Mutindu ya Kulonguka

Kanga na ntu “Bankunga ya Kimpeve”

“Ntangu mono ke vandaka mawa-mawa, Yehowa ke pesaka mono kikesa na nzila ya bankunga ya JW Télédiffusion^®.”​—Lorraine, États-Unis.

Bakristu ke yimbaka “bankunga ya kimpeve” sambu na kukumisa Nzambi. (Bakol. 3:16) Kana nge ke kanga bankunga yina na ntu, yo ta sadisa nge ata ntangu nge kele ve ti mukanda ya bankunga to apareyi. Meka kusadila mwa bandongisila ya ke landa sambu na kukanga bankunga na ntu.

• Tanga mbote-mbote bangogo na yo sambu na kubakisa ntendula na yo. Kana nge ke bakisa ntendula ya kima mosi, nge ta yibuka yo na pete yonso. Bangogo ya bankunga na beto yonso, yo vanda ya bankunga ya nkaka to ya bankunga ya bana, kele na jw.org. Na kitini Biblioteke, kota na kisika bo me sonika Miziki.

• Sonika bangogo na yo. Kana nge sala mpidina, yo ta sadisa nge na kuyibuka bangogo yango nswalu.—Kul. 17:18.

• Yimba na ndinga ya ngolo. Tanga bangogo ya nkunga to yimba nkunga yango mbala na mbala.

• Meka kuyimba kana nge ta yibuka yo. Meka kuyimba kukonda kutala na papie yina nge sonikaka bangogo. Na nima, tala papie yango sambu na kuzaba kana nge me yimba yo mbote.