bangidika sambu na kutomisa mukanda na beto ya bankunga. Nsangu yango pesaka kiese mingi kibeni! Bo yibusaka bawi yonso kisika ya mfunu yina bankunga ya Kimfumu fwete baka na lusambu na beto.—Nk. 96:2.
2 Nge lenda kudiyula nde: ‘Sambu na nki yo ke lomba nde bo tomisa mukanda ya bankunga?’ Bikuma kele mingi. Ntete, mutindu na beto ya kubakisa Masonuku ke landa na kutoma mpi yo lenda vanda ti bupusi na bangogo ya bankunga na beto. (Bing. 4:18) Kikuma ya nkaka kele nde bangogo mpi bansa mingi ya kele na mukanda na beto ya bankunga me katukaka na Traduction du monde nouveau ya ntama. Bo fwete soba bangogo ya bankunga yango sambu yo wakana ti bangogo ya Traduction du monde nouveau ya bo me tomisa. Sambu kutomisa bangogo ya bankunga ta lomba kisalu ya mingi, beto bakaka mpi lukanu ya kuyika mwa bankunga ya nkaka ya mpa.
3 Keti beto ta vingila tii kuna bo niema mukanda ya bankunga ya mpa sambu beto yantika kusadila yo? Ve. Beto kele na kiese ya kuzabisa beno nde na bangonda ya ke kwisa, beto ta basisa bankunga mingi ya mpa mpi ta tula yo na site Internet na beto jw.org. Kana nkunga ya mpa me basika, beto ta tula yo na nsuka ya manaka ya Lukutakanu ya Kisalu mpi beto ta sonika “nkunga ya mpa.”
4 Mutindu ya Kulonguka Bankunga ya Mpa: Yo lenda vanda mpasi na kulonguka nkunga mosi ya mpa. Bonso muyimbi-bankunga, beto ke zolaka kuyimba na balukutakanu ya dibundu na kisika ya ‘kuvanda pima.’ (Nk. 30:13) Sambu na kulonguka nkunga mosi ya mpa, landa bitambi yai:
Widikila mbala na mbala bankunga ya bo me bula ti piano ya bo ta tula na site Internet na beto. Kana nge ke widikila yo mbala na mbala, nge ta yibukaka yo kukonda mpasi.
Longuka bangogo ya bankunga mpi simba yo na ntu.
Yimba bankunga nzila mosi ti miziki. Sala mutindu yai tii kuna nge ta simba yo na ntu.
Mbala na mbala, baka mwa ntangu ya kuyimba bankunga ya mpa na Lusambu ya Dibuta tii kuna dibuta na beno ta yikana ti yo.
5 Na bangonda ya ke kwisa, kana bo me tula nkunga ya mpa na manaka sambu na kusukisa Lukutakanu ya Kisalu, dibundu ta widikila ntete miziki ya bo me bula ti piano. Na nima, bawi ta yimba nkunga yina nzila mosi ti miziki, mutindu beto ke salaka ti bankunga ya nkaka.
6 Kana nge yindula mbote, kuyimba na balukutakanu ke pesaka beto kiese ya kuvukisa mingungu na beto sambu na kukumisa Yehowa. Yo yina, beto fwete vanda ve ti kikalulu ya kubasika na nganda kukonda kikuma ntangu bo ke yimba na balukutakanu ya dibundu.
7 Beto kele mpi ti mutindu ya nkaka ya kumonisa ntonda sambu na miziki na beto ya santu. Na balukutakanu ya nene, miziki ke bulaka na ntwala nde konso kitini kuyantika. Mbala zole na konso mvula, bampangi ya babakala mpi ya bankento ya kwikama ya ntoto ya mvimba ke futaka mbongo na bo sambu na kukwenda na Patterson, na New York sambu na kubula miziki ya kitoko ya beto ke sadilaka na lusambu. Yo yina, kana ntwadisi me lomba beto na kubaka bisika mpi na kuwidikila miziki yina orkestre me yidika, beto fwete lemfuka. Kulemfuka na ngidika yai ta sadisa beto na kuyidika bantima sambu na kulanda mambu ya bo ta longa.—Esd. 7:10.
8 Beto ta sukisa lukutakanu na beto ya bubu yai ti nkunga ya mpa ya kele ti ntu-diambu “Kimfumu Kele na Kuyala—Bika Yo Kwisa!” Bo basisaka nkunga yai na lukutakanu ya nsuka ya mvula ya me katuka kusalama mpi bo salaka yo mingi-mingi sambu na kumonisa nde Kimfumu ya Nzambi me yala dezia bamvula 100.
9 Ntembe kele ve nde bankunga ya mpa kele “mambu ya mbote” ya me katuka na Yehowa. (Matayo 12:35a) Bika nde beto baka lukanu ya kulonguka bankunga yai ya mpa mpi kuyimba yo sambu na kupesa Nzambi lukumu ya me fwana!—Nkunga 147:1.